Almatbek altyn aldy
Byltyrǵy Azııa chempıonatynda Qazaqstannyń grek-rım kúresi sheberleriniń qorjynyna altyn medal túspegen edi. Ammanda qos kúmis pen qos qolany qanaǵat tuttyq. Bul kórsetkishke qazaq jankúıerleriniń kóńili tolmady. О́ıtkeni, grek-rım kúresinde jeńispen órilgen baı dástúrimiz bar. Dál osy sport túrin serik etken balýandarymyz kezinde tolaǵaı tabystarǵa qol jetkizip, sary qurlyqta ústemdik qurdy.Álemde de pozısııamyz joǵary boldy. Sondyqtan da Iordanııadaǵy sátsizdikti «kezdeısoqtyq» dep qabyldadyq.
Alataýdyń arǵy betindegi báseke bizder úshin kóńilsizdeý bastaldy. Alǵashqy kúni bozkilemde beldesken bes balýannyń birde-bireýi fınalǵa shyǵa almady. Tusaýkeser kezdesýlerinde ırandyq Mohammad Panahasanıden utylǵan Nurzat Qabdarqymov (55 kg) pen japonııalyq Iýta Naradan jeńilgen Johar Uzarov (130 kg) birden kórermender qataryna qosyldy. Jerebe Saıfolla Qurmandy (63 kg) túrkimenstandyq Azatjan Achılovpen jolyqtyrǵanda qandasymyzdyń aıqyn jeńiske qol jetkizetinine esh kúmán bolmady. Biraq qatelesken ekenbiz. Bishkekte Azatjan Saıfollaǵa san soqtyrdy. Shyny kerek, sol sátke deıin Qazaqstannyń grek-rım kúresi mektebiniń túlegi Túrkimenstannyń ókilinen utylady degen oı úsh uıyqtasaq ta túsimizge de kirmegen. Olarǵa qaraǵanda Qaharman Qısymetovtiń (77 kg) tuzy jeńil eken. Alǵashqy aınalymda ol Qyrǵyzstannyń maqtanyshy Aqjol Mahmudovtan oısyraı utylǵanymen, júldeli oryn úshin talasý quqyǵyn saqtap qaldy. Sebebi, Aqjol fınalǵa deıin jetip, jerlesimizge jol ashyldy. Biraq Qısymetov ózine berilgen múmkindikti paıdalana almady. Jubanysh beldesýde japonııalyq Isamı Norıkıtany utqan ol úshinshi oryn úshin básekede ózbek Donıorhon Nakıbovtyń aldynda sharasyz kúı keshti.
35 jastaǵy Nursultan Tursynov (87 kg) tusaýkeser kezdesýinde Ońtústik Koreıanyń oǵylany Seýnghvan Lıdi esh qınalmaı jyqqanymen, jartylaı fınalda 20 jastaǵy jergilikti jas daryn Asan Janyshevtan ońbaı jeńildi. Qandasymyz qola medal úshin básekede túrkimenstandyq Davletmurat Baıramovty bas kótertpeı utyp, jeńis tuǵyryna kóterildi.
Kelesi kúni taǵy bes salmaq dárejesiniń júldeleri sarapqa salyndy. Solardyń arasynan fınalǵa tek Almatbek Amanbek (72 kg) shyqty. Qytaılyq Donjý Lı men qyrǵyz Amantur Ismaıylovty jolynan yǵystyrǵan qandasymyz sheshýshi tusta jastar arasyndaǵy álem chempıonatynyń fınalısi, Azııa chempıony, ırandyq Mohammad Djavad Rezaımen kúsh synasty. Syn saǵatta Boranbek Qońyratovtyń shákirti ózin jaqsy qyrynan kórsetti. Qarsylasy alǵa umtylǵan sátte qarymta shabýylǵa júgingen ol ony jyǵyp aldy da, astynda tyrp etkizbeı ustady. Rezaı jeńilgenin moıyndady. Almatbek – Azııa chempıony!
Jartylaı fınalda jeńilis taýyp, bas júlde úshin saıysqa túsý múmkindiginen aıyrylǵan Ibragım Magomadov (82 kg) pen Islam Evloev (97 kg) qola medal úshin kúresti. Bul synaqtan olar múdirmeı ótti. Ibragım asa shıelenisti básekede qytaılyq Rýı Lıýdi eki upaı aıyrmashylyǵmen utsa, Islam ońtústikoreıalyq Mınhý Lıdi 1 mınýt 27 sekýndta tas-talqanyn shyǵardy. Al ırandyq Álı Abdollah Ahmadı Vafaǵa áli jetpegen Erbol Kamalıev (60 kg) besinshi oryndy qanaǵat tutty.
Grek-rım kúresi jarysynyń jalpy komandalyq esebinde Qyrǵyzstan quramasy jeke-dara kósh bastady. Jarys qojaıydary tórt salmaq dárejesinde bas júldeni qanjyǵaǵa baılady. Ekinshi jáne úshinshi oryndarda – Iran (2 altyn+4 kúmis+3 qola) men О́zbekstan (2+1+2). Tórtinshi men besinshi satyǵa Qazaqstan (1+0+3) men Katar (1+0+0) jaıǵasty. Sondaı-aq, júlde alǵandar qatarynda Úndistan (0+2+3), Japonııa (0+1+2), Soltústik Koreıa (0+1+0), Qytaı (0+0+4) jáne Ońtústik Koreıanyń (0+0+3) balýandary bar.
