Chempıonat shymyldyǵy 21 tamyzda Gagarın kýbogynyń ıegeri SKA men birinshilik jeńimpazy SSKA arasyndaǵy kezdesýmen ashylady. Jańa kestege sáıkes, birinshiliktiń alǵashqy bóligi 2018 jyldyń 1 naýryzynda aıaqtalady. Al ekinshi kezeń 3 naýryzdan bastalady dep josparlanyp otyr. QHL-ǵa qatysatyn ár komanda ózara 56 match ótkizedi. Bıylǵy kesteniń ereksheligi, hokkeısiz ótetin kúnderdiń sany barynsha azaıtylǵan.
«Bıylǵy maýsym tartysqa toly bolaıyn dep tur. Sondaı-aq, bıyl birneshe halyqaralyq úlken týrnırler bolady. Soǵan baılanysty óte tıimdi keste qurastyryldy. QHL-dyń onynshy maýsymy qyzyqty ótetinine senimdimin», ‒ deıdi QHL-dyń vıse-prezıdenti Georgıı Kobylıanskıı.
«Barys» jańa maýsymnyń alǵashqy oıyndaryn óz aıdynynda ótkizedi. Áýeli elordalyqtar 24 tamyzda «Spartak» klýbymen kúsh synassa, ekinshi oıynda 26 tamyzda rıgalyq «Dınamomen» sheberlik baıqasady. 28 tamyzda Astanaǵa qonaqqa «Severstal» keledi. «Barys» úıdegi sońǵy oıynynda 30 tamyz kúni «Torpedoǵa» qarsy aıdynǵa shyǵady.
Abaı Asankeldiuly
«Egemen Qazaqstan»
