Balalyq shaqtan bastalǵan arman
Mıhaıl Shaıdorov 2004 jylǵy 25 maýsymda Almaty qalasynda dúnıege kelgen. Bolashaq chempıon muz aıdynyna bes jasynda aıaq basty. Onyń alǵashqy bapkeri ári sporttaǵy baǵyt-baǵdaryn aıqyndaǵan adam – ákesi Stanıslav Shaıdorov, Qazaqstannyń birneshe dúrkin chempıony.
Ákesi ony alǵash ret «Ramstor» muz aıdynyna ertip barǵan. Kishkentaı Mıhaıl mánerlep syrǵanaýdy birden unatqan joq. Biraz ýaqyt sporttyq gımnastıkamen aınalysty. Alaıda araǵa bir jarym jyl salyp, muzǵa degen saǵynyshy oıanyp, konkı tebýge degen qulshynysy kúsheıedi. Sóıtip, jeti jasynan bastap turaqty jattyǵýǵa kirisedi.
14 jasqa tolǵanda Shaıdorovtyń otbasy kásibı ósýge qolaıly jaǵdaı izdep, Reseıge qonys aýdarady. Áýeli Máskeýde, keıin Sochıde jattyǵady. 2018 jyly ol Reseıdiń tuńǵysh olımpıada chempıony, tájirıbeli maman Alekseı Ýrmanovpen birlesip jumys isteı bastaıdy.
Bul sheshim kezdeısoq emes edi. Qazaqstanda sol kezeńde álemdik deńgeıdegi juldyz tárbıeleýge qajetti ınfraqurylym jetkiliksiz bolatyn. Al Sochı qalasynda 2014 jylǵy Olımpıadadan keıin mánerlep syrǵanaýǵa arnalǵan zamanaýı baza qalyptasqan edi.
Memleket basshysy Mıhaıl Shaıdorovty Olımıpıada chempıony atanýymen quttyqtady
Alǵashqy jarqyn jetistikter
Shaıdorovtyń halyqaralyq arenadaǵy alǵashqy eleýli tabysy 2022 jyly tirkeldi. Áli jasóspirimder sanatynda óner kórsetip júrip, ol álem chempıonatynda kúmis medal jeńip aldy. Qysqa baǵdarlamadan keıin segizinshi orynda turǵan Mıhaıl erkin baǵdarlamada senimdi óner kórsetip, jalpy esepte ekinshi orynǵa kóterildi. Sol jarysta ol tek tehnıkalyq sheberligimen tanylǵan Ilıa Malınınge ǵana jol bergen edi.
Eresekter arasyndaǵy serpilis
Eresekter deńgeıindegi alǵashqy medaldar 2023-2024 maýsymynda kele bastady. Degenmen shynaıy serpilis kelesi jyly baıqaldy. Mıhaıl Qytaıdaǵy Gran-prı kezeńinde kúmis júlde alyp, fınalda besinshi orynmen shekteldi. Biraq ol tórt qurlyq chempıonatynda top jaryp, Azııa oıyndarynda qola júldege qol jetkizdi. Sonymen qatar álem chempıonatynda kúmis medal enshiledi.
Bostonda ótken álem birinshiliginde erkin baǵdarlamada Mıhaıl kúrdeli elementterdi minsiz oryndady. Jalpy 287,47 upaı jınap, álemdik deńgeıdegi sheber ekenin dáleldedi.
Bapkeri Alekseı Ýrmanov shákirtiniń qaısar minezin erekshe atap ótti. Onyń aıtýynsha, Mıhaıl ár jarysta óziniń myqtylyǵyn sózben emes, muz ústindegi ónerimen dáleldeıdi.
Sonymen qatar «Sport Ekspress» basylymyna bergen suhbatynda Alekseı Ýrmanov sportshynyń Olımpıadadaǵy jetistigine qatysty sezimi 1994 jyly ózi altyn jeńip alǵan kezdegi áserden ózgeshe ekenin atap ótti.
