Memleket basshysy Alataý sıfrlyq aktıvterdi jedel damytý jáne eldiń jańa qarjy arhıtektýrasyn qurýdyń strategııalyq alańyna aınalýǵa tıis ekenin aıtty.
«Qazaqstan qarjy naryǵy qarqyndy transformasııa kezeńinde tur deýge bolady. Elimizde jarııalanǵan Sıfrlandyrý jáne jasandy ıntellekt jyly fınteh ındýstrııasyn damytýǵa yqpal etedi. Bul oraıda Alataý álemniń osy bóligindegi tuńǵysh krıptoqala retinde mańyzdy ról atqarady. Osy salany damytý úshin qysqa merzimde artyq kedergilerdi joıyp, jańa qarjy quraldaryn iske qosý qajet. Sıfrlyq aktıvterdiń naqty quqyqtyq mártebesin bekitip, krıptoaktıvti múlik retinde taný kerek. Bul júıede sıfrlyq teńge negizgi ról atqarady.
Prezıdent: Alatau City alǵashqy tolyq sıfrly qala bolady
Halyqaralyq tanymal ortalyqtarmen tabysty básekege túsý úshin Alataý qalasynda sıfrlyq aktıvter operasııasyna jáne jergilikti ıýrısdıksııada kapıtaldyń ósýine nóldik mólsherleme belgilenip, tıisti quqyqtyq jaǵdaı jasalýy qajet. Ekonomıkanyń naqty sektorlaryn, sonyń ishinde jyljymaıtyn múlikti, ınfraqurylym nysandaryn, shıkizat aktıvterin tokenızasııalaý jobasyn júzege asyrýdy jedeldetken jón. Bul ornyqty jáne suranysqa ıe sıfrlyq quraldar naryǵyn qalyptastyrýǵa múmkindik beredi. Osy oraıda tranzaksııalardy sıfrlyq ıdentıfıkasııalaý jáne ashyq monıtorıngteý negizinde qaýipsizdik pen ınvestısııalyq tartymdylyq teńgerimin qamtamasyz etetin baqylaý júıesin iske qosý qajet.
Iаǵnı tutastaı alǵanda Otanymyzdyń túbegeıli jańa ári sapaly órkendeýi týraly sóz bolyp otyr. Biz elimizdi qarjylyq turǵydan damytý jáne transformasııalaý salasynda belgili bir deńgeıde revolıýsııa jasap jatyrmyz», dedi Prezıdent.
Toqaev sonymen qatar Alatau Smart-City salý mindetteri men óńirdegi naqty áleýmettik-ekonomıkalyq jaǵdaı arasynda qarama-qaıshylyq aıqyn baıqalatynyn atap ótti.
«Negizgi ınfraqurylymnyń ozyq damýy. Qalaǵa qosylǵan eldi mekenderdiń (Jetigen, Qoıanqus jáne taǵy basqalar) turǵyndary turmysqa qajetti qarapaıym jaǵdaıdyń jasalmaǵanyn aıtady. Elektrdiń jıi óshýine qatysty aryz-shaǵymnyń kóptigin bylaı qoıǵanda, turaqty ınternettiń, sapaly joldyń, ortalyqtandyrylǵan sýdyń joqtyǵyn alǵa tartady. Mundaı problemalar oblystyń barlyq aýmaǵynda bar. Máselen, 2025 jyly elektr jelisiniń tozýy 70 paıyzǵa jýyqtap, sonyń saldarynan elektr qýatynyń óshirilýi 919 ret, al jyl basynan beri 201 márte tirkelgen. Qalanyń jańa aýdandarynda ınjenerlik kommýnıkasııa tartý jumystary áli kúnge deıin jobalaý satysynda qalyp otyr. Úsh qosalqy stansııany jóndeý jáne sý alý qondyrǵysynyń qýatyn arttyrý jobalary belgilengen kesteden keshigip jatyr.
Qasym-Jomart Toqaev: Alataý jobasyna qatysty zańnamalyq jumys jyldam júrgizilýge tıis
Alatau Smart-City salý mindetteri men óńirdegi naqty áleýmettik-ekonomıkalyq jaǵdaı arasynda qarama-qaıshylyq aıqyn baıqalady. Muny ashyq aıtaıyq. Bul jaǵdaıdy Premer-mınıstrdiń orynbasary Qanat Bozymbaevtyń, sonymen qatar, ákim Marat Sultanǵazıevtiń tarapynan jiberilgen olqylyq dep sanaımyn. Jalpy, jańa energııa qýaty kózderin keńeıtý men iske qosý qajettigi – eldik deńgeıdegi másele. Mamandardyń basym bóligi energııa tapshylyǵy máselesiniń negizgi sheshimi jańa generasııany iske qosý dep biledi. Pikirtalastyń barlyǵy eki aspektige – qansha jáne qandaı elektr stansııalaryn salý qajet degen saýalǵa kelip tireledi. Biz qashanda talqylaýǵa daıyn turamyz. Biraq qazirgi ýaqytta elimiz energııany qanshalyqty kóptep joǵaltyp otyr degen negizgi saýaldy eshkim qozǵamaıdy», dedi Memleket basshysy.
