Dúnıejúzilik qorshaǵan ortany qorǵaý kúni qarsańynda elimizdiń barlyq óńirinde «Taza Qazaqstan» naýqany aıasynda ekologııalyq aksııalar ótýde. Prezıdent Qasym-Jomart Toqaev bastamashylyq etken jalpyulttyq joba nebári eki jyldyń ishinde elimizdiń qalalary men aýyldaryn abattandyrýǵa ári kógaldandyrýǵa baǵyttalǵan buqaralyq qoǵamdyq qozǵalysqa aınaldy.
Buǵan qosa «Taza Qazaqstan» qundylyqtary eń joǵary konstıtýsııalyq mártebege ıe boldy. Atap aıtqanda, jańa Ata Zańnyń preambýlasynda alǵash ret tabıǵatty aıalaý qajet ekeni naqty kórsetilgen. Al Qazaqstan Respýblıkasy qyzmetiniń negiz quraýshy qaǵıdattary qatarynda jaýapty ári jasampaz otanshyldyq ıdeıasyn ilgeriletý jáne joǵary ekologııalyq mádenıetti qalyptastyrý mindeti belgilendi.
«Taza Qazaqstan» jobasy «Zań jáne Tártip» qaǵıdatymen ári «Adal azamat» baǵdarlamasymen qatar jańa qoǵamdyq etıkany qalyptastyrýdyń mańyzdy quraly bolyp sanalady. Sol sebepti Memleket basshysy óziniń sóılegen sózderinde jaýapkershilikke, sanalylyqqa, quqyqtyq tártipti saqtaýǵa, eń bastysy otansúıgishtikke negizdelgen minez-qulyq modelin ornyqtyrý men ilgeriletýdiń mańyzdylyǵyna erekshe nazar aýdarady.
Jaýapty ári jasampaz otanshyldyq ár azamattyń aınalasyndaǵy tazalyq pen tártipti saqtaýynan, tabıǵatqa janashyrlyqpen qaraýynan jáne vandalızmge qarsy kúresinen bastalady.
Eki jyl ishinde «Taza Qazaqstan» jobasy aıasynda naqty nátıjelerge qol jetkizildi. El boıynsha shamamen 6,5 mıllıon adamnyń qatysýymen 1,5 myń ekologııalyq is-shara ótkizildi. Sonyń ishinde eń aldymen jastardyń belsendiligin erekshe atap ótý qajet. Belsendi azamattardyń uıytqy bolýymen 2 mıllıon tonna qoqys jınalyp, shamamen 5,5 mıllıon aǵash otyrǵyzyldy. Sonymen qatar elimizge kelgen memleket basshylarynyń, tanymal óner qaıratkerleri men sportshylardyń «Taza Qazaqstan» jobasyn qoldap, aǵash otyrǵyzýy ıgi dástúrge aınaldy.
Osylaısha, Qazaqstan qoǵamdyq birlikti kúrdeli ári abstraktili ıdeologııalyq tujyrymdamalar tóńireginde emes, barshaǵa túsinikti qarapaıym ári ámbebap qundylyqtar negizinde qalyptastyrýǵa bolatynyn aıqyn kórsetip, jańa úrdistiń negizin qalaýda.
Máselen, jýyrda Parlamentte saıası partııalardyń barlyǵy óz baǵdarlamalary men jarǵylaryna «Taza Qazaqstan» qaǵıdattaryn engizýi qajet ekeni týraly usynys aıtyldy. Túptep kelgende, bul – ıdeologııalyq jańǵyrýdyń irgetasy.
Osylaısha, «Taza Qazaqstan» jobasy keń qoǵamdyq qoldaýǵa ıe bolyp qana qoımaı, birtindep kúndelikti ómirimizdiń ajyramas bóligine de aınalyp keledi.
