Oblystyq tótenshe jaǵdaılar departamenti bastyǵynyń orynbasary Syrym Jaımaǵambetovtiń deregine súıensek, munaıly óńirdiń qurylys ındýstrııasynda kópqabatty úıler men ózge de nysandardy salýǵa 28 munaraly kran qoldanylady. Sondaı bıik krandy baǵyndyrǵandardyń qatarynda atyraýlyq Rázııa Erimbetova da bar.
О́ziniń aıtýyna qaraǵanda, 1984 jyly mektep bitirgen boıjetken áýeli sylaqshy mamandyǵynyń qyr-syryn meńgerýdi kózdepti. Sóıtip, sol kezdegi «Gýrevneftehımstroı» óndiristik birlestiginiń alty aılyq kýrsyna jazylǵan. Alaıda kásiporyndaǵy bilikti mamandar kran operatory bolýdy usynypty. Bıyl onyń krandy urshyqsha úıirgenine 41 jyldan asty.
– Bizdiń otbasymyzda bul mamandyqpen jumys isteıtinder joq edi. Bastapqyda oılanyp qaldym. Biraq nege ekenin bilmeımin, kóńilimde kran shtýrvalyna otyrýǵa degen qyzyǵýshylyq oıandy. Birneshe jas alty aı boıy kran operatory mamandyǵyn oqydyq. Arasynda tájirıbeden ótý úshin qurylys alańyndaǵy kranǵa otyrǵyzady. Albyrt kezimiz ǵoı, bıik munaradaǵy kran kabınasynan tóńirekke kóz salý qyzyqtyrǵan shyǵar, – deıdi Rázııa Erimbetova.
Ol 1985 jyly alǵash ret bıiktegi krannyń shtýrvalyna otyrdy. Sol kezde 18 jasta edi. Sodan beri ózi tańdaǵan mamandyǵyna adaldyqtan tanbady. Áli de bıik qurylystyń der kezinde boı kóterýine úlesin qosyp keledi. Keıingi 11 jyldan beri «Direct Construction Service» JShS-de jumys isteıdi.
– Alǵashqy kezde qobaljyǵanym ras. Biraq bilikti mamandardyń keńesin tyńdap, tájirıbesinen úırenýge tyrystym. Eń bastysy jumysyńdy jaýapkershilikpen atqarýǵa umtylý qajet. Bıik nysanǵa qajetti materıaldy dáldikpen jetkizýge eptilik te, tabandylyq ta kerek, – deıdi ol.
Atyraýdaǵy záýlim turǵyn úıler men ǵımarattardyń qurylysyna qoltańbasyn qaldyryp keledi. Sondaı ǵımarattyń qatarynda «Marriott Executive Apartments Atyrau» qonaqúıi bar. Munaıly shahardaǵy bıik nysan – munaıly óńirdegi sheteldikter turatyn tańdaýly mekenniń biri.
– Bul qonaqúıdiń qurylysyn salýǵa men de atsalystym. Sol kezde Qytaıda shyǵarylǵan kranmen 96 metr bıikte jumys istedim. Keıingi jyldary Atyraýda da ásemdigimen kóz tartatyn turǵyn úıler boı kóterdi. Sondaı nysandardyń qurylysynda qoltańbamnyń baryna marqaıamyn. Maqsatym – qalamyzda ásem ǵımarattardy turǵyzýǵa, elimizdiń órkendeýine úles qosý, –deıdi R.Erimbetova.
Qazir ol Reseıde qurastyrylǵan kranmen jumys isteýdi meńgeripti. Kún saıynǵy jumysyna kirispes buryn basshylardyń tapsyrmasyn alady. Jaz mezgilindegi jumysy tańǵy saǵat 7:00-de bastalyp, 12 saǵatqa deıin sozylady. Al qysta 8–9 saǵat jumys atqarady.
Áke-sheshesi kran operatory mamandyǵyn tańdaǵan qyzynyń qalaýyna qarsylyq bildirmepti. Al kúıeýi Amangeldimen 9-10-synypta birge oqyǵan. Keıin Aýǵanstanda áskerı boryshyn ótep kelgesin, otbasyn qurýǵa sheshim qabyldapty. Ekeýi tórt qyz, bir uldy ómirge ákeldi. Qyzdary teńin taýyp, turmysqa shyqty, uly 11-synypta oqıdy.
– Kranmen bıikke qurylys materıalyn kóterý ońaı emes. Qazir úırendim ǵoı degenimmen, qaýipsizdik tehnıkasyna qatań saqtaımyn. О́ıtkeni kranmen kótergen júkti qabyldap alatyn áriptesterimniń ómiri bárinen qymbat ekenin túsinemin. Basshylarymyz kran kabınasyna jazda aýany salqyndatatyn, qysta jylytatyn qondyrǵy ornatyp berdi. Aı saıynǵy tabysym kóńilimnen shyǵady, – deıdi ol.
Áriptesteri kópbalaly anaǵa udaıy qurmet kórsetedi. О́zi jumysynan soń úıine asyǵady. О́ıtkeni otbasynyń berekesin kirgizgen onyń úıine aman oralýyn otbasy men jasy júzge taıaǵan qart anasy kútip otyrady.
Atyraý oblysy
