Búgingi kúni Zaroslyı turǵyn úı kesheninde 120-ǵa jýyq ǵımarat bar, jer ýchaskeleri jeke turǵyn úı qurylysyn salý úshin berilgen. Kóptegen jergilikti turǵyndar turǵyn úılerin salyp úlgerdi, biraq áli qonys aýdarǵan joq.
- 2014 jyly eldi mekende elektr jelileri ornatyldy, alaıda belgisiz tulǵalar barlyq elektr symdaryn, qýat kabelderin jáne transformatorlyq jabdyqty urlady. Qazirgi ýaqytta jaýapty organdar zań buzǵan urylardy izdestirýde, - dedi Atyraý aýyldyq okrýginiń ákimi Ádilturaqbaı Qumarov.
Atyraý oblysy ákiminiń tapsyrmasymen Álımuxammed Quttumuratuly Zaroslyı eldi mekeninde jaǵdaıdy baqylap, turǵyndarmen kezdesip, jıyn ótkizdi. Turǵyndardyń aıtýynsha, eldi mekende jaryqtyń joqtyǵynan kóptegen úıler urylar men buzaqylardyń mekenine aınalǵan.
Atyraý qalasynyń ákimi jınalǵandarǵa aýmaqta jaqyn arada elektr jaryǵy máselesi sheshiletinin aıtty.
- Qalalyq máslıhattyń maýsym sessııasynda elektr jelilerin jáne transformatorlyq qosalqy stansııalardy qalpyna keltirýge arnalǵan jobalyq-smetalyq qujattamany ázirleýdi qarjylandyrý týraly usynys engizemiz. Dál osy ýaqytqa deıin demeýshilik esebinen 250 Vt transformatorlyq qosalqy stansııa ornatyldy, al turǵyndar turaqty túrde turý úshin turǵyn úılerge symdar tartylady,- dedi qala basshysy.
Qala ákiminiń baspasóz qyzmeti habarlaǵandaı, jaqyn arada elektr qýatyna jáne gazdandyrýǵa, sýmen qamtamasyz etýge baılanysty máseleler sheshiletin bolady. Ol úshin «QazTransGaz Aımaq» AQ-nyń Atyraýdaǵy fılıaly men «Atyraý sý Arnasy» JShS-niń kómegimen keıbir olqylyqtardy joıý qajet.
- Zaroslyı turǵyndarynyń problemalary qysqa merzimde sheshilýi tıis: elektr jáne gazben, sondaı-aq, osy aıda úılerdi jospar boıynsha sýmen qamtamasyz etý kerek. Biz birneshe jyldar boıy qıyndyq týǵyzǵan problemany sheship, adamdarǵa qolaıly ómir súrýi úshin barlyq jaǵdaılardy jasaýǵa mindettimiz », - deıdi Álımuxammed Quttumuratuly.
