Fot. Qala ákimdigi
Astana ákimdiginiń resmı saıtynyń málimetinshe, bıyl jarys jolyna 243 sheteldik jelaıaq shyqqan. Olar álemniń 30-dan astam elinen kelgen.
Sheteldik qatysýshylardyń eń kóbi Reseıden – 91 adam, О́zbekstannan – 28 jáne AQSh-tan – 17 adam. Sondaı-aq jarysqa Qytaıdan 15, Qyrǵyzstannan 14, Fransııadan 11, Ońtústik Koreıadan 6, Ulybrıtanııadan 6, Polshadan 5 jáne Germanııadan 5 adam qatysty. Jarys geografııasy Azııa, Eýropa, Soltústik jáne Ońtústik Amerıka, Afrıka, Taıaý Shyǵys pen Muhıt elderin qamtydy.
Jyl saıyn Astana Half Marathon álemniń ártúrli elderinen keletin qatysýshylar sanyn arttyryp keledi.
«Mundaı qyzyǵýshylyqtyń sebepteriniń biri – uıymdastyrý deńgeıiniń joǵary bolýy. Astana Half Marathon Halyqaralyq marafondar men júgirý jarystary qaýymdastyǵyna (AIMS) kiredi, al onyń baǵyttary World Athletics standarttaryna sáıkes sertıfıkattalǵan. Bul qashyqtyqtyń dáldigin jáne nátıjelerdiń ádildigin qamtamasyz etedi. Sondyqtan kóptegen tájirıbeli jelaıaq jeke rekordyn jańartý úshin Astanadaǵy jarysty tańdaıdy», deıdi «Birinshi bolý – batyldyq» korporatıvtik qory qamqorshylyq keńesiniń tóraǵasy Ǵalymjan Esenov.
Aıta keteıik, «Taza Qazaqstan» aksııasy sheńberinde jarys baǵyty boıynda jáne start-máre qalashyǵynda qoqystardy bólek jınaý oryndary jáne qatysýshylar men qonaqtarǵa arnalǵan ınteraktıvti ekologııalyq aımaqtar jumys istedi. EcoNetwork-pen seriktestik sheńberinde jınalǵan jaramdy qoqys qaıta óńdeýge jiberiledi.
«Astana Half Marathon jarysynyń basty ekologııalyq jańalyqtarynyń biri – PET 1 tańbasy bar, 100 paıyz qaıta óńdeletin plastıkten jasalǵan bir rettik staqandar. Olar barlyq tamaqtaný ornynda paıdalanylyp, jarys aıaqtalǵannan keıin ekologııalyq eriktiler qaıta óńdeýge jiberý úshin jınastyrdy.
Mundaı tájirıbe Qazaqstandaǵy buqaralyq júgirý jarystarynda alǵash ret engizilip otyr», delingen habarlamada.
Buǵan deıin Elordada marafonǵa baılanysty ondaǵan kóshe jabylatyn týraly habarlaǵan edik.
