El ortalyǵyn Almaty qalasynan Aqmolaǵa resmı túrde kóshirý 1997 jyldyń 10 jeltoqsanynda júzege asyryldy. Al Prezıdenttiń 1998 jylǵy 6 mamyrdaǵy Jarlyǵy negizinde Aqmolanyń ataýy Astana bolyp ózgertilip, onyń halyqaralyq tusaýkeseri 1998 jyldyń 10 maýsymynda ótti. Bul kórsetilgen aıtýly kúnderdiń barlyǵy Astana tarıhynda altyn árippen jazylyp qaldy. Degenmen, kezinde Alataýdan Arqaǵa baǵyt alǵan bul kóshtiń resmı turǵyda 10 jeltoqsanda bastalǵanyn nazarǵa alar bolsaq, osy kúnniń elimiz úshin mańyzy zor ekenin uǵa túsemiz.
Astana á degennen qaınaǵan tirshiliktiń, saıası, ekonomıkalyq, rýhanı-mádenı iri oqıǵalardyń ordasyna aınalyp shyǵa keldi. Jańa elordamyzdyń bir jyl óter-ótpes ýaqytta, ıaǵnı 1999 jyly ol IýNESKO uıǵarymymen «Álem qalasy» degen mártebeli ataqty enshilese, kóp uzamaı, dáliregi 2000 jyly astanalar men iri qalalardyń halyqaralyq assambleıasynyń músheligine qabyldandy.
Elordamyzdyń Eýrazııa qurlyǵynyń ortasynda ornalasýy elimizdiń tynys-tirshiligin jańa baǵytqa burdy. Barlyq jaǵynan alyp qarasańyz da tıimdiligin kórsetti. Ásirese Astananyń yńǵaıly ornalasýy elimizdiń Eýropa men Azııa arasyndaǵy yqpaldastyqty óristetýge, tranzıttik kópir retindegi rólin arttyrýǵa keńinen jol ashty. Bul óz kezeginde Qazaqstannyń ekonomıkalyq damýyna, elordamyzdyń bedeliniń óse túsýine tyń serpin berdi ári qalanyń ınvestısııalyq klımatyn jaqsartty. Sońǵy derekterge qaraǵanda, jalpy elimizge quıylǵan ınvestısııalardyń 10 paıyzy elordaǵa tıesili.
Búginde Astana ekonomıkasyna qýat berip otyrǵan ónerkásip, saýda, kólik qatynasy, baılanys jáne qurylys salalaryndaǵy jumystar júıeli túrde jolǵa qoıylǵan. Ásirese qurylys taýarlaryn, azyq-túlik ónimderin shyǵarýda tabys mol. Qaladaǵy zamanaýı iri kásiporyndar qatary jyl ótken saıyn tolyǵa túsip, kóptegen jumys oryndary ashylýda. Qazirgi tańda elimizdegi iri bıznes ortalyǵy bolyp sanalatyn Astanada shaǵyn jáne orta bıznes damyp, kásipkerlik salasy órken jaıǵan. Munda qyzmet kórsetý oryndary ýaqyt talabyna saı jetildirilip, básekege qabilettiligi artyp keledi.
Elorda qurylys salasynda elimiz boıynsha kósh bastap tur. Bul baǵyttaǵy jumystarǵa júzdegen otandyq jáne sheteldik kompanııalar tartylǵan. Astana qurylysy Elbasynyń udaı nazarynda. Qalany sáýlettendire túsýge arnalǵan sharalardy júzege asyrýda Memleket basshysynyń Batys pen Shyǵystyń mádenı dástúrlerin úılestirý ıdeıasy basshylyqqa alynyp keledi.
Astana kelbetine oı júgirtseńiz elorda boıtumary atalyp ketken «Báıterek» kesheni, biregeı nysandar – «Táýelsizdik» saraıy, «Beıbitshilik jáne kelisim» saraıyn, «Han Shatyr» saýda-oıyn-saýyq ortalyǵy, «Dýman» ortalyǵy, «Astana opera» teatry, «Áziret Sultan» meshiti, «Qazaqstan» ortalyq konsert zaly, «Qazaq Eli» monýmenti, Ulttyq mýzeı jáne taǵy basqa da ásem de eńseli, halyq ıgiligine baǵyttalǵan ǵımarattar kóz aldyńyzǵa keledi. Osy oraıda Astanadaǵy sporttyq keshender turǵysynda da aıta ketýimiz kerek. Búginde qarapaıym jurtshylyqtyń kózaıymyna aınalǵan, elimizde buryn-sońdy bolmaǵan sporttyq ǵımarattar – «Astana-Arena» stadıony, «Saryarqa» velotregi, «Alaý» muz aıdyny, «Barys Aren» sport kesheni syndy keshenderdiń jóni bólek.
Taǵy bir erekshe toqtala keter jaıt, Astana urpaqqa tárbıe, bilim berý isinde, jastarǵa qoldaý bildirýde kóptegen tabystarǵa qol jetkizdi. Mundaǵy Nazarbaev Ýnıversıteti, Qazaq ulttyq óner ýnıversıteti, L.Gýmılev atyndaǵy EUÝ, S.Seıfýllın atyndaǵy Qazaq agrotehnıkalyq ýnıversıteti, M.V.Lomonosov atyndaǵy Máskeý memlekettik ýnıversıtetiniń fılıaly, Astana medısınalyq ýnıversıteti jastardyń zamana talabyna saı bilim alýlaryna múmkindik berýde.
Astanada bedeldi halyqaralyq uıymdardyń sammıtteri, álemdik mańyzy zor túrli forýmdar men túrli aýqymdy sharalar ótetin tıimdi únqatysý alańyna aınala bildi. Bul oraıda elordada turaqty túrde ótip kele jatqan Álemdik jáne dástúrli dinder kóshbasshylarynyń sezderin, Astana ekonomıkalyq forýmyn, «Astana prosesin» erekshe atap ótken jón. Sondaı-aq, Astanada EQYU-nyń, ShYU men IYU-nyń sammıtteri ótkizilgeni elordanyń ǵana emes, búkil elimizdiń abyroıy bolǵany barshaǵa aıan. Sonymen qatar bıyl munda EKSPO-2017 kórmesiniń sátti uıymdastyrylǵanyn erekshe atap kórsetkenimiz oryndy.
Búginde halyq arasynda «Astananyń órkendeýi – Qazaqstannyń órkendeýi» degen tirkes jıi aıtylady. Bul negizinde durys qalyptasqan uǵym. О́ıtkeni, Astana búkil Qazaqstannyń kelbetin aıshyqtaıdy. Álem jurtshylyǵy Qazaqstandy Astanaǵa qarap baǵalaıdy.
Qoryta aıtqanda, Qazaq eliniń, ultymyzdyń brendine aınalǵan Astana qysqa ǵana ýaqyttyń ishinde mol tabystarǵa jetip, qanatyn keńge jaıyp keledi. Bul Elbasy eńbeginiń janǵanyn, halyq tileginiń qabyl bolǵanyn bildirse kerek.
Joldybaı BAZAR,
«Egemen Qazaqstan»
