Sýret: facebook.com/Arbuzkz
2024 jyly Aqmaral «Bir aýyl – bir ónim» baǵdarlamasy aıasynda ótkizilgen granttyq baıqaýda jeńimpaz atanyp, bes mıllıon teńgelik memlekettik qoldaýǵa ıe boldy. Joba aýyldyq óńirlerdiń áleýetin arttyryp, óńdeýshi shaǵyn bızneske serpin berýdi kózdeıdi. Osy bastamanyń nátıjesinde jas kásipker ulttyq taǵamdy naryqqa beıimdep, zamanaýı talaptarǵa saı usyný isine den qoıdy.
Aqmaraldyń negizgi ónimi – qazaqtyń dástúrli jenti. Ol ejelgi as túrin qazirgi tutynýshy talǵamyna sáıkestendirip, shokoladpen úılestire otyryp daıyndaıdy. Budan bólek, kásipker sók pen talqandy túrli qaptamada shyǵaryp, korporatıvtik tapsyrystardy oryndaıdy jáne ulttyq meıramhanalarǵa turaqty jetkizýdi jolǵa qoıǵan. Sondaı-aq qurmany shokoladqa malyp ázirleý sekildi sheteldik tutynýshyǵa da túsinikti formattaǵy ónimder usynyp júr. Bul – ulttyq as mázirin jańa býynǵa estetıkalyq ári gastronomııalyq deńgeıde tanytýdyń bir tásili.
Qazir kásipkerdiń óndiristik sehy Astananyń Esil aýdanynda ornalasqan. Al arnaıy dúkeni jóndeý aıaqtalǵannan keıin jumysyn bastamaqshy. Bul da qalalyq tutynýshylarǵa jaqyndaýdyń bir qadamy ekeni anyq.
Aqmaraldyń kásipkerlikke kelý joly da qyzyqty. Ol – zań men ekonomıka salalary boıynsha eki joǵary bilimi bar maman. Alaıda ýaqyt óte kele taǵamtaný baǵytynda tájirıbe jınap, shaǵyn kofehana ashqan. Buǵan qosa flıpıngpen aınalysyp, jeke kásipti jolǵa qoıǵan. Kásipkerdiń aıtýynsha, ulttyq taǵamdy jańǵyrtý – otandyq brend qalyptastyrýdyń bir quraly.
«Jent, talqan, sók sııaqty taǵamdardyń quramy óte qarapaıym ári tabıǵı. Onda jasandy qospalar bolmaıdy. Burshaq tuqymdas pen dán ónimderi aǵzadaǵy energııa almas-ýyn jaqsartyp, bal, maı, irimshik sekildi ónimder ımmýndyq júıeni qoldaıdy. Mundaı taǵamdardy jańa formatta usyný – densaýlyqqa paıdaly dástúrdi saqtap qalýdyń bir joly», deıdi Aqmaraldyń turaqty tutynýshysy ári osy salany kópten beri zerttep-zerdelep júrgen «Habar» telearnasynyń prodıýseri Merýert Abdalıeva.
Onyń aıtýynsha, álemde etnografııalyq gastronomııa baǵyty damyp keledi, al qazaq taǵamdary bul trendke tolyq sáıkes keledi.
Otandyq kásipti qoldaý máselesine toqtalǵan ekonomıst Seıitqul Jumanov ulttyq ónim óndirýshilerdiń áleýeti áli tolyq ashylmaǵanyn aıtady. «Ulttyq taǵam óndirýshilerine naryq keńeıip keledi. Biraq olarǵa qaptama, sertıfıkattaý, logıstıka, marketıng sııaqty baǵyttarda qosymsha qoldaý qajet. Qoldanystaǵy granttyq baǵdarlamalar nátıjeli. Degenmen óndiris kólemin arttyrý maqsatynda óńdeý salasyna arnalǵan arnaıy qural-jabdyqty sýbsıdııalaý, eksportqa shyǵarý tetikterin jeńildetý mańyzdy», deıdi ol.
Ulttyq taǵam – dámdik ereksheligimen ǵana emes, mádenıet pen tarıhı jad arqyly da qundylyqqa ıe. Osy turǵydan alǵanda, Aqmaral Sámet sııaqty kásipkerlerdiń eńbegi ulttyq ashananyń búgingi kúnge laıyqtalyp, jańa býynǵa jetkizilýine yqpal etip jatyr.
