Onyń aıtýynsha, qalalar men aýyldardy abattandyrýǵa, aýmaqtardy kógaldandyrýǵa árdaıym erekshe kóńil bólý qajet.
Memleket basshysy sondaı-aq ekologııalyq mádenıetti arttyrý máselesi de basym baǵyttardyń biri ekenin atap ótti.
«Ásirese týrıstik aımaqtar men tabıǵat aıasyndaǵy azamattardyń minez-qulqyna jiti nazar aýdarý mańyzdy. Qoǵamdyq tártipti buzatyndar, ıaǵnı vandaldar zańǵa sáıkes jaýapqa tartylýy tıis. Bir sózben aıtqanda, biz quqyqtyq nıgılızmge búkil qoǵam bolyp qarsy turýymyz kerek. Zań men tártipti qurmetteý – jazadan qorqý emes, eń aldymen jaýapkershiligi joǵary azamattarǵa tán qasıet. Muny durys túsiný qajet», dedi Qasym-Jomart Toqaev.
Prezıdenttiń sózinshe, álemde áskerı qaqtyǵystar kóbeıgen qazirgi turaqsyz kezeńde Qazaqstan úshin beıbitshilik pen turaqtylyq asa mańyzdy.
«Onsyz qandaı da bir reformalar men oń ózgerister bolmaıdy. Sondyqtan quqyq qorǵaý organdary quqyq buzýshylyqtarǵa qatysty qatań sharalar men jazalardy qoldanýy kerek. Bizdiń elimizdi unatpaıtyn ári mensinbeı qaraıtyn keıbir adamdar, ókinishke qaraı olardyń arasynda Parlament depýtattary da bar, zań ústemdigin qamtamasyz etýge baǵyttalǵan áreketterimizdi «shtrafstan» nemese «Aıyppulstan» dep ataıdy. Meıli, óz oılarynyń kelteligin kórsete bersin. Al halyqymyzǵa qoǵamdyq tártip pen qaýipsizdik kerek», – dedi Memleket basshysy.
Osy joldan taımaı, «Zań men tártip» saıasatyn batyl túrde jalǵasyn tabýy kerek. Sebebi bul – halyqymyzdyń talaby. Osy máselege búkil qoǵam da, ákimder de erekshe nazar aýdarý kerek dedi prezıdent.
