Byltyr jyl sońynda «Qaraǵandy – Jezqazǵan», «Balqash – Jezqazǵan» poıyzdary toqtap qaldy. Qazir tek №307-308 «Jezqazǵan – Astana» poıyzy ǵana júrip tur. Sol «júrip tur» degeni bolmasa, qyzylordalyq «Maral-Nur» JShS qamtamasyz etetin bul poıyzǵa da kópshiliktiń ókpe-nazy kóp. Bul máseleni Parlament Májilisiniń depýtattary da kóterdi. Jezqazǵandyqtardyń aryz-shaǵymdary negizinde Investısııalar jáne damý mınıstri Jeńis Qasymbekovke depýtattyq saýal joldandy.
– Qyzmet babymen elimizdiń túkpir-túkpirine jıi qatynaımyn, – deıdi Jezqazǵan qalasynyń turǵyny Gúl Ǵalymjanqyzy. – Basqa jaqtardan jańa vagondardy, olardaǵy qyzmetti, tipti appaq tósek jaımalaryn kórip tań-tamasha qalamyz. Bizdiń jezqazǵandyqtar úshin onyń bári arman ǵana. «Maral-Nur» JShS beretin tósek jabdyqtary ábden tozǵan, saǵal-saǵal, jolaýshylardyń kóbi ony alýǵa da jıirkenedi. Eń úlken problema – únemi bılet jetispeıdi. Bir jaqqa barý úshin bıletti keminde bir apta buryn alý qajet. Keıde Qaraǵandyǵa deıin oryn joq degen soń, bıletti Astanaǵa deıin alyp, artyq shyǵyndanýǵa týra keledi.
«Jezqazǵan – Astana» poıyzy kún saıyn júredi. Alaıda, nebary on eki vagon jolaýshylar suranysynyń 70-75 paıyzyn ǵana ótep otyr. Sondyqtan jolaýshylar kassany aınalyp, tikeleı jolseriktermen kelisýge májbúr.
Keıingi jyldary atalǵan on eki vagonnyń ekeýi ǵana jańartylǵan. Qalǵandary ondaǵan jyldar boıy eshqandaı jóndeý kórmegen terezelerinen sýyq urady, ájethanasynda jyly sý joq, elektr kózderi jumys istemeıdi. Sanıtarlyq jaǵdaıdyń tómendigine jezqazǵandyqtardyń ǵana emes, osy óńirge kelip-ketip turatyn qonaqtardyń da eti úırengen.
Qańtar aıynda Jezqazǵan óńirine arnaıy kelgen Májilis depýtattary halyqtyń aryz-shaǵymdarynyń rastyǵyna kóz jetkizip, tıisti mınıstrlik basshysyna vagondardyń jaǵdaıyn baǵalaýdy, naqty suranysty bilý úshin jolaýshylar aǵynyna monıtorıng júrgizýdi surap, hat joldady. Onda sonymen qatar tasymaldaýshynyń óz mindetterin qanshalyqty durys oryndap otyrǵanyn tekserý qajettigi de aıtylǵan.
Poıyz vagondaryn jańartý jaıyn naqtylasaq, «Maral-Nur» JShS basshylyǵynyń málimdeýinshe, kompanııa byltyr bes jańa vagon satyp alsa, sonyń tórteýi qazir Qaraǵandy oblysynda júrip júr. Al qosymsha vagondar tirkeý máselesi Investısııalar jáne damý mınıstrligi Kólik komıtetiniń quzyretinde kórinedi. Komıtet qazir bul máseleni qarastyrý ústinde.
– Tıisti sheshim qabyldanysymen, №307-308 poıyz qosymsha vagondarmen júretin bolady, – deıdi «Maral-Nur» JShS-niń dırektory Qazbek Dýmbakov.
Solaı degenmen, bul problema naqty qashan sheshiletini belgisiz. «Jezqazǵan-Beıneý» temir jol qurylysy bastalatyny týraly habarlanǵanda, jergilikti halyq shalǵaıdaǵy temir jol tuıyǵy bolýdan qutylamyz dep qýanǵan edi. Shynynda da, «Jezqazǵan-Qyzylorda» poıyzy óńirdiń damýyna aıtarlyqtaı serpin berdi. Alaıda, Qaraǵandy baǵytyn esten shyǵarýǵa bola ma? Vagondardaǵy oryn jetkiliksizdigi talaı jandy jolynan qaldyryp, sharýasyn bógep keledi. Ásirese, qys aılarynda alys saparǵa avtobýspen nemese avtomashınamen shyǵý qıyn ári qaýipsiz de emes. Jergilikti halyq tasymaldaýshyny aýystyrǵan durys bolar degen pikirde. Bastamashyl top «Qazaqstan temir joly» basshylyǵynyń atyna arnaıy hat ázirlep, qazir qol jınaý ústinde. Máseleni, múmkin, sala basshylyǵy shesher.
Qaırat ÁBILDA,
«Egemen Qazaqstan»
Qaraǵandy oblysy
