Qolǵa alǵan kásipteri de uqsas. Aıtpaqshy, bul kásipter múgedekterdiń ekeýine de barynsha qolaıly, qoǵamǵa da. Shashylyp jatqan qoqysty jınamaq. Kim oılaǵan, esebin tapsa, qoqys jınap ta qarajat tabýǵa bolady eken. Qalada da, jel keýlegen dalada da qoqystan kóp nárse joq. Qatty turmystyq qaldyqtardy da sypyryp-sıyryp jınap alsa, qaıtadan óńdese, kádege jaramaq.
Taıaýda Jarqaıyń aýdanynyń ortalyǵynda qımyl-qozǵalysy shekteýli múgedek Sergeı Prıvalovtyń bastamasymen qoqys jınaıtyn qoıma ashyldy. Sergeı kishkentaı kezinen densaýlyǵynda kinárat bolsa da, elgezek, eńbekqor bolyp ósti. Mektep baǵdarlamasyn úıinde ıgerýge týra keldi. Ulaǵatty ustazdarynyń arqasynda múmkindiginshe táýir bilim aldy. Mektepten soń kolledjdi támamdap, baǵdarlamalaý mamandyǵyn ıgerdi. Bul kezde onyń keıbir zamandasy ómirden óz ornyn izdep júrgen bolatyn. Al ár isine yjdahatty Sergeı ata-anasyna qarap aýzyn ashyp otyrǵan joq, óz betinshe talpynǵysy keldi. Sóıtip kishkentaı ǵana jer telimin jalǵa alyp, qaǵaz qaldyqtaryn jınaýǵa kiristi. Shalǵaıdaǵy shaǵyn aýdan ortalyǵynyń qýys-qýysyn tegis adaqtap shyqty. Baǵyna qaraı adamdar qajet etpeı tastaǵan qaǵaz degeniń atkópir eken. Buǵan deıin tiri pendeniń esine kelmegen bul oraıdaǵy sharýa shash- etekten bolyp shyqty. Endigisi qolyna ilingendi qoımasyna tasymaldaý ǵana, biraq sonyń ózi qımyl-qozǵalysy aýyrlaý adamǵa ájeptáýir júk. Áıtse de kisige kúnin túsirmeýge tyrysqan. Alǵashqyda velosıpediniń júk salǵyshyna kishkentaı qorapsha jasattyryp aldy. Endi qaǵazda qansha salmaq bar deısiń. Isi ońynan oralǵan soń alǵa qaraı umtylysy arta túsken. Qaǵaz emes, tıyndap bolsa da aqsha tasyp júr ǵoı.
Birte-birte kásibin keńeıtkisi kelgen. Osy oıy jetektep ótken jyly Sergeıdi «Nur Otan» partııasynyń aýdandyq bólimshesine alyp keldi. Endigi arada qaǵazǵa qosa, beı-bereket shashylyp jatqan áınek synyqtaryn, qańyltyr qorapshalardy qosa jınamaq.
– Qaǵaz jınaýdan bastap edi, qazir bárin de jınaıdy. Biz oǵan qoımany senimdi basqarýǵa berip, qujattaryn jınaýǵa kómektestik. Eptegen qolbaılaý da bar. Máselen, turmystyq qaldyqtardy qaıta óńdeý úshin oblys ortalyǵyna jetkizý, – deıdi partııa qyzmetkeri Ádil Nurbekov.
Búginde Sergeı «Bastaý-bıznes» baǵdarlamasy boıynsha barlyq qujattaryn jınap bitti. Endi ózi qaldyqtardy óńdeıtin seh ashqysy keledi.
– Mundaı oı mende kópten beri bar, – deıdi Sergeı, – qorshaǵan ortany jarqyratyp, jaınatyp taza ustaý kerek qoı. Bir sát aınalańyzǵa qarańyzshy, turmystyq qaldyqtar barlyq jerde demeıin, keı jerde beıbereket shashylyp jatqany ras. Men tóńirekti tazartqym keledi.
Aldaǵy ýaqytta Sergeı plastık ydystardyń qaldyǵynan qurylys materıaldaryn shyǵarmaq. Qurylys materıaldary shalǵaıdaǵy shaǵyn aýdanda qasqaldaqtyń qanyndaı qat. Bul úshin búgingiden de úlken qoıma, seh qajet. Kásipker jeńildetilgen nesıe almaq. Maqsatyna jetetinine senimi kámil.
