Is-sharaǵa QFF bas hatshysynyń mindetin atqarýshy Aleksandr Keplın, lısenzııalaý departamentiniń dırektory Erjan Musabekov, kásibı klýbtar jarystaryn uıymdastyrý dıreksııasynyń sport menedjeri Aıjan Kenjına, áıelder fýtboly bóliminiń menedjeri Natalıa Gorenko jáne Qazaqstan WU-17 qyzdar quramasynyń aǵa bapkeri Iýlııa Mamonova qatysty.
Jıyn barysynda Aleksandr Keplın ótken maýsymdaǵy ózgerister men áıelder fýtbolyndaǵy ósimdi atap ótti.
«Byltyr Qazaqstan fýtbol federasııasy áıelder arasyndaǵy el chempıonatyn jańartyp, 14 komandadan turatyn tolyqqandy lıgany iske qosty. Bıyl qatysýshylar sany 19 klýbqa deıin artty. Bul – eldegi áıelder fýtbolynyń damyp kele jatqanyn jáne chempıonatqa degen qyzyǵýshylyqtyń artqanyn kórsetedi», dedi ol.
Onyń aıtýynsha, ótken maýsymda kórermender rekordy da tirkelgen.
«О́tken maýsymda «Aqtóbe» men «BIIK-Shymkent» arasyndaǵy match Qazaqstan áıelder fýtboly tarıhyndaǵy kórermen sany boıynsha rekord ornatty. «Qobylandy batyr» atyndaǵy stadıonǵa shamamen 8,5 myń jankúıer jınaldy. Jańa maýsymda biz bul kórsetkishti kem degende qaıtalap, tipti jańartýdy josparlap otyrmyz», dedi Aleksandr Keplın.
«Tottenhemniń» burynǵy dırektory Qazaqstan fýtbol federasııasynyń bas hatshysy bolyp taǵaıyndaldy
Sondaı-aq ol ÝEFA-nyń Qazaqstandaǵy áıelder fýtbolyna degen qoldaýyn erekshe atap ótti.
«Sondaı-aq Qazaqstan áıelder fýtbolyna ÝEFA tarapynan kórsetilip otyrǵan nazardy erekshe atap ótkim keledi. Eýropalyq fýtbol uıymy Qazaqstanǵa áıelder arasyndaǵy halyqaralyq týrnırlerdi turaqty túrde ótkizýdi senip tapsyryp keledi. Olardyń qatarynda jasóspirimder arasyndaǵy Eýropa chempıonatynyń irikteý kezeńderi men ÝEFA Damý týrnıri sııaqty joldastyq jarystar bar. Osyndaı kezekti týrnır 2026 jylǵy 3-8 mamyr aralyǵynda Talǵarda ótedi. Onda WU-16 quramasy Estonııa, О́zbekstan jáne Izraıl quramalaryna qarsy oınaıdy», dedi federasııa ókili.
Jıynda ótken maýsym qorytyndylary taldanyp, aldaǵy damý baǵyttary qaraldy. Sonymen birge klýbtardy lısenzııalaý talaptary men áıelder jáne jasóspirimder fýtbolyn júıeli damytý máselelerine nazar aýdaryldy.
«Qazaqstan fýtbol federasııasy atynan búgin Áıelder lıgasynda maýsymdy bastaıtyn barlyq komandaǵa sáttilik tileımiz», dep túıindedi Aleksandr Keplın.
Jańa maýsymǵa 19 klýb qatysady. Komandalar eki konferensııaǵa bólinip, turaqty kezeńnen keıin ár konferensııanyń úzdik eki ujymy pleı-off kezeńine shyǵyp, chempıon anyqtalady.
Qazirgi el chempıony – «Aqtóbe» klýby. Ol 2026-2027 jylǵy ÝEFA áıelder Chempıondar lıgasynda Qazaqstan atynan óner kórsetedi.
Aıta keteıik, Áıelder lıgasynyń 2026 jylǵy alǵashqy týry 27 sáýirde bastalady. Barlyq matchtar KFF League YouTube arnasynda tikeleı efırde kórsetiledi.
