Sýretti túsirgen – avtor
Áskerı oqýdy támamdaı sala ushaq tizgindegen ol áli kúnge deıin zeńgir kókten túsken joq. Qoly qalt etse, ózi qurastyrǵan paraplanyn otaldyryp, aspan áleminde qalyqtap júrýdi unatady. Saıası naýqanda da eldiń armany bıik bolsyn degen nıette bıikten kelip daýys bergen. Jolaı áńgimelesip kele jatqanymyzda kók aspanda qandaı jaýapkershilikti sezinseń, el erteńi úshin de solaı jaýaptysyń deıdi Qazaqstan qarýly kúshteriniń zeınettegi polkovnıgi Nıkolaı Petınsev. Bala jastan zeńgir kókte qalyqtaýdy armandaǵan ol zeınetke deıin áskerı ushaq tizgininen túspegen. Paraplanmen ǵana emes, parashıýtpen sekirýdiń de ákki sheberi. О́skemendegi parashıýtten sekirý klýbynyń negizin qalaýshy. Aıta bersek, atqarǵan eńbegi eren.
«О́mir boıy memleketke qyzmet ettim. Alpys úshke kelsem de, saıası naýqandardan qalmaımyn», deıdi Nıkolaı Petınsev.
Nıkolaıdyń aspanǵa degen qyzyǵýshylyǵy bala kezinen bastalǵan. Tipti bes jasynda-aq bolashaqta ushqysh bolamyn dep nyq senimmen aıtyp júripti.
Katonqaraǵaı aýdany Belqaraǵaı aýylynda týǵan ol 16 jasynda parashıýt sportymen aınalysa bastaıdy. 1978 jyly avıasııalyq-sport klýbynyń bazasynda alǵash ret parashıýtten sekirgen. Keıin Barnaýldaǵy áskerı ushqyshtar ýchılıshesine túsip, kásibı ushqysh atanady. Oqýyn aıaqtaǵan soń, «SÝ-24» ushaǵymen Aýǵanstanda jaýyngerlik tapsyrmalar oryndaǵan. Áskerı ushaqpen el shekarasyn kúzetken.
Bertinde N.Petınsev paraplanmen ushýǵa qyzyǵyp, jańa baǵytqa bet burady. Keıingi on jylda ol jerden góri aspanda kóbirek ýaqyt ótkizetinin aıtady.
Shyǵys Qazaqstan oblysy
