Kollajdy jasaǵan – Qonysbaı ShEJIMBAI, «EQ»
Jik-japar sálemdesýine ońdy jaýap qaıtarmadym. О́ıtkeni onymen sońǵy ret, osydan, jańylmasam, jeti jyl buryn kezdesken sáttegi kórinis eske túsip, sodan kóńilim joq jerden «qyrsyǵyp» qalmasy bar ma?.. Kóńil degen buzylǵysh ári qaı-qaıdaǵyny umytpaı eske salǵysh zerek qoı. Qaıtemiz endi?
Tarata aıtsam, álgi kórinistiń sıpat-máni – bir jolyǵysqan kezde yqylaspen amandasqanyma ol jóndi jaýap qaıtarmaı, kóńilim qalyp qoıǵan-dy. Dáliregi, talaı jyl jaqsy, etene qatynastaǵy, árdaıym túzý sálemdesip júretin, bııazy minezdi jigit qolyn ázer usynyp, kisimsip, kirjıip, shekeden qarap mańyzdy bola qalǵan. Mundaıdy kútpegenmin. Ish tartyp qaldym. Biraq zamatta kiná artpaı, kóńil-kúıi bolmaı turǵan shyǵar dep qoıǵanmyn (Bul kezdesýden keıin araǵa jyldar salyp betpe-bet kórip turǵanym osy). Sóıtsem, olaı emes, shyndaǵany eken. Men ańǵarmappyn, ol «maıly jilikti» qyzmetke turyp, sodan áleýmettik mártebesi kóterilip, aınalasy birer aıdyń ishinde keshegi ortasynan jerinip, «joǵary qaýym» arasyna enip ketipti. Nesibesi shyǵar.
Onyń bolmysyndaǵy, tirshiligindegi bul ózgeris rııasyz peıilge súıengen kópjyldyq aralas-quralastyqqa, jarasymdy qatynasqa syna qaǵyp tastady. Kúni keshe ǵana joq-juqana júrgen jigit birden dáýirlep, japandy jalpaǵynan basyp shyǵa kelgen. Janyna adam jaqyndaý qıyn. Bildeı úlken mekeme bastyǵynyń alǵashqyda shabarmany, odan keıin sol qoly, kóp ótpeı oń qoly boldy. Ájeptáýir bılik, onyń kóldeneń tabysy qoısyn ba, az ǵana ýaqyttyń ishinde jony kújireıip, qarny shyǵyp, taltańdaǵan baı-shonjarǵa aınalǵan. Nóker ertip júredi. Beti jyltyrap, syqııa kıinip alyp gazet-jýrnaldan, teledıdardan aragidik bolsa da kórinip qoıady. Baıaǵy bııazy, qarapaıym dep júrgen tanys jigit osylaısha mańyzdy tulǵaǵa aınalǵan-dy.
Rasynda, kúni keshe túkirigi jerge túspeı, shirenip, shikireıip, tákapparlanyp, kisimsip, beti jyltyrap, bárine shekeden qarap, taý qoparǵandaı bolyp júrgen adamdy kóshede kenetten olpy-solpy, elpeńdegen keıipte kórseń, tańyrqap qalasyń ǵoı.
Jaqyn mańdaǵy dámhanaǵa kirip, shaı ishtik. О́tken-ketkendi aıttyq. Kózge tike qaraı almaıdy. Janary taıqyp kete beredi... Áńgimesine qaraǵanda, jeti jyldan asa jelpingen, sodan «urylyp», aldyńǵy toptan shettegen, jıǵan-tergeninen túk qalmaǵan. Endi kúnkóris qamymen adam tasyp júr: taksı júrgizýshisi.
Qoshtasar sát jaqyndaǵanda ol maǵan bylaı dedi: «Kezinde qyzmettiń býyna ekilenip, esirip ketkenime áli kúnge yńǵaısyzdanamyn. Keshirińder meni. Janyńnyń tabıǵı shynaıy kelbetinen eriksiz ajyrap, áldebir kisápir rólde oınap qalaı ómir súrgenimdi qazir túsinbeımin. Muny uıat ári azap dese de bolar. Solaı... Shynaıy bolmysymdy qapasqa qamap, qaıdaǵy bir qalypqa ózimdi qınap salǵanym aqymaqtyq bolypty», dedi. Osyny aıtqan kezde baıaǵy, rııasyz peıilmen aralasatyn kezdegi onyń jaıdary júzin anyq kórdim.
Biz qushaq aıqastyra qoshtastyq. Bul shyn máninde, qoshtasý emes bógde bolyp ketken eski tanysymmen qaıta qaýyshý, onymen úzilip qalǵan syılastyq jolyn qaıta jalǵaý edi.
Qoǵam birligi adamı qatynastyń buzylmaýyna, ózara meıirimge táýeldi.
