Foto: Mádenıet jáne aqparat mınıstrligi
Búginde «Daryn» syılyqtyń laýreattary sany 380 adamǵa jetti. Syılyq ıegerlerine laýreat ataǵymen birge, arnaıy dıplom, tósbelgi jáne 1 mıllıon teńge kóleminde aqshalaı syıaqy tabystalady.
Memleket basshysynyń bastamasymen 2021 jyldan beri jyl saıyn 3 mıllıon teńge kólemindegi «Táýelsizdik urpaqtary» granty beriledi. Grant jas qazaqstandyqtardyń tyń ıdeıalary men bastamalaryn qoldaýǵa baǵyttalǵan. Osy ýaqytqa deıin 153 jas atalǵan grantqa ıe boldy.
Mádenıet pen ónerge eńbek sińirip júrgen azamattar da memlekettik qoldaýdan tys qalǵan emes. Jyl saıyn mádenıet salasynyń 75 ókiline memlekettik stıpendııa taǵaıyndalady. Bıyldan bastap stıpendııa kólemi eki esege ulǵaıtylyp, 5 mıllıon teńgege jetti. Sonymen qatar Memleket basshysynyń tapsyrmasymen dástúrli ónerdi dáriptep júrgen ónerpazdarǵa «Asyl mura» ulttyq syılyǵy taǵaıyndalady.
Mádenıet jáne aqparat mınıstrligi halyqaralyq baıqaýlar men festıvalderdiń jeńimpazdary men júldegerlerin yntalandyrýdyń jańa tetikterin ázirlep jatyr. Josparǵa sáıkes, mýzyka, teatr, horeografııa men balet, beıneleý jáne sándik-qoldanbaly óner, sondaı-aq kıno jáne anımasııa salalary boıynsha syılyq ıegerlerin arnaıy saraptama komıssııasy aıqyndaıdy.
Qoǵamda daryndy jastardyń halyqaralyq deńgeıde tanylýyna da erekshe kóńil bólinedi. Otandyq stýdentter, magıstranttar, oqytýshylar men mádenıet salasynyń qyzmetkerleri «Bolashaq», Erasmus+, DAAD, Fulbright, Chevening jáne ózge de baǵdarlamalar arqyly bilim alyp, taǵylymdamadan óte alady.
Búginde «Kreatıvti ındýstrııa, shyǵarmashylyq jáne óner» baǵyty boıynsha «Bolashaq» baǵdarlamasynyń stıpendıattary Royal Conservatoire of Scotland, University of Reading, Stanford University jáne New York Film Academy sekildi jetekshi sheteldik joǵary oqý oryndarynda bilim alyp jatyr.
Sonymen qatar birqatar bedeldi halyqaralyq shyǵarmashylyq baıqaýlardyń jeńimpazdaryna granttar berilip, shyǵarmashylyq baǵyttaǵy joǵary oqý oryndaryna konkýrssyz túsý múmkindigi qarastyrylǵan. Oǵan mýzyka, vokal, balet, horeografııa jáne oryndaýshylyq óner salalaryndaǵy halyqaralyq deńgeıdegi jarystardyń jeńimpazdary qatysa alady.
Daryndy jastardy qoldaý tek memlekettik baǵdarlamalarmen ǵana shektelmeıdi. Bul baǵytta shyǵarmashylyq mektepter, festıvalder, baıqaýlar, bilim berý jobalary, qoǵamdyq jáne qaıyrymdylyq qorlar da belsendi túrde jumys atqaryp jatyr. Sonyń jarqyn mysaldarynyń biri – 2024 jyly qurylǵan BIRLIK kópultty án-bı ansambli. Irikteý qorytyndysy boıynsha ansambl quramyna Qazaqstandaǵy túrli etnos ókilderinen quralǵan 20 úzdik bıshi men mýzykant qabyldandy.
Jas talanttarǵa jańa múmkindikter usyný turǵysynda Kreatıvti ındýstrııalardy damytý qorynyń da róli erekshe. Qor daryndy jastardy anyqtaýǵa jáne qoldaýǵa, ınvestısııa tartýǵa, salalyq ınfraqurylymdy damytýǵa, sondaı-aq qazaqstandyq kreatıvti ónimderdi halyqaralyq naryqqa shyǵarýǵa kúsh salyp keledi.
Aıta keteıik, jyl saıyn shyǵarmashylyq baǵyttaǵy joǵary oqý oryndarynda bilim alýǵa 1000-nan astam, al kolledjderde oqýǵa 500-den astam grant bólinedi.
