Foto: nurotan.kz
Jıyndy ashqan M.Qul-Muhammed jańa Joldaýdyń Qazaqstannyń júıeli jańǵyrýdaǵy 10 basym baǵytyn júzege asyrýdy qamtamasyz etetin biregeı baǵdarlamalyq qujat ekenin aıtty. О́ıtkeni qazaqstandyq ındýstrııa men agroónerkásiptik keshendi jáne kóliktik-logıstıkalyq ınfraqurylymdy sıfrlandyrý, turǵyn úı qurylysy men kommýnaldyq sektorǵa jańa tehnologııalardy engizý Elbasy usynǵan eldi damytýdyń negizgi vektory bolyp tabylady.
Otyrysqa jetekshilik etken M.Qul-Muhammedtiń aıtýynsha, munyń barlyǵy Qazaqstannyń jańa álemdegi jetekshi elderdiń qataryna qosylýy úshin qajet. Sonymen qatar Prezıdent dástúrge saı bıyl da áleýmettik damý máselelerine zor kóńil bólip, adamı kapıtaldy qazaqstandyq jańǵyrýdyń júıeli úshtaǵanynyń negizi retinde belgilegen. «Elbasymyzdyń Joldaýynda elimizdi saıası, ekonomıkalyq, áleýmettik jáne rýhanı jańǵyrtýdyń 10 basym baǵyty aıqyn belgilengen. Bizdiń endigi mindetimiz – árbir qazaqstandyqtyń ómiri, densaýlyǵy men turmysyna degen Elbasy qamqorlyǵynan turatyn Joldaýdyń mazmunyn barsha halyqqa jetkizý», dedi M.Qul-Muhammed.
Demokratııalyq kúshterdiń «Qazaqstan-2050» jalpyulttyq koalısııasynyń otyrysyna eldegi jetekshi partııalardyń basshylary, Parlament depýtattary, Qazaqstan halqy Assambleıasynyń, kásibı jáne qoǵamdyq birlestikterdiń ókilderi qatysty. Al otyrys barysynda koalısııa músheleri Memleket basshysynyń jańa Joldaýyna baılanysty óz oılaryn ortaǵa salyp, pikirlerimen bólisti. Máselen, Qazaqstan Kásipodaqtar federasııasynyń tóraǵasy Baqytjan Ábdiraıym Tórtinshi ónerkásiptik revolıýsııanyń jańa múmkindikteri kimderge tıesili ekenin de baıandady. «Jańa múmkindikter eń aldymen ǵylymǵa, bilimge jaqyn eńbekqor azamattarǵa beriledi dep sanaımyn. О́ıtkeni osy maqsatta kásipodaq aldynda úlken mindetter tur. Biz osy baǵyttaǵy jumystarymyzdy oryndaý úshin jaqyn arada arnaıy jol kartasyn jasap, búkil Qazaqstan boıynsha úgit-nasıhat júrgizemiz», dedi ol.
«Nur Otan» partııasynyń bastamasymen qurylǵan Demokratııalyq kúshterdiń «Qazaqstan-2050» jalpyulttyq koalısııasynyń kezekti keńesine qatysýshylar Joldaýda adam kapıtalyn jaqsartýǵa arnalǵan Prezıdent bastamalaryn jedel júzege asyrý qajettigine keńinen toqtaldy.
«Aq jol» demokratııalyq partııasy bıznes partııasy retinde Joldaýda bızneske arnalǵan baǵyttardy erekshe baǵalaıdy. Bul joly Elbasymyz ındýstrııaǵa ǵana emes, eń aldymen ınnovasııalyq baǵytqa basa nazar aýdaryp otyr. Eger biz ınnovasııany basty maqsat retinde, basty kórsetkish retinde alsaq, kez kelgen kásiporyndy emes, kez kelgen óndirýshini emes, tek zamanaýı jańa tehnologııalardy paıdalanatyn, jańa tehnologııalar alyp keletin kompanııalardy qoldaýymyz kerek», dedi Parlament Májilisiniń depýtaty, «Aq jol» partııasynyń tóraǵasy Azat Perýashev.
