Qyrǵyzstannyń jańa saılanǵan prezıdenti Almazbek Atambaev 2014 jyly Manastaǵy amerıkalyq avıabazanyń jabylatynyn, kelisim-sharttyń uzartylmaıtynyn resmı túrde málimdedi.
Áskerı bazanyń terrorshylar úshin nysanaǵa aınalýy múmkin dep túsindirgen ol óz oıyn. Al AQSh bolsa, mundaı sheshimge daıyn bolatyn – ol kópten beri Ortalyq Azııada qosalqy áýejaı izdestirýde. Jeksenbi kúni saılanǵan Qyrǵyzstan prezıdenti Manas áýejaıyndaǵy amerıkalyq tranzıttik tasymaldar ortalyǵynyń taıaýda jabylatynyn habarlady. Bizdiń áýejaı azamattyq, sondyqtan ol azamattyq istermen aınalysýǵa tıis, dep atap kórsetken ol.
Topan sý týdyrǵan qarbalas
Taıland astanasy Bangkogtiń ortalyq kvartaldary Chaopraıa ózenindegi sýdyń kóterilýine baılanysty sý astynda qaldy.
Elde sońǵy 50 jylda oryn alǵan óte kúshti topan sý zardaptarymen kúres jalǵasýda. Qalanyń sý basqan aýdandarynan halyqtyń jappaı qashýy orasan keptelister men qarbalastar týyndatty. Qaladaǵy mańyzy jaǵynan ekinshi sanalatyn Don Mýeang áýejaıyn sý basyp ketti. Ázirge Bangkogtyń halyqaralyq áýejaıy jumys istep tur, biraq ol da Taıland astanasynan ketýge asyqqan halyqqa syqasyp tur.
Kaddafı qarý-jaraqtary joıylýǵa tıis
BUU Qaýipsizdik Keńesi Lıvııany Mýammar Kaddafı rejiminiń qarý-jaraq murasyn tez arada joıýǵa shaqyrýda.
Qaýipsizdik Keńesi músheleriniń pikirinshe, birinshi kezekte kóshpeli zenıtti zymyran keshenderi men hımııalyq qarýlar qoryn zalalsyzdandyrý qajet. О́ıtkeni, qarýdyń mundaı túrleri óte úlken qater týdyrady. Terrorlyq uıymdardyń qolyna túsken jaǵdaıda olardyń keń aýqymdy terrorlyq aktiler jasaý úshin paıdalanylýy ábden múmkin.
Orys tiliniń mártebesi anyqtalýda
1 qarashadan bastap Latvııa aýmaǵynda 612, odan tysqary jerlerde 39 saılaý ýchaskeleri óz jumystaryn bastady.
Olar arqyly el konstıtýsııanyń 5-babyna ózgerister engizýdi jáne oǵan orys tili ekinshi memlekettik til retindegi erejeni qosýdy qarastyratyn «Latvııa Respýblıkasy konstıtýsııasyna túzetýler» jónindegi zań jobasyna qoldaý bildirýge bolady. Saılaý ýchaskeleri kúnine 4 saǵattan 30 kún boıy jumys istemekshi. Osy sharaǵa 435 myń lat (613 myń eýrodaı) qajet kórinedi.
Qarym-qatynasty jaqsartýǵa shaqyrdy
AQSh Túrkııany óziniń kórshilerimen, onyń ishinde Izraılmen jaqsy qarym-qatynastarda bolýǵa shaqyrdy.
Bul týraly AQSh-tyń memlekettik hatshysy Hılları Klınton 2 qarasha kúni bolatyn Ankaraǵa sapary aldynda málimdeme jasaǵan. Bizdi Túrkııa men Izraıl arasyndaǵy qarym-qatynastardyń nasharlaýy alańdatyp otyr. Vashıngton eki taraptyń mańyzdy qarym-qatynastardy burynǵy deńgeıge qaıtarýǵa shaqyrýyn odan ári jalǵastyrýda, dep atap kórsetken Klınton óz málimdemesinde.
Polısııa bastyǵy otstavkaǵa ketti
Armenııa polısııasynyń bastyǵy Alık Sargsıan otstavkaǵa jiberildi.
Osyǵan deıin de Sargsıannyń otstavkaǵa ketkeni týraly qaýesetter taratylǵan bolatyn, endi ony ol ózi rastap otyr. О́ziniń otstavkaǵa ketetindigin salqynqandylyqpen qabyldaǵan Sargsıan munyń qalypty jaǵdaı ekenin, óziniń alda da eline qyzmet ete beretinin jetkizgen. Sonymen birge, ol óziniń qyzmetten ketýine qanaǵattanǵysyz jumys sebep boldy dep eseptemeıdi.
Referendýmnan qaýip úlken
Grekııa premer-mınıstri Georgıos Papandreýdiń elge kómek baǵdarlamasy týraly máseleni jalpyhalyqtyq referendýmǵa shyǵarý týraly málimdemesinen keıin eýroaımaqtyń kezekti daǵdarysqa ushyraýy múmkin.
Papandreý óz sheshimin halyqaralyq kredıtorlar talap etip otyrǵan bıýdjet shyǵyndaryn qysqartý jáne qurylymdyq reformalar júrgizý úshin jurtshylyqtyń neǵurlym keńirek qoldaýyna ıe bolý tilegimen baılanystyryp otyr. Sarapshylardyń paıymdaýynsha, halyqtyń qutqarý baǵdarlamasyna qarsy bolýyna baılanysty referendýmnyń kóptegen problemalar týyndatýy múmkin.
Kaddafıdi jaqtaımyn dep jaqpady
Nemistiń «Telefonika» telekommýnıkasııalyq konserni belgili aktrısa Vanessa Hesslermen aradaǵy kelisim-shartty buzdy.
Oǵan Vanessanyń Lıvııanyń burynǵy basshysy Mýammar Kaddafıdiń qaza tapqan uly Mýttasım Kaddafımen jaqyn qarym-qatynasta bolýy sebepker bolyp otyr. 23 jasar aktrısa «Diva e Donna» jýrnalyna bergen suhbatynda Mýttasım Kaddafımen 4 jyl boıy kezdesip kelgenin aıtyp, Mýttasım men onyń otbasy týraly óte jyly lebizder bildirgen. Ol Kaddafıler otbasynyń olar týraly aıtyp, jazyp jatqandarǵa múlde uqsamaıtynyn atap kórsetken.
Zardap shegýshiler kóbeıe túsýde
2011 jyldyń naýryzynan beri Sırııadaǵy úkimetke qarsy ereýilder saldarynan 4 135 adam zardap shekken.
Quqyq qorǵaýshylardyń aıtýynsha, tek sońǵy eki aıda ǵana eldiń qaýipsizdik kúshterimen aradaǵy qaqtyǵystan 1 myńnan astam adam qaza tapqan. Olar keltirgen málimetke qaraǵanda, qaza tapqandar arasynda 265 bala men 400-den astam áskerı qyzmetshiler bar kórinedi.
Internet materıaldary negizinde ázirlendi.
