Foto: navstat.uz
Qazirgi tańda dollar shamamen 470 teńge deńgeıinde saýdalanyp jatyr, bul kórsetkish sońǵy 2 jylǵa jýyq ýaqyttaǵy eń tómen deńgeılerdiń biri. Sońǵy ret mundaı mejeler 2024 jyldyń jaz mezgiliniń bastapqy tusynda tirkelgen edi.
Ekonomıst Arman Baıǵanovtyń aıtýynsha, qazirgi jaǵdaı ımporttaýshylar úshin qolaıly bolyp otyr.
«Shetelden taýar ákeletin kásipkerler úshin qazirgi baǵam anaǵurlym tıimdi. Sondyqtan jappaı satyp alýdy osy kezeńde júrgizgen durys. Keıinge qaldyrylǵan áserdi eskersek, aldaǵy 1 aı ishinde ımporttyq taýarlar birneshe % shamasynda arzandaýy múmkin. Máselen, turmystyq tehnıka nemese kólikter baǵasy azdap tómendeýi yqtımal. Biraq 10-20% deńgeıinde aıtarlyqtaı quldyraý bolmaıdy», dedi sarapshy.
Mamandardyń pikirinshe, dollar baǵamynyń álsireýine Taıaý Shyǵystaǵy geosaıası ahýal tikeleı áser etken. Aımaqtaǵy shıelenis saldarynan Ormuz buǵazynyń ishinara jabylýy munaı baǵasynyń ósýine ákeldi, al bul óz kezeginde teńgeniń nyǵaıýyna yqpal etti.
Importqa táýeldilik áli joǵary: Elimiz qandaı kásibı jáne tehnıkalyq qyzmetterdi satyp alyp otyr?
Sarapshylar teńge baǵamyna tek syrtqy emes, ishki ekonomıkalyq ózgeristerdiń de áser etkenin aıtady. Atap aıtqanda, salyq saıasatynyń ózgerýi jáne bıýdjet kiristeriniń artýy ulttyq valıýtanyń turaqtylyǵyn kúsheıtýi múmkin.
Soǵan qaramastan, mamandar baǵa dınamıkasy turaqsyz bolýy yqtımal ekenin eskertedi. Eger Taıaý Shyǵystaǵy jaǵdaı turaqtanyp, munaı arzandasa, teńge de álsireýi múmkin.
Osylaısha, qazirgi jaǵdaıda ımporttyq taýarlar baǵasynyń azdap tómendeýi yqtımal, alaıda kúrt arzandaý kútilmeıdi.
