Osymen úshinshi ret bastaý alǵan shara elimizdiń 3 aımaǵynda bir mezette jalaýyn kóterdi. Mamyr aıyndaǵy merekelermen oraılas kelgen forým Almaty oblysyndaǵy «Baldáýren-Qapshaǵaı», Túrkistan oblysyndaǵy «Baldáýren-Shymkent» jáne Aqmola oblysyndaǵy «Baldáýren» ortalyqtarynda óńirlerdiń jalyndy jastaryn jınady. Interaktıvti rejımde bastalǵan jastar forýmy ekin boıyna tanymal adamdarmen kezdesý, kóńildi oıyndar men sporttyq sharalarǵa toly boldy.
«Baldaýren - Qapshaǵaı» oqý-saýyqtyrý ortalyǵynda ótken forýmǵa Almaty qalasy, Almaty oblysy, Qaraǵandy oblysy, Shyǵys Qazaqstan oblysy men Jambyl oblysynan kelgen 320 jas patrıot qatysty. Patrıottar arasynda «Uly dalanyń urpaqtary - árdaıym alda» atty toptyq jumys júrgizildi. Ár top patrıottyq taqyrypty ashyp, ártúrli oılaryn ortaǵa salyp eskertkish fotoǵa tústi. Eń úzdik fotosýretter ınstagram jáne feısbýk paraqshalarynda jarııalandy.
Jınalǵan jastarǵa Qapshaǵaı qalasynyń ákiminiń orynbasary Saǵdat Nurǵazıev, «100 jańa esim» jobasynyń jeńimpazy, aqyn Maqpal Mysa, dzıýdodan Azııanyń kúmis júldegeri Damır Kúzembaev, ál-Farabı atyndaǵy Qazaq Ulttyq Ýnıversıtetiniń professory Arman Jumadilov, «Arystan» mamandandyrylǵan lıseıi dırektorynyń tárbıe isi jónindegi orynbasary, polkovnık Vasılıı Nebylısa, Abaı atyndaǵy QazUPÝ kásibı baǵdar ortalyǵynyń dırektory Nurmuhan Áýesbekuly sheberlik saǵatyn ótkizip, taǵlymdy áńgime aıtsa, ánshiler Tóreǵalı Tóreáli Álıhan Baısultan jáne Ramazan Amantaı kóterińki kóńil kúı syılady.
Jas patrıottar forým barysynda Qapshaǵaı qalasymn aralap, osyndaǵy áleýmettik qorǵaý ortalyǵynyń jumysymen tanysty.
