Qaıǵyly oqıǵa Qazan qalasynyń mańynda, Arsk aýdanyndaǵy Qazanbash aýylynyń janynda bolǵan. Tatarstan boıynsha Reseı TJM Bas basqarmasynyń málimetinshe, qoldan jasalǵan jeńil motorly ushaq qulaǵan. Ushaqty basqarǵan pılot oqıǵa ornynda qaza tapqan.
Vedomstvonyń deregine sáıkes, marqum 57 jasta bolǵan. Ol avıasııa áýesqoıy retinde ushaqty óz betinshe jobalap, qurastyrǵan.
Qazir apattyń naqty sebepteri anyqtalyp jatyr. Oqıǵaǵa baılanysty Tatarstan kólik prokýratýrasy tekserý jumystaryn bastaǵan.
Aqtaý mańyndaǵy ushaq apaty: Qaza tapqandardyń týystaryna ótemaqy tólendi
REN TV málimetinshe, apatqa ushyraǵan áýe kemesi resmı tirkeýden ótpegen. Jeńil motorly ushaq Qazanbash aýylyndaǵy shaǵyn jeke aerodromda qurastyrylǵan.
Ushaqty tirkeý úshin jaqyn kúnderi arnaıy komıssııa kelýi tıis bolǵan. Alaıda onyń kelýin kútpegen áýe kemesiniń avtory ruqsatsyz ushýǵa shyqqan. Sonyń saldary qaıǵyly oqıǵa soqtyryp otyr.
