Máselen, bul jolǵy arnaıy operasııa «Jýsan-2» dep atalǵan. Elge qaıtarylǵandardyń kóbi áıelder men balalar eken. Balalardyń birqataryna qaqtyǵys aımaqtarynda oq tıip, elge aýyr jaǵdaıda jetkizilgen. Arnaýly qyzmet ókilderiniń biri balany kóterip kele jatyp: «Aýyryp jatqan joq pa?» dep til qatady. Sirá, bala ashyq jaraqattan qansyrap kele jatsa kerek. Sondaı-aq is-shara barysynda halyqaralyq terrorıstik uıymdardyń 16 ókili de qosa jetkizilgen. Alageýim ýaqytta túsirilgen (ne tań, ne keshki ýaqyttaǵy kadrlar ekeni ázirge aıtylǵan joq) beınelerden keıbiriniń avtobýstarǵa baldaqqa súıenip kirgeni, endi biriniń zembilmen jetkizilgeni ańǵarylady. Al jańaǵy terrorıstermen baılanysy bar degen adamdarǵa qarańǵy kózildirik kıgizilip, kisen taǵylǵany da baıqalyp qaldy. Balalardyń kópshiligi arnaıy jasaq ókilderiniń qushaǵynda júr. Sol ýaqytta balalarǵa oıynshyqtardyń taratylǵany kórinip turdy.
Taǵy bir atap óterligi, qutqarýshysynyń saýalyna qysqa jaýap bergen, bet-aýzy tumshalanǵan kelinshek óziniń 23 jasta ekendigin, qolyndaǵy sharanasynyń úshinshi balasy, al aldyńǵy ekeýi ákesimen birge Rakka qalasynda áýe shabýyly kezinde opat bolǵandyǵyn aıtyp berdi.
Beınekadrlar betindegi tıtrlerde qazir qutqarylǵan áıelder men balalardyń arnaıy mamandandyrylǵan karantındik ortalyqqa ornalastyrylyp, dárigerler men psıhologtardyń baqylaýyna alǵany kórsetilgen.
Sońynda óksip jylap turǵan kelinshek jáne taza sýdy qumarlana iship turǵan mektep jasyna jetpegen búldirshinniń áke-shesheń qaıda degen saýalǵa «eshkimim joq» degen shymyr jaýaby berilgen.
Jalpy, Sırııadan qazaqstandyqtardy qaıtarý operasııasy jalǵasa beretini sózsiz. Bul bizdiń elimizdiń álemdik jáne halyqaralyq beıbitshiliktiń jaqtaýshysy ǵana emes, shetelderde qıyn-qyspaqta qalǵan óz azamattarynyń taǵdyryna beıjaı qaraı almaıtynynyń da kórinisi bolyp otyr.
