Sport • 09 Mamyr, 2019

Benks týraly ne bilemiz?

737 ret kórsetildi

Qazaqstannyń eń áıgili kásipqoı boksshysy, birqatar beldi nusqalar boıynsha orta salmaqtaǵy álemniń eks-chempıony Gennadıı Golovkın barlyq ataǵynan aıyrylǵannan keıin óziniń jeke bapkeri Abel Sanchespen qoshtasqany belgili. Kóp keshikpeı jerlesimiz aldaǵy ýaqytta Djonaton Benkstiń qol astynda jattyǵatyny jaıynda jalpaq jurtqa jarııa etti. Al biz GGG-niń tańdaýy túsken sol maman jaıynda ne bilemiz?

Djonaton men Gena túıdeı qurdas. Ekeýi de 1982 jyldyń týmasy. AQSh-tyń óreni Mıchıgan shtatyndaǵy Detroıt qalasynda dúnıege keldi. Sporttyq mansabyn bastaǵan tusta birer jyl boıy áýesqoı rıngte ter tókti. 2003 jylǵy ulttyq chempıonatta 81 kılo salmaq dárejesinde kúsh synasyp, úshinshi orynǵa taban tiredi. «Altyn qolǵap» dodasynda kúmis medaldy moınyna ildi. Basqa da birqatar mańyzdy týrnırlerde top jardy. 

2004 jyldyń 30 shildesinde Benks kásipqoılar arasynda baq synaýǵa bel býdy. Alǵashqy tórt jyl aralyǵynda 20 ret sharshy alańǵa shyǵyp, barlyǵynda jeńiske jetti. О́z básekeleriniń denin ol Amerıkada ótkizse, úsh márte Germanııaǵa sapar shekti. 2008 jyldyń 12 shildesinde tóre­shilerdiń sheshimi boıynsha ıta­lııalyq Vınchenso Rossıtony utyp, IVO nusqasy boıynsha birinshi aýyr salmaqtyń altyn belbeýin ıelendi. 2009 jyldyń 27 aqpanynda Polshanyń betkeustary Tomash Ada­mek­ke ese jiberip, chempıondyq ataǵy­nan aıyryldy. 

Jalpy, Djonaton Benks kásipqoı rıngte barlyǵy 33 kezdesý ótkizip, 29 ret jeńiske jetti. 19 qarsylasyn nokaýtqa jiberdi. Úsh básekede uty­lyp, taǵy bir aıqasta teń esep tir­keldi. Joǵaryda esimi atalǵan Tomash Adamekten bólek, Benks asa aýyr sal­maqta aıqasqan AQSh-tyń qos myqtysy – Set Mıtchell men Antonıo Tar­verden ǵana jeńildi. Ár jyldary ol Elızeo Kastılo, Zak Peıdj, Imamý Meıfıld, Pol Batlın, Trevıs Ýoker, Djeıson Gavern, Saýl Montana syndy tanymal boksshylardan basym tústi.

Resmı túrde Benks 2014 jyldyń aıaǵynda bylǵary qolǵabyn shegege ilgenimen, oǵan deıin de ol jattyq­tyrýshylyq qyzmetpen aınalysqan edi. Ataǵy ańyzǵa aınalǵan Emanýel Stıýardtyń janynda júrip kóp nárse úırendi. Al aıtýly bapkerdiń Hýlıo Sezar Chaves, Kermıt Sıntron, Maıkl Mýrer, Tomas Hırn, Mıgel Kotto, Ched Doýson, Oskar de la Hoıa, Evan­der Hollıfıld, Lennoks Lıýıs, Vladımır Klıchko, Djeremen Teılor, Djeıms Tonı, Iýrıorkıs Gambao, Adonıs Stıvenson syndy juldyzdar bastaǵan barlyǵy 41 álem chempıonyn tárbıelegenin aıtsaq ta jetkilikti.

Djonaton Benkstiń ózi bolsa, biraz ýaqyt Ýkraınanyń dańqty boks­­shysy Vladımır Klıchko men Iаmaı­kanyń juldyzy Dıllıan Ýaıtty baptady. Qazirgi kezde ol áıelder arasyndaǵy álemniń absolıýtti chempıo­ny, Norvegııanyń týy astynda óner kórsetip júrgen Kolýmbııanyń týmasy Sesılııa Brekhýsty jattyqtyrýda. 

– Áýesqoı boksta júrgen kezinde-aq Golovkın qatty unaıtyn. Men onyń fanaty boldym. Afıny Olım­pıa­dasyndaǵy jekpe-jekterin kór­gende, onyń naǵyz daryn ıesi ekenine anyq kóz jetkizdim. Al taıaý­da osy máselege baılanysty maǵan qońyraý shalynǵanda, esh oılanbastan GGG-men jumys isteýge óz kelisimimdi berdim. Qazir bizdiń maqsatymyz bireý ǵana – álemdik tájderdi Gennadııge qaıtarý. О́ıtkeni ol sol chempıondyq ataqtardyń barlyǵyn da ıelenýge laıyq. GGG men «Kanelonyń» Tı-Mobaıl Arenadaǵy jekpe-jekterin kórgende, erekshe áserde boldym. Sekseninshi jyldary tórtkúl dúnıe jankúıerlerin tamsandyrǵan Shýgar Reı Leonard pen Tomas Hırnniń aıqas­tary birden oıǵa oraldy. Dál sondaı dınamıka, dál sondaı shap­shańdyq, dál sondaı «jan alysyp, jan berisken» báseke. Endi aldaǵy ýaqytta Golovkınniń qarsylas­tarynyń barlyǵyn ońdyrmaı sabap, chempıondyq tuǵyrǵa qaıta qonǵan sátin taǵatsyzdana kútemiz, – dep Djonaton aqtaryla sóıledi. 

Esterińizge sala keteıik, Genna­dıı Golovkın 2018 jyldyń 15 qyr­kúıeginde meksıkalyq Saýl Al­va­resten upaı sanymen utylyp, chempıondyq ataqtarynan aıyrylǵan edi. Sodan keıin ol uzaq ýaqyt sharshy alańǵa shyqqan joq. Mine, endi otandasymyz araǵa toǵyz aı salyp, rıngke qaıta oralǵaly jatyr. Atap aıtsaq, 8 maýsymda Nıý-Iorktegi áıgili «Madison Square Garden» arenasynda GGG áli eshkimnen jeńilmegen kanadalyq Stıv Rollspen aıqasady.

Sońǵy jańalyqtar

Pavlodarda jer astynan sý atqylady

Aımaqtar • Búgin, 14:25

12 tamyzǵa arnalǵan aýa raıy boljamy

Aýa raıy • Búgin, 10:30

Birqatar óńirde aýa sapasy nasharlady

Ekologııa • Búgin, 09:45

2186 adam koronavırýstan jazylyp shyqty

Koronavırýs • Búgin, 09:30

Baqytjan Saǵyntaev jańa qyzmetke saılandy

Taǵaıyndaý • Búgin, 09:22

Elorda «jasyl» aımaqqa ótti

Koronavırýs • Búgin, 09:13

Bir kúnde 1643 adamnan koronavırýs anyqtaldy

Koronavırýs • Búgin, 09:00

1/16 fınalǵa shyǵa almady

Tennıs • Búgin, 08:45

Uqsas jańalyqtar