Dóńgelek ústelge bokstan álem chempıony Mereı Aqshalov pen jasóspirimder Olımpıadasynyń chempıony Aıbek Oralbaı, taekvondodan Astana qalalyq federasııasynyń basshysy ári el tarıhyndaǵy jalǵyz Olımpıada júldesiniń ıegeri Arman Shylmanov jáne taǵy basqa birqatar jergilikti federasııanyń basshylary qatysyp, ózderiniń usynys-pikirlerin bildirdi.
Máselen, Mereı Aqshalov turǵyn úılerdiń aýlalaryna sport ǵımaratyn salyp, balalar tek jazda ǵana emes, qysta da sportpen aınalysýǵa tamasha múmkindik bolar edi deıdi. Al Arman Shylmanov búgingi kúnge deıin qalada taekvondo federasııasynyń ǵımaraty joq ekenin alǵa tartyp, ákimdik jer bólip berse ózderi ınvestısııa tartyp ǵımarat salýǵa daıyn ekendikterin jetkizdi. «Alataý» sport saraıyna júzýge baratyn sportshylardyń aıtýynsha, atalǵan keshende dýshtyń ózi jumys istemeı qalady eken. Sondaı-aq múgedek sportshylar úshin jaǵdaı jasalmaǵan, lıft istemeıdi. Al «Barys Arenadaǵy» júzý basseıniniń baǵasy qymbat.
Jıyn barysynda osy jáne budan da basqa birqatar máseleler kóterildi. Qala ákimi óz kezeginde elordanyń sportyn damytý úshin barlyq jaǵdaıdy jasaıtynyn jáne joǵaryda aıtylǵan máselelerdi meılinshe sheshýge tyrysatynyn jetkizdi. «Búgin kóterilgen máseleler boıynsha júıeli jumystar júrgizilip, sheshimder qabyldanatyn bolady. Nur-Sultan elimizdiń bas qalasy bolǵandyqtan qaı salada bolsyn aldyńǵy qatardan kórinýi tıis dep oılaımyn. Bul rette sport salasynyń alar orny aıryqsha ekeni sózsiz. Biz ákimdik tarapynan jan-jaqty qoldaý bildirýge daıynbyz. Búgin sizderden 16 usynys-ótinishti estidim. Barlyq jaǵdaıdy egjeı-tegjeıli qaraıtyn bolamyz», dep túıindedi sport ókilderimen ótken kezdesýdi Altaı Kólginov.
