Batys Qazaqstan oblysynda balalardyń jazǵy demalysyn uıymdastyratyn mekemelerdiń qyzmetkerlerin tekserý kezinde birqatar zań buzýshylyqtar anyqtaldy.
Polısııa qyzmetkerleri bilim basqarmasy usynǵan qyzmetkerler tizimin zerdeleý nátıjesinde segiz adamnyń buryn qylmystyq jaýapkershilikke tartylǵanyn anyqtaǵan. Sonymen qatar taǵy bes adamnyń ákimshilik quqyq buzýshylyq jasaǵany belgili boldy.
Atalǵan materıaldar zańǵa sáıkes shara qabyldaý úshin quzyrly organdarǵa jiberildi.
BQO polısııa departamenti qoǵamdyq qaýipsizdik basqarmasynyń aǵa ınspektory Alısher Ýtegenovniń aıtýynsha, tekserý lagerler jumysyn bastamaı turyp júrgizilgen.
Onyń sózinshe, bilim basqarmasy usynǵan tizimder negizinde qyzmetkerlerdiń qylmystyq jáne ákimshilik jaýapkershilikke qatysy bar-joǵy mindetti túrde tekseriledi.
Bıyl óńirde 16 qala syrtyndaǵy lager, 500 mektep janyndaǵy demalys alańy jáne 7 shatyrly lager balalardy qabyldaı bastady.
Polısııa departamenti balalardyń qaýipsizdigi vedomstvo basshylyǵynyń erekshe baqylaýynda ekenin atap ótti.
