Foto: bbc.com
Túnde qala men oblys aýmaǵyna ýkraınalyq ushqyshsyz ushý apparattary (drondar) soqqy jasaǵan. Tańerteń Lenıngrad oblysynyń gýbernatory Aleksandr Drozdenko óńir aýmaǵynda 59 dron atyp túsirilgenin habarlady. Eń iri soqqylardyń biri Peterbýrg munaı termınalyna tıgen. Bul shabýyldy Ýkraına prezıdenti Vladımır Zelenskıı rastaǵan. Dál osy kúni qalada halyqaralyq ekonomıkalyq forým bastalǵan, oǵan túrli elderden qonaqtar kelgen.
Peterbýrgtiń «Býmaga» basylymynyń habarlaýynsha tún ishinde qala turǵyndary áýe qorǵanys júıesiniń (PVO) jumysyna uqsas dybystardy estigenin. Qala ortalyǵy men teńizge jaqyn aýdandardan munaı termınaly mańynda tútin kóterilgeni baıqalǵan.
Ýkraınalyq drondar Ekaterınbýrg pen Chelıabınskige shabýyl jasady
Bul nysan Baltyq óńirindegi eń iri munaı tasymaldaý termınaldarynyń biri sanalady. Onyń aýmaǵy 37 gektardy quraıdy, 32 rezervýary bar jáne jyldyq ótkizý qýaty 12,5 mln tonnaǵa jetedi.
Tańerteńnen beri Peterbýrg turǵyndary syrtta jaǵymsyz ıis sezilgenin aıtyp shaǵymdanǵan. Reseıdiń Tótenshe jaǵdaılar mınıstrligi shamamen tańǵy 5-te dron qaýpi jarııalanǵanyn, al 8-ge qaraı áýe dabyly alynǵanyn habarlady.
Sankt-Peterbýrg gýbernatory Aleksandr Beglov Kronshtadt, Kırov jáne Krasnoselskıı aýdandarynda ınfraqurylym nysandaryna shabýyl jasalǵanyn málimdedi. Al Lenıngrad oblysy ákimshiligi Lýjskıı aýdanynda dron qaldyqtary qulap, tórt jeke turǵyn úıdiń azdap zaqymdanǵanyn habarlady. Resmı málimetke sáıkes, birneshe adam jaralanǵan, qaza tapqandar joq.
Pýlkovo áýejaıy shamamen bes saǵat jumysyn toqtatqan: keıbir reıster keshiktirilip, keıbiri basqa áýejaılarǵa baǵyttalǵan. Qala boıynsha mobıldi ınternettiń jumysy da ishinara buzylǵan.
«Fontanka» basylymynyń jazýynsha, kýágerler turǵyn úı keshenderiniń birinde zaqym kelgen ǵımarattyń vıdeosyn kórsetken, biraq naqty qaı keshen ekeni aıtylmaǵan. Sondaı-aq onyń qala ishinde me, álde oblysta ma ekeni belgisiz. Basylym málimetinshe, basqarýshy kompanııa ókilderi úı qabyrǵasyna dron bólshegi tıgenin rastaǵan jáne turǵyndarǵa evakýasııalyq pýnktke, mektepke barý usynylǵan.
Basqa turǵyndar drondardyń úılerdiń ústimen ushqanyn, adamdardyń jerasty parkıngterine jasyrynǵanyn aıtqan. Kópshilik tún boıy jarylystar estilgenin, uıyqtamaǵanyn jazǵan. «Úı dirildep turdy, ıt vannaǵa tyǵyldy», – dep jazǵan kýágerlerdiń biri.