«Qazir mende bul jigitke degen zor maqtanysh sezimi bar. Jigitke emes, naǵyz er-azamatqa degen. Osyndaı sportshym bar ekenine, oǵan senim arta alatynyma qatty qýanamyn. Tipti táýekelge de senip tapsyra alamyn. Búgingi erkin baǵdarlamadaǵy tórttik flıp áli tolyq pisip-jetilmegen element edi, ony az jattyqtyrdyq. Soǵan qatty alańdadym», dep moıyndady Ýrmanov.
Sondaı-aq bapker eger Shaıdorovtyń ornynda basqa sportshy bolǵanda, ony bul elementti oryndaýǵa eshqashan jibermeıtini atap ótti.
Mılandaǵy tarıhı sát
2026 jylǵy Olımpıada qarsańynda Shaıdorov altynǵa basty úmitker sanalmady. Sarapshylar ony kúmis pen qola úshin talasatyn sportshylar qataryna qosqan edi. Al basty favorıt retinde «kvadtardyń qudaıy» atanǵan Ilıa Malının kórsetildi.
Degenmen sport – tosynsyıǵa toly. Qysqa baǵdarlamada Mıhaıl tórttik lýtsti úshtik týlýppen kaskadta oryndap, úshtik aksel men tórttik týlýpty sátti qondyrdy. Nátıjesinde 92,94 upaı jınady.
Erkin baǵdarlamada ol bastapqy josparyn ózgertip, bes tórttik sekirýdi qamtyǵan kúrdeli kontent usyndy. Úshtik aksel men tórttik salhov kombınasııasy, tórttik flıp pen týlýp, ózge de joǵary tehnıkalyq elementter kórermendi tánti etti. Qazylar alqasy oǵan 198,64 upaı berdi. Qorytyndy nátıje – 291,58 upaı.
Bul kórsetkish oǵan Olımpıada altynyn syılady. Osylaısha Mıhaıl Shaıdorov Qazaqstan tarıhyndaǵy mánerlep syrǵanaýdan tuńǵysh olımpıada chempıony atandy.
Jeńisten keıin otandasymyz bul júldege qol jetkizý qıyn bolǵanyn aıtty.
«Shynymdy aıtsam, áli de sene alar emespin. Maýsym boıy óz-ózimmen kúrestim. Bul maýsym men úshin asa aýyr boldy. Jarystarda bes birdeı tórttik sekirýdi shamamen úsh ret oryndap kórýge tyrystym, biraq birde-bir ret sátti shyqpady. Al búgin bári sátti oryndaldy. Sáti túsip, qolymnan keldi.
Men bul Olımpıadaǵa uzaq daıyndaldym. Maýsym boıy bar oıym - óz isimdi adal atqarý boldy. Endi eńbegimniń jemisin kórip otyrmyn. Bul medaldi Qazaqstan halqyna arnaımyn», dedi Olımıpıada chempıony.
Rekordtar men tarıhı mańyz
Shaıdorov – álemde alǵash ret úshtik aksel men tórttik týlýpty, sondaı-aq úshtik aksel men tórttik salhovty oıler arqyly kaskadta oryndaǵan sportshy. Bul tehnıkalyq batyldyq oǵan moıyndalǵan sheberlerdi basyp ozýǵa múmkindik berdi.
Buǵan deıin álem chempıonatynda kúmis júlde alǵan qazaqstandyqtar qatarynda 2013 jyly Denıs Ten, 2019 jyly Elızabet Týrsynbaeva bolǵan edi. Sonymen qatar 2014 jyly Sochı Olımpıadasynda Denıs Ten qola júldeni oljalaǵan edi. Al Mıhaıl el qorjynyna úshinshi álemdik kúmisti jáne tuńǵysh olımpıadalyq altyndy saldy.
Aıta keteıik, mánerlep syrǵanaýshy Mıhaıl Shaıdorov qysqa baǵdarlamasyn Qazaqstannyń Halyq ártisi Dımash Qudaıbergenniń oryndaýyndaǵy «Confessa» kompozısııasynyń súıemeldeýimen usyndy.
