Sýretti túsirgen – Erlan OMAR, «EQ»
Sıfrlandyrý jyly aıasynda jasandy ıntellekt elementterin qoldaný arqyly júzege asyrylǵan is-sharany Aıdar esimdi jasandy ıntellekt júrgizdi. Jekpe-jek saraıynyń alańynda ótken mádenı-sporttyq baǵdarlamaǵa bir mezette 3000 bala qatysyp, saqa ıirip, asyq oınady. Qatysýshylar aldymen arnaıy qoıylym arqyly sap túzep, asyqtyń «Alshy» pishini men «Altyn saqa» sózin beıneledi. Mýzykalyq súıemeldeýmen balalar túrli bı elementterin oryndap, fleshmobtyń kórkemdik mazmunyn asha tústi.
Fleshmobtan keıin jasandy ıntellekt barlyq bilim uıymdary – balabaqshalar men mektepterde asyq oıynyn resmı ashyq dep jarııalady. Osy sátte jasandy ıntellektiniń belgisimen elordanyń mektepteri men balabaqshalarynda bir mezette 15 000-nan astam bala asyq oıynyn bastady.
Osylaısha, is-shara aıasynda jalpy sany 18 000-nan astam bala ulttyq asyq oıynyna qatysty. Igi is-sharanyń negizgi maqsaty – asyq oıynyn nasıhattaý, tárbıelik mánin túsindirip, jas urpaqtyń ulttyq sportqa degen qyzyǵýshylyǵyn arttyrý.
