Ankarada bolǵan jıynǵa Túrkııa Respýblıkasynyń burynǵy prezıdenti Abdýllah Gúl, Prezıdenttiń bas keńesshisi Iаlchyn Topchý, Uly Birlik partııasynyń tóraǵasy Mustafa Destıdjı, Túrkııa májilisindegi Qazaqstan-Túrkııa Dostyq tobynyń tóraǵasy, depýtat Halyk Ipek, Túrkııa májilisiniń burynǵy tóraǵasy Hıkmet Chetın, burynǵy Mádenıet mınıstri Namyk Kemal Zeıbek, Túrik keńesiniń burynǵy bas hatshysy Halıl Akyndjy qatysty.
Jıynda Túrkııa men Qazaqstannyń dıplomatııalyq qatynastarynyń 25 jyldyǵyna arnalǵan fılm kórsetildi.
Konferensııada baıandama jasaǵan Qazaqstannyń Túrkııadaǵy ókiletti jáne tótenshe elshisi Abzal Saparbekuly Qazaqstannyń ekonomıkalyq-saýda, halyqaralyq dıplomatııa salalaryndaǵy jetistikteri jóninde aıtty. Túrkııa prezıdentiniń bas keńesshisi Iаlchyn Topchý da «Bir ata-babanyń balalary retinde qazirge birlik pen tirligimizdiń jalǵasýyn tileımiz» dedi. Túrkııa májilisiniń Túrkııa-Qazaqstan dostyq tobynyń tóraǵasy Halýk Ipek te «Bizden burynǵy aǵalarymyz armandap ketken kúnderdi biz kórdik. Sol kúnderdi bastan keshtik. Baýyrlastarmen qaıta qaýyshtyq. Biz baqytty jandarmyz» dedi.
Kelesi sóz kezegin alǵan TR burynǵy prezıdenti Abdýllah Gúl túrik respýblıkalarynyń táýelsizdik alǵan kezderindegi maǵynaly estelikterimen bólisti. «Áli kúnge baýyrlas elderge barsaq, «Bizdiń táýelsizdigimizdi birinshi bolyp moıyndaǵan Túrkııa» dep bastaıdy sózderin. Bul biz úshin úlken abyroı» degen Gúl «Túrkııa retinde osy baýyrlas elderdiń táýelsizdigine tolyq daıyn bolmasaq ta, túriktik sanasymen jetilgen tulǵalarymyz bar edi. Olar týysqan halyqtarǵa birinshi bolyp baryp, qyzmet etti» dedi ol.
Túrkııanyń burynǵy prezıdenti Qazaqstandy táýelsizdigin alǵan respýblıkalar arasynda erekshe orynǵa ıe ekenin aıtyp, Qazaqstannyń kemeńger kósbasshysy Nazarbaevtyń eren eńbekterin atap ótti. «Aldymen Reseı jáne Qytaı sekildi úlken derjavalarmen kórshiles Qazaqstannyń shekarasyn tutastaı qyp saqtap qalýy – úlken jaýapkershilik. Artynan óz erkimen ıadrolyq qarýdan bas tartýy da- maqtarlyq qadam» degen Abdýllah Gúl úshinshiden eldegi etnıkalyq birliktiń qaımaǵyn buzbaı, qazaqtyń ulttyq sanasyn oıatyp, ulttyq mádenıetin keleshek urpaqqa jetkizý maqsatynyń da oryndalǵanyn atap kórsetti. Sonymen qatar Nursultan Nazarbaevtyń bilim berýge óte kóp kóńil bólgenin aıtyp, qazirgideı qıyn dáýirde myqty dıplomatııa qurýdyń da mańyzdy ekenin, munyń Qazaqstannyń jaqsy oryndap shyqqanyn bildirdi. «Nazarbaevtyń eń mańyzdy qasıeti – qol jetkizilgen tabystardy jalǵastyra bilý. Tyndyrdym dep qoımaı, osy tabystardyń jalǵasyn taýyp, urpaqtarǵa qaldyra bilý» dedi ol.
О́ziniń Nursultan Nazarbaevpen tek el basshylary deńgeıinde qatynasy bolmaǵanyn, Qazaqstan basshysymen zııaly tulǵalar retinde erekshe qatynastary bolǵanyn, jyly suhbattary ótkenin, eldiń bolashaǵy, mádenıeti, jastardyń tárbıesi jóninde sóılesip, tabysty isterdi bolashaqpen qalaı sabaqtastyratyndaryn talqylaǵandaryn eske aldy.
