Sımpozıýmda Altyn Ordanyń tarıhı murasy, onyń memlekettiliktiń damýyna, dıplomatııalyq qatynastarǵa, mádenı almasýǵa jáne ortaq eýrazııalyq keńistiktiń qalyptasýyna tıgizgen yqpaly máseleleri qarastyryldy. Erekshe nazar Uly dala halyqtarynyń tarıhı-mádenı murasyn saqtaý men nasıhattaýǵa aýdaryldy.
Mádenı máni joǵary jıynda Tatarstan Respýblıkasy Mádenıet mınıstri Irada Aıýpova Qazaqstan men Tatarstan arasyndaǵy joǵary deńgeıdegi yntymaqtastyqty atap ótip, túrki halyqtarynyń tarıhı ortaqtyǵy men kópǵasyrlyq baılanystaryn erekshe atap kórsetti.
«Yntymaqtastyqtyń joǵary deńgeıi qalyptasqan Qazaqstan men Tatarstan – túrki halyqtarynyń taǵdyrlarynyń kópǵasyrlyq toǵysýyna negizdelgen órkenıettik sıntezdiń biregeı úlgisi. Munyń kóp bóligi Shyǵys pen Batysty baılanystyrǵan negizgi tarıhı torap qyzmetin atqarǵan Altyn Orda murasymen baılanysty. Orda keń aýmaqtardy biriktirgen turaqty saıası júıe qalyptastyrdy – onda ortalyqtandyrylǵan basqarý aımaqtardyń keń aýqymdy avtonomııasymen ushtasqan», dep atap ótti ol.
Sımpozıýmǵa qatysýshylar Altyn Orda murasyn zertteýdiń qazirgi gýmanıtarlyq ǵylymdardy damytý, halyqaralyq ǵylymı yntymaqtastyqty nyǵaıtý jáne ortaq mádenı-tarıhı qundylyqtardy halyqaralyq deńgeıde ilgeriletý úshin mańyzdy ekenin atap ótti.
Aıta keteıik, Astanada ótken halyqaralyq sımpozıýmǵa 20-dan astam elden delegasııa keldi.
