Nysandardy aralaǵan qala basshysy jaýapty tulǵalarǵa qurylys jumystaryn sátti aıaqtaýǵa qatysty birqatar tapsyrma berdi.
Jumys sapary barysynda Baqyt Sultanov Astananyń jańa aýdandarynda salynyp jatqan eki mekteptiń qurylys alańyna baryp qaıtty. 1200 oryndyq mektep № 31 kóshesiniń ońtústik jaǵynda boı kóterýde. Ǵımarattyń qurylysy aıaqtalýǵa jaqyn. Munda qazir elektr jaryǵy tartylyp, qazandyq ornatylǵan Josparǵa sáıkes ol 2019 jyldyń 1 shildesine deıin paıdalanýǵa berilmek. Ákim nysanǵa qajetti ınjenerlik jeliler men kirme joldardy tartý jumystaryn jedeldetýdi tapsyrdy. Atalmysh jumystar maýsymǵa deıin aıaqtalýy tıis.
Elorda ákiminiń aıtýyna qaraǵanda, Memleket basshysy baspana men sapaly ınfraqurylymnyń qoljetimdiligimen qamtý sııaqty yńǵaıla ortany qalyptastyrýdyń mańyzdylyǵyna erekshe kóńil bóledi.
«Birinshi tamyzda mektep kommýnaldyq menshikke tapsyrylýy qajet. Sol sebepti kanalızasııalyq stansııadar men joldardyń qurylysyn maýsymda aıaqtaý kerek. 1 qyrkúıekte mektep oqýshylaryn qabyldaýy kerek», - dedi qala ákimi.
Qorǵaljyn tasjolynyń ońtústik jaǵyndaǵy 900 orynǵa laıyqtalǵan mekteptiń qurylysy qazirgi tańda toqtap tur. Qurylys jumystaryn aıaqtaıtyn kompanııany anyqtaý boıynsha konkýrs ótkiziletin bolady. Baqyt Sultanov mektepti ýaqytynda jańa oqý jylynyń aldynda ashý úshin prosedýralardy jedeldetýdi tapsyrdy.
Ákim, sondaı-aq, «Shar-Qurylys» kompanııasynyń qurylys jumystary júrip jatqan eki turǵyn úı kesheninde boldy. Shahar basshysy Turan dańǵyly men Kerek-Jánibek handar kóshesiniń qıylysynda ornalasqan «Altyn Shar» TK men «Telman» turǵyn alaby aýdanyndaǵy «Baǵystan» TK qurylysynyń barysymen tanysty. «Altyn Shar» TK qurylysy «Nurly Jer» baǵdarlamasynyń aıasynda júrgizilse, «Baǵystan» TK-degi páterlerdi «7-20-25» jáne «Turǵyn úı zaemy» ıpotekalyq baǵdarlamalary boıynsha satyp alýǵa bolady.
«Shar-Qurylys» JShS bas dırektory Janna Bektemirovanyń aıtýyna qaraǵanda, úıler energııa únemdeýge múmkindik beretin jańa qańqaly-monolıtti tehnologııa boıynsha salynyp jatyr. Budan bólek, Baqyt Sultanov «Qazanat» ıppodromy aýdanynda ornalasqan energııalyq turǵydan tıimdi Energy City kottedj qalashyǵyna bardy.
Eko úıler jel generatorlarynyń, kún batareıalarynyń, jylytýdyń «aqyldy» júıeleriniń esebinen tirshilikti qamtamasyz etedi. «Stroıınvest-SK» kompanııasynyń bas dırektory Aleksandr Kravchenko mundaı úıdiń energııany tutynýǵa qaraǵanda, ony kóp kólemde óndiretinin alǵa tartty. Bul – qalalyq kommýnıkasııalar júıelerinen avtonomdy túrde jumys isteı alatyn Qazaqstandaǵy alǵashqy ekologııalyq turǵyn úı kesheni.
Qurylys nysandaryn aralaý barysynda Baqyt Sultanov jaýapty tulǵalarǵa joldardyń qurylysyn qamtamasyz etýdi, joǵaryda atalǵan barlyq nysandarǵa kommýnıkasııalardy ýaqytynda tartýdy júktedi.
