Foto: Aqorda
Memleket basshysy Qasym-Jomart Toqaev alyp ımperııanyń negizgi qýaty memlekettik basqarý júıesinde bolǵandyǵyna toqtaldy.
«Joshy ulysynyń dáýirlep turǵan kezdegi aýmaǵy 6 mıllıon sharshy shaqyrymdy alyp jatty. Tipti, Rım ımperııasynyń eń aıbyndy kezeńinde mundaı jer kólemi bolmaǵan. Keıbir tarıhshylardyń pikiri boıynsha, Altyn Ordanyń Dala Rımi dep atalýy da – osydan. Biraq alyp ımperııanyń qýaty jeriniń kóleminde emes, onyń ınstıtýsıonaldyq negizi, ıaǵnı, memlekettik basqarý júıesiniń myqty bolýynda edi», dedi Qasym-Jomart Toqaev.
Prezıdent Altyn Orda dáýirinde dala dástúrli quqyǵy men ıslam quqyǵynyń úıleskenin, sondaı-aq «Uly jasaq» zańy men Túrik qaǵanatynyń quqyqtyq mádenıeti qoǵamdyq tártiptiń negizin qalaǵanyn jetkizdi.
«Joshy urpaqtary Han nemese Gabsbýrg dınastııalary sekildi ǵasyrlar boıy, ıaǵnı, 600 jyldan astam ýaqyt Uly dala tósindegi túrli memlekettik qurylymdarǵa bılik júrgizdi. Bul Joshy hannyń urpaqtary qurǵan memleket júıesi turaqty ári ómirsheń bolǵanyn kórsetedi. Sonyń arqasynda ártúrli etnos pen din ókilderi tatý-tátti ómir súrdi. Altyn Orda dáýirinde Dala zańy men ıslam quqyǵynyń úılesimdi júıesi qalyptasty. Al qoǵamdyq tártip qaǵıdatynyń bastaýynda Túrik qaǵanatynyń quqyqtyq mádenıeti men Shyńǵys hannyń «Uly jasaq» zańy turdy. Zań ústemdik qurǵan alyp ımperııanyń ár túkpirinde adamnyń jáne onyń mal-múlkiniń qaýipsizdigi tolyq qamtamasyz etildi. Bul – qoǵamdyq tártip boldy degen sóz», dedi Prezıdent.
Sondaı-aq, Qasym-Jomart Toqaev elimiz IýNESKO-nyń qoldaýymen kóptegen mańyzdy jobany júzege asyrǵandyǵyn atap ótip, tarıhqa ádil ári saıası turǵydan beıtarap baǵa berý kerektigin aıtty.
