Foto: Ashyq derekkóz (arhıv)
Aıyppuldardy joıý jáne boryshtyq júktemeni azaıtý
Depýtattyń aıtýynsha, zań jobasynyń basty maqsattarynyń biri – qylmystyq saıasatty izgilendirý jáne alǵashqy ákimshilik raqymshylyq aıasynda halyqtyń boryshtyq júktemesin azaıtý.
Balabıevtiń sózinshe, Ákimshilik quqyq buzýshylyq týraly kodekste ýákiletti organdar shyǵarǵan ákimshilik jaza qoldaný týraly qaýlylardyń oryndalýyn toqtatý tártibin retteıtin normalar qarastyrylǵan.
Elimizde sottalǵan azamattardyń qanshasy raqymshylyqqa iligedi?
Sonymen qatar, «Atqarýshylyq is júrgizý jáne sot oryndaýshylarynyń mártebesi týraly» zańda raqymshylyq aktisi qoldanylǵan jaǵdaıda atqarýshylyq is júrgizýdi toqtatýǵa negiz bolatyn normalar bar.
«Bul normalar azamattarǵa sot oryndaýshysyna júginbeı-aq múlik pen bank shottaryna qoıylǵan shekteý sharalaryn alyp tastaýǵa múmkindik beredi. Budan bólek, atqarýshylyq is júrgizý raqymshylyq aktisi negizinde toqtatylǵan jaǵdaıda azamattar atqarýshylyq sanksııalar men jeke sot oryndaýshysynyń qyzmetine tólenetin qosymsha shyǵyndardan bosatylady», dep atap ótti depýtat.
Onyń aıtýynsha, usynylyp otyrǵan ózgerister rásimdi jeńildetip qana qoımaı, azamattardyń qarjylyq júktemesin de edáýir azaıtady.
Qazaqstanda kimderdiń ákimshilik jazalary tolyqtaı keshiriledi?
Qylmystyq-atqarý júıesinde qandaı ózgerister kútiledi?
Balabıev zań jobalaryn qabyldaý qylmystyq-atqarý salasyndaǵy birqatar júıeli máseleni sheshýge múmkindik beretinin de aıtty.
Atap aıtqanda, raqymshylyqqa ilikpeıtin adamdardy ustaý jaǵdaılaryn jaqsartý, mekemelerdegi turmystyq jáne materıaldyq-tehnıkalyq qamtamasyz etýdi, sondaı-aq medısınalyq-sanıtarlyq jaǵdaılardy jetildirý kózdelip otyr.
Sonymen birge, bosaıtyn bıýdjet qarajatyn qylmystyq-atqarý júıesin damytýǵa jáne jazany oryndaýdyń halyqaralyq standarttaryn engizýge baǵyttaý josparlanǵan.
Raqymshylyq – quqyq buzýshylyqtyń aldyn alý quraly
Depýtat raqymshylyqtyń tek quqyqtyq tetik qana emes, sonymen birge quqyq buzýshylyqtardyń aldyn alýdyń mańyzdy quraly ekenin atap ótti.
«О́z qateligin túsinip, túzelýge múmkindik alǵan adam qylmysty qaıta jasaýǵa azyraq beıim bolady», dedi ol.
Balabıevtiń aıtýynsha, raqymshylyq memlekettiń tek jazalaı alatynyn ǵana emes, sonymen qatar túzete alatynyn, quqyq buzýshylyqtardyń aldyn alyp, áleýmettik ádilettilikti qalpyna keltire alatynyn kórsetedi.
«Raqymshylyq – memlekettiń álsizdigi emes, zańnyń tek jazalap qana qoımaı, túzetýge, aldyn alýǵa jáne áleýmettik ádilettilikti qalpyna keltirýge qabiletti ekenin ańǵartatyn kúshti memlekettiń kórinisi», dedi depýtat.
Ol qaralyp jatqan zań jobalary konstıtýsııalyq reformalardyń rýhyna, Ádiletti Qazaqstan qurý mindetterine jáne el azamattarynyń múddelerine tolyq sáıkes keletinin qosty.
