Ekıpaj «Kanaveral múıisi» atty ǵarysh aılaǵynan attanbaqshy. Alaıda bul joly ǵaryshkerler Aı betine qonbaıdy. Mıssııa baǵdarlamasyna sáıkes, olar Aıdy aınalyp ushyp, shamamen on kúnnen keıin Jerge oralady. Al Aıǵa tikeleı qoný 2028 jylǵa josparlanǵan. Budan keıin NASA Aı betine turaqty ekspedısııalar uıymdastyryp, arnaýly baza salýdy kózdep otyr.
Seısenbi kúni ótken sońǵy brıfıngte agenttik ókilderi ushýǵa tolyq daıyn ekenin málimdedi. Eger aýa raıy qolaıly bolyp, tehnıkalyq aqaýlar tirkelmese, «Space Launch System» zymyran-tasyǵyshy men «Orıon» kemesi belgilengen ýaqytta kókke kóteriledi. Al alǵashqy talpynys sátsiz bolsa, aldaǵy alty kún ishinde qaıta ushyrady.
Ǵarysh baǵdarlamasynyń saıası jáne strategııalyq mańyzy da joǵary. Saıası sarapshy Bernd Debıýssman aıtýynsha, Donald Tramp atalǵan joba arqyly prezıdenttik bedelin arttyryp, ǵaryshtyq básekede upaıyn túgendep almaqshy. «Buǵan qosa ǵalymdar Aı topyraǵynda paıdaly qazbalardyń baryn anyqtady. AQSh oǵan birinshi qol jetkizgisi keledi. Qazir onyń basty básekelesi – Qytaı», deıdi sarapshy.
Burynǵy NASA basshysy Shon O’Kıf te osy pikirdi qýattaıdy. Onyń saraptaýynsha, Aıda gelıı-3 ızotopynyń mol qory bar. Bul bolashaqta termoıadrolyq energetıkanyń negizgi otynyna aınalýy yqtımal. Sonymen qatar lıtıı, platına sekildi sırek metaldar da kezdesedi. Qazirgi naryqta bul resýrstar boıynsha Qytaıdyń yqpaly basym ekeni belgili.
Aıta keteıik, adamnyń tabany Aı betine alǵash ret 1969 jyly Apollon-11 mıssııasy barysynda tıgen edi. Sol kezde amerıkalyq ǵaryshker Nıl Armstrong adamzat tarıhynda tuńǵysh ret Jer serigine jol tartqan adam boldy.
