Baspasóz máslıhatyna «Qazaqstannyń ekologııalyq uıymdarynyń qaýymdastyǵy» ZTB basqarma tóraǵasy Aıgúl Soloveva men birlestik tóraǵasynyń orynbasary Eldos Abaqanov, Interfaks-ERA agenttiginiń dırektory Aleksandr Martynov, Halyqaralyq «jasyl» tehnologııalar jáne ınvestısııalyq jobalar ortalyǵynyń jetekshisi Rapıl Joshybaev qatysty.
Interfaks-ERA agenttigi dırektorynyń aıtýynsha, 11 túrli salalyq reıtıngini anyqtaýǵa Qazaqstannyń 200-den astam kompanııasy qatysypty. Olardyń basym bóligi munaı-gaz, taý-ken, mashına jasaý ónerkásibi, energııa taratý salasyndaǵy kásiporyndar.
– Munaı-gaz kompanııalarynyń arasynda «SNPS-Aqtóbemunaıgaz», «QazTransgaz», «Teńizshevroıl», «О́zenmunaıgaz», «QazMunaıGaz Barlaý О́ndirý» kompanııalary, «QazMunaıGaz» Ulttyq kompanııasy joǵary nátıje kórsetti, – dedi A.Martynov.
Qazaqstan men Reseı kompanııalarynyń jalpy reıtınginde qara jáne tústi metallýrgııaǵa qatysty reıtıngide «Qazaqmys» korporasııasy» JShS – 81-oryndy, «Jezqazǵantústimetall» AQ – 107, ArselorMıttal Temirtaý» AQ – 125, «Qazaqstan alıýmınııi» JShS – 139, «Qazsınk» JShS – 145-oryndy ıelengen.
Ekologııalyq-energetıkalyq tıimdilik kórsetkishi boıynsha «Astana-aımaqtyq elektr jelileri kompanııasy» AQ, «Astana-Jylýtranzıt» AQ, «SaryarqaAvtoProm» JShS, «Kentaý transformator zaýyty» AQ, «KEMONT» AQ jáne taǵy basqa kásiporyndardyń nátıjeleri joǵary.
Jalpy, óńirlerdegi lastaný kórsetkishi boıynsha Atyraý, Qaraǵandy, О́skemen syndy óndirisi damyǵan, ónerkásip oryndary kóp oblystar tizim basynda tur eken.
– Osy maqsatta jergilikti atqarýshy organdarmen baılanys ornatyp, oblys ákimdikterimen jáne respýblıkalyq mańyzy bar qalalardyń ákimdikterimen kelisim jasadyq. Ortalyq aımaqtardyń basshylyǵyna ınvestorlar men bıznes jobalarǵa «jasyl» tehnologııany damytýǵa qatysty ádistemelik, quqyqtyq jáne tehnıkalyq qoldaý kórsetedi, – dedi Rapıl Joshybaev.
«Jasyl» tehnologııalardy engizý, energııany tıimdi paıdalaný kórsetkishteri, aýaǵa kómirtegin taratý kólemi syndy túrli ólshemder boıynsha iri kompanııalardyń reıtıngin anyqtaý týraly bastama ótken jyly qolǵa alynǵan bolatyn. Ony Qazaqstannyń ekologııalyq uıymdary qaýymdastyǵy usynǵan edi. Bul reıtıng otandyq kompanııalardyń qorshaǵan ortaǵa tıgizip jatqan áserin anyqtaýǵa, sonymen qatar olardyń ekologııalyq saıasatty ashyq júrgizýine múmkindik bermek.
Arnur ASQAR,
«Egemen Qazaqstan»
