Taǵdyrdyń jazmyshymen Olga ákesi Hýdıan-Bın Vıktordan, anasy Marına Ospıchýktan jastaıynan aıyrylady. Qos qanaty qyrqylǵanymen, ómirge degen ózgeshe mahabbaty qaıratyn muqaltýǵa mursha bermedi. Naǵashy ájesi Lıýdmılanyń qolynda ósip, jylýyn sezinedi. Judyryqtaı qyzdyń janaryndaǵy otty baıqaǵan ájesi janyp turǵan júregine jiger beredi. «Qalaıda osy qyzdy oqytyp, toqytamyn», degen armany shyndyqqa aınalady.
Olganyń qazaq tilin erkin meńgerip ketýine ortasynyń da áseri mol. Qaımaǵy buzylmaǵan orta! Qasıetti topyraq Qoıandy qonysy. Ol osyndaǵy №35 orta mektepten bilim alady. Ondaǵy ustazdar men oqýshylar Olganyń ana tiline degen qurmetin kórip, alaqanyna salady. Mektepte merekelik konsertterge, qoǵamdyq is-sharalarǵa belsene qatysady. Oqýda da ozat onyń endigi oılaǵany – ulaǵatty ustaz bolý.
Osy armanynyń izine túsip, Qaraǵandy gýmanıtarlyq kolledjin bastaýysh synyp muǵalimi jáne praktıkadaǵy psıholog mamandyǵy boıynsha támamdaıdy. Ári qaraı joǵary bilimin tereńdetip, Bolashaq akademııasynda pedagogıka jáne psıhologııa mamandyǵy boıynsha dıplom alady.
Ýaqyt óte kele Olga óziniń ómirlik jary Aıdyn Tursynulymen otaý qurady. О́zi ósip-óngen qasterli Qarqaralyǵa kelin bolady. Berekeli áýlet Oqanovtar shańyraǵy aq kelinge qurmetpen qarap, qoldaý kórsetedi. Ulttyq salt-dástúrlerdi jetik biletin, kelin ádebiniń bárin boıyna syıdyrǵan ol, árıne, qaıynjurtynda syıly.
Olga óleń oqyǵandy janyndaı súıedi. Jáne qalaı oqıdy? Ol osy bir boıyndaǵy asyl óneri arqyly telearnadaǵy baǵdarlamalarǵa qonaq bolyp, kórermen kózaıymyna aınaldy. Ásirese Muqaǵalı Maqataev, Muhtar Shahanov, Kúlásh Ahmetova, Aqberen Elgezek, Qalqaman Sarın, Almas Temirbaı syndy lırıkterdiń óleńderin jatqa soǵady. Eń qyzyǵy, osy óneri joldasy Aıdynmen tanysýyna sep bolypty. Olganyń «TıkTok» jelisindegi paraqshasynda keshkilik poezııa saǵatyn ótkizip otyrǵanyn keziktirip qalǵan Aıdyn kilt toqtap qalady. Talantyna tańyrqap qalǵan ol paraqshasyn uzaq ýaqyt baqylap júrip, sezimin bildirse kerek.
Jan-jaqty Olga – qoǵam belsendisi. «Otan orda» Qaraǵandy qoǵamdyq birlestiginiń múshesi. Merekelik konsert júrgizedi. Teatrlarda óleń oqıdy. Kásibı sheberligi sondaı, Astanada ótetin aýqymdy is-sharalarǵa da shaqyrtý alady.
Qazir joldasy ekeýi otbasylyq kásipti dóńgelentip otyr. Otaǵasy Aıdyn – júk kóliginiń júrgizýshisi. Únemi alys saparlarǵa shyǵady. Al Olga – logıstıka salasynyń mamany. Tapsyrys qabyldap, barlyq qujatyn zańdastyryp, tabysyn eseptep ári eselep otyrady.
Ekeýi ata-analarynyń aq batasymen enshisin alyp, qalaǵa qonys aýdarady. Biraq qoldary qalt etse qaladan qashyp, aýylǵa qaraı jol tartady. Ata-analarynyń mahabbatyna shóldeıdi. Aýylǵa bara salysymen qazan kóterip, et asyp, baýyrsaq, shelpegin pisiredi. Ata-enesi jaqsy kóretin tátti bálishterin daıarlap, dastarqanyn toltyrady. As úıdiń sharýasyna da pysyq Olga «enem ekinshi anama aınaldy» deıdi.
– Anamnan erte aıyrylǵandyqtan, úlkenniń jan jylýyn ańsaımyn. Enem Nazıra az ýaqyttyń ishinde aqylshyma, qamqorshyma, syrlasyma aınaldy. Bilmegenin úıretedi. Joldasym ekeýmiz aýylǵa asyǵamyz. Asa qatty alańdamaıtynymyz, qoldarynda abysynym bar. Biz qaladan barǵan saıyn emen-jarqyn sóılesip bir qýanyp qalamyz. «Atańa ne qylsań, aldyńa sol keledi» degen sóz bar emes pe? Sol sebepti ata-anamyzdyń qadirin bilýden basqa biz úshin uly mindet joq, – deıdi Olga.
Qaraǵandy oblysy