Sergeıdiń taǵdyr tálkegine moıymaı, tyrmysyp alǵa umtylǵan qareketin Kókshetaý qalasynyń turǵyny, birinshi toptaǵy múgedek Vladımır Pletnev aına-qatesiz qaıtalaıdy. Ol da Sergeı tárizdi kisige kúni túsip, qol qýsyryp qarap otyrǵandy unatpaıdy. Vladımır «Damý» qorynan nesıe alyp, ony tolyq ótep te shyqty.
– Nesıege birneshe konteıner satyp aldym. Oǵan qosa, «Gazel» avtomashınasyn da, turmystyq qaldyqtardy jınastyryp tyǵyzdaıtyn qurylǵyny da aldym. Qazir meniń jaýapkershiligi shekteýli seriktestigimde úsh adam jumys isteıdi. Avtokólikti júrgizetin adam, qolǵabysyn tıgizetin jumysshy da qajet. Sonyń biri ekinshi toptaǵy múgedek Sergeı Býshmakın.
Vladımır aldaǵy ýaqytta turmystyq qaldyqtardy tyǵyzdap jınaıtyn qurylǵynyń qazirgiden qýattyraǵyn satyp alǵysy keledi. Jumys kólemi ulǵaıǵan saıyn jumysshylar da qajet.
Bir áttegen-aıy, bank bitken múgedekter óz isin bastamaq bolyp, nesıe surap barsa, at-tondaryn ala qashady eken. Talaıynyń esigin qaǵyp, taýy shaǵylǵan. Sodan keıin ǵoı «Damý» qoryna barǵany. Uıatqa qalǵan joq. Merziminde tap-tuınaqtaı etip ótep shyqty. Nesıe talaptary da qolaıyna jaqty. Tek suraǵan alty mıllıonyn tegis ala almady, qolyna tıgeni 3,5 mıllıon teńge. Sol qarjynyń ózi-aq isin dóńgeletýge jarap-aq qaldy.
Kásipker Kókshetaý qalasyndaǵy on bir balaly úlken otbasynda ósken. Báriniń birdeı joǵary oqý oryndarynda oqýǵa múmkindikteri bolmady. Sol sebepti segizinshi synypty bitirisimen slesar bolyp jumys istedi. Jatpaı-turmaı júrgizýshilikti meńgerdi. Ásker qataryndaǵy boryshyn ótep kelgennen keıin avtokólikterdi jóndeýmen aınalysty. Eptep qarajat jınap alǵan soń kólikterge qyzmet kórsetetin sheberhana satyp aldy.
– Balalyq shaǵymyz qıyn ótti, kóp balaly otbasynyń jaǵdaıyn kez kelgen adam bilse kerek qoı, – deıdi Vladımır Vladımırovıch. – Sol kishkentaı kezimnen bastap óz betimshe tirshilik etip, qarajat tabýǵa daǵdylanǵanmyn. Múmkin kóp balaly úıde talasyp-tarmasyp óskendikten shyǵar.
Taǵdyr joly tep-tegis súrleý emes. Buralań-bultarysy kóp. 2006 jyly Germanııaǵa qonys aýdarǵan. Biraq onda baǵy janbady. Abaısyzda avtokólik apatyna túsken. Múgedekter arbasyna tańylyp qaldy. On eki múshesi saý, tepse temir úzetin adam da emes, múgedekti kim kerek qylsyn. Sol kezde ókinishtiń ózegin órttegeni-aı! Baýyr basqan týǵan jerge oralǵan. Qaı qııadan baqyt izdeseń de aınalyp kelgende kindik qany tamǵan jerden artyǵy bolmaıdy eken ǵoı.
– Ánsheıinde shetelde bári bar, ıt basyna irkit tógilip jatyr deımiz ǵoı, – deıdi ózi, – bar ekeni de ras. Tazalyǵyna da kóńil toıattaıdy. Tek izetti izgilik pen mereıli meıirim ǵana jetispeıdi. Men sony osy jerden, qazaq dalasynan taýyp otyrmyn.
Baqyty bastaý alǵan óz ólkesine ókpesi joq, múgedekter arbasyna tańylyp otyrsa da, alǵa umtylǵan, kásip isteımin dep qulshynyp turǵan jigittiń sóz lámi janyma maıdaı jaqty.
Baıqal BAIÁDIL,
«Egemen Qazaqstan»
Aqmola oblysy