Sodan keıin sóz alǵan Qazaqstan Kommýnıstik halyqtyq partııasynyń múshesi, partııanyń Astana fılıalynyń birinshi hatshysy Marat Áýbákirov Memleket basshysynyń bul jolǵy Joldaýynda elimizdiń aýyl sharýashylyǵy salasyna aıryqsha kóńil bólingendigine toqtaldy. «Rasynda da Qazaqstannyń aýyl sharýashylyǵy ónimderin óndirý áleýeti óte joǵary jáne eń bastysy, ol taza tabıǵı ónimder bolyp tabylady. Ásirese astyq óndirisinde álemdegi aldyńǵy qatarly elderdiń sanatyndamyz. Endeshe biz atadan balaǵa mıras bolyp kele jatqan osyndaı ıgilikti isterimizdi zamanaýı talapqa saı etip damytýymyz kerek», dedi M.Áýbákirov.
Sol sııaqty aýyl máselesine aıryqsha kóńil bólgen «Aýyl» halyqtyq-demokratııalyq patrıottyq partııasy tóraǵasynyń birinshi orynbasary Tolymbek Ǵabdiláshimov óziniń sózinde eńbek ónimdiligin arttyrý qajettigine basa nazar aýdardy. «Oǵan qosa, eńbek ónimdiliginiń artýynan paıda bolǵan ónimderdiń eksportyn eseleýge de kúsh salǵanymyz lazym. Elbasymyz aıtqandaı, taýardy álemdik naryqqa shıkizat kúıinde emes, óńdelgen ári halyqaralyq talapqa saı, tutynýǵa daıyn ónim retinde usynýdy qolǵa alǵanymyz jón. Bul rette biz jańa tehnologııalardy transfertteýmen jáne ony qazaqstandyq jaǵdaıǵa beıimdeı otyryp, áleýetimizdi arttyrǵanymyz abzal», dedi T.Ǵabdiláshimov.
Jıynda el kásipkerleri Joldaýda atap kórsetilgen baǵyttar boıynsha jumystar qazirdiń ózinde qyzý qolǵa alynyp jatqanyn alǵa tartty. «Atameken» UKP tóraǵasy Abylaı Myrzahmetov Elbasy Joldaýynda ózin-ózi qamtıtyn aýyldaǵy azamattardy kásipkerlikke tartý, rýhanı jańǵyrý, pragmatızm maqsaty alǵa qoıylǵanyn atap kórsetti. «Atameken» ótken jyly «Bıznes Bastaý» jobasyn qolǵa alǵany belgili. Sol kezde elimiz boıynsha 15 myń adamdy oqyttyq, onyń ishinde 8 myńy bıznes josparyn qorǵap shyqty jáne 3 myń adam óz isin ashty. Bıyl 160 aýdanda 30 myńǵa tarta adamdy oqytamyz. Bir qýantatyny, osy máseleni Elbasy óziniń halyqqa Joldaýynda atap ótti jáne ony «Atameken» kásipkerler palatasy iske asyrýda», dedi A.Myrzahmetov.
Aıta keteıik, alqaly jıynda «Birlik» saıası partııasy tóraǵasynyń orynbasary Bóribek Qadyrbekuly, «Jańarý» jemqorlyqqa qarsy jalpyulttyq qozǵalysy» RQB prezıdenti Oralbaı Ábdikárimov, Parlament Senatynyń depýtaty jáne «Qazaqstan Ulttyq ınjenerlik akademııasy» RQB prezıdenti Baqytjan Jumaǵulov, «Qazaqstannyń azamattyq alıansy» ZTB prezıdenti Táńirbergen Berdiońǵarov syndy qoǵam belsendileri sóz sóılep, oı-pikirlerin ortaǵa saldy. Al jıyn sońynda qatysýshylar Joldaýǵa qoldaý bildirip, elimizdiń barsha azamattaryn jyldyń basty qujatyn talqylaý jáne túsindirý jumystaryna belsendi qatysýǵa shaqyrǵan Úndeý qabyldady.
Nurlybek DOSYBAI,
«Egemen Qazaqstan»
