Sýret: islam.kz
Elý bes jyl buryn anam shyrqyraǵan janyn shúberekke túıgen eken. Qudaı taǵala Kemelbek moldaǵa darytqan keremet bolmaǵanda, bóbek kúıimde baqı dúnıege ozar ma edim?
Shańqaı tús. Mımyrt tynyshtyqty qaq jaryp, sharananyń ashy daýysy shyqty. Qol kúıdirer ystyq nandy tandyrdan úze bergen ana bala daýysyn jazbaı tanydy. Janushyra dýalǵa asylyp qarasa, qamys saraıdy uıalaǵan myń-san qyzyl ara jalańash bóbekti talap jatyr.Jalma-jan tandyr shoǵyn kósep alyp, tura júgirdi. Kórshi-qolań da jınalyp qaldy. Kóılektiń keń etegimen aralardy qaǵyp-qaǵyp, balany jaba qoıdy. Shoqtyń qyzýy men byqsyǵan tútinnen aralar bytyraı qashty. Ara ýyty lezde tarap, balanyń denesi kúp bolyp isindi. Úni shyqpaı qaldy.
– Bul qalaı? – dep abdyrady jurt. Bala domalanyp ketkende anasynyń kózi sharasynan shyǵa jazdady. Sábıden tirshilik belgisi sezilmedi.
Qaınysy Qarysbek «Moskvıchti» tizgindep, balany alyp aýdan ortalyǵyna tartty. Dárigerler:
– Qoldan keler qaıran joq. Ara ýyn qaıtaratyn em joq, – dedi. Úmit úzilgendeı boldy.
Aýylǵa qaıtqanda aýlada jurt jınalyp tur eken. Aqsaqaldar, keıýanalar kúbirlep duǵa oqyp tur. Balany salqyn úıge kirgizip, aıran toly ydysqa jatqyzdy. Kesh túse aýlaǵa aıaǵyn syltyp basqan Segizbaı molda keldi. Kózi qantalap, óńi buzylyp, ne isterin bilmeı alasurǵan Joshy birese úıge kirip, birese qaıta shyǵyp, meń-zeń kúı keship júr edi. Segizbaı molda jaqyndap keldi de, beımaza inisiniń arqasyna taıaǵyn salyp-salyp jiberdi.
– О́zińdi usta! – dedi zildi únmen.
Sonda ǵana Joshy selk etip, esin jıǵandaı boldy. Kózine jas úıirilip, balasyna qaraı umtyldy.
– Balany Kemelbek moldaǵa aparyńdar, – dedi.
Kemelbek molda – el ishinde qasıetimen tanylǵan jan. «Nurnama» – babamyz Búrkitten qalǵan emdik duǵalar men Quran aıattary jazylǵan kóne jınaqty qyryq jyldan beri kóziniń qarashyǵyndaı saqtap keledi. Sol túni balany moldanyń aldyna ákeldi. Kúp bop isingen kishkentaı keýdege qulaq tosyp, únsiz otyrdy.
– Sabyr qylyńdar, – dedi birazdan soń. Joshy tistenip tursa da, qolynan eshteńe kelmeıtinin alǵash ret anyq sezdi.
Sosyn dáret alyp, namazǵa turdy. Úı ishi túnerip, tynyshtyq ornady.Kóp uzamaı kúbirlegen duǵa úni kúsheıe tústi. Syrtta jel turyp, Shaqataryq boıyndaǵy baqalardyń azan-qazany údeı berdi. Bir sátte tereze tars ashylyp, beıne alyp aıdahardaı ıreleń qaqqan myń-mıllıon ara úıge lap qoıdy. Qarańǵy bólmeni toltyrǵan myń-mıllıon ara bir sát bala ústinen aınala úıirilip, qaıtadan kirgen terezege qaraı tizilip, bir-birden ǵaıypqa sińe berdi. Bir kezde bári tynshydy.
Molda ornynan turyp, balany qolyna aldy.
– Qudaıdan tiledik. Endi úıge jetkenshe úsh ret qussa, aman qalady, – dedi.
Jol boıy bala úsh ret qusty.
Sol túni ajal aýzynan qalǵan edim. Keıin ákem sol túndi eske alǵanda, uzaq únsiz otyryp qalatyn.
Nurbaı JOLShYBAIULY