Grek-rım kúresinen Azııa chempıondary
55 kg – Ihtıer Batyrov (О́zbekstan), 60 kg – Álisher Ganıev (О́zbekstan), 63 kg – Avtandıl Taalaıbekuly (Qyrǵyzstan), 67 kg – Razzaq Beıshekeev (Qyrǵyzstan), 72 kg – Almatbek Amanbek (Qazaqstan), 77 kg – Aqjol Mahmudov (Qyrǵyzstan), 82 kg – Shahın Badahı (Katar), 87 kg – Asan Janyshev (Qyrǵyzstan), 97 kg – Mohammadhadı Saravı (Iran) jáne 130 kg – Ámın Mırzazade (Iran).
Jalǵyz júlde – Gúlmaralda
Byltyr Iordanııanyń astanasy – Ammanda áıelder kúresinen ótken jarysta bizdiń qyzdar nebary eki júlde aldy: Jámılıa Baqbergenova (72 kg) altynnan alqa taqsa, Zeınep Baıanova (53 kg) qolaǵa qol sozdy. Al bıylǵy nátıjemiz odan da tómen boldy. Joǵaryda esimderi atalǵan qos balýan alǵashqy aınalymnan asa almady. Jahandyq jarystarda únemi júldegerler qatarynan kórinip, Azııada aldyna jan salmaı júrgen Jámılıa oıda-joqa úndistandyq Harshıta Harshıtadan utyldy. Jýyrda Tırandada Muhammed Malonyń týrnırinde top jaryp, babynyń jaqsy ekenin baıqatqan Zeınep Bishkekte bilgeninen jańyldy. Ol álem jáne qurlyq chempıony, japonııalyq Moe Kııýookaǵa jarytyp qarsylyq kórsete almady. Sondaı-aq, Shuǵyla О́mirbek (55 kg), Nılýfar Raımova (57 kg), Vıktorııa Hýsaınova (59 kg) jáne Aıjan Súıdýova (65 kg) tusaýkeser kezdesýlerinde jeńilistiń kermek dámin tatty.
Maral Táńirbergenova (50 kg) men Elena Shalygına (68 kg) da «shý» degennen súrindi. Olardy utqan sportshylar fınalǵa shyqqanynyń arqasynda jerlesterimizge úshinshi oryn úshin talasýǵa jol ashyldy. Biraq bul múmkindikti ekeýi de utymdy paıdalana almady. Maral qytaılyq Zıgý Fengke ońaı utyldy. Jasy 40-qa taıaǵan Elenany mońǵolııalyq Delgerma Enhsaıhan týshege qoıdy.
Qyrǵyzstannyń astanasynda óner kórsetken 10 burymdymyzdyń tek ekeýi ǵana jartylaı fınalǵa deıin jetti. 76 kg salmaqtaǵy Gúlmaral Erkebaeva Ońtústik Koreıanyń ókili Eýnjý Hvandy qapy qaldyryp, qola medaldi enshiledi. Al 62 kg salmaq dárejesinde baq synaǵan Tynys Dúbek úshinshi oryn úshin básekede mońǵolııalyq Serenshımed Sekheniń osal tusyn taba almady. Sóıtip, Qyrǵyzstan saparynan Qazaqstannyń áıelder quramasy jalǵyz júldemen oraldy.
Jalpy komandalyq esepte Qytaı (5+1+4) ozdy. Aspanasty eliniń arýlary barlyq salmaqta júlde aldy. Japonııa (3+4+2) ekinshi orynda qalyp qoıdy. Qyrǵyzstan (1+1+3) men Mońǵolııa (1+1+3) úshinshi jáne tórtinshi oryndy ózara bólisti. Odan bólek, Soltústik Koreıa (0+2+0), Úndistan (0+1+4), О́zbekstan (0+0+2), Qazaqstan (0+0+1) jáne Ońtústik Koreıanyń (0+0+1) qyzdaryna júlde alý baqyty buıyrdy.
Áıelder kúresinen Azııa chempıondary
50 kg – Iýı Sýsakı (Japonııa), 53 kg – Jın Jang (Qytaı), 55 kg – Sovaka Ýchıda (Japonııa), 57 kg – Keksın Hon (Qytaı), 59 kg – Menjý Hıe (Qytaı), 62 kg – Nonoka Ozakı (Japonııa), 65 kg – Lılı Lılı (Qytaı), 68 kg – Meıirim Jumanazarova (Qyrǵyzstan), 72 kg – Jııa Long (Qytaı) jáne 76 kg – Davaanasan Enhamar (Mońǵolııa).
Qos qolany qanaǵat tuttyq
Azııa chempıonatyn erkin kúres sheberleri qorytyndylady. Alǵashqy aınalymda Ádı Serikuly (65 kg) Takara Sýdadan (Japonııa), Sanjar Dosjanov (70 kg) Sına Mahdı Halılıden (Iran) utylsa, Mereı Bazarbaev (57 kg) ekinshi kezeńde Fýga Sasakıden (Japonııa) jeńildi. Bastapqy synaqta súringenderine qaramastan Dáýlet Ergesh (79 kg) pen Bekzat Úrkimbaı (97 kg) jarysty jalǵastyrdy. Biraq olar da uzaqqa shappady. Dáýlet Sýldkhý Olonbaıardan (Mońǵolııa), Bekzat ataǵy jer jarǵan Ahmed Tadjýdınovtan (Bahreın) ońbaı jyǵyldy.
Jeksenbide Azııa chempıonatynyń sońǵy júldeler taratyldy. Asyl Aıtaqyn (61 kg) men Ernur Nurǵazydan (74 kg) qaıyr bolmady. Asyl Toshehıro Hasegavanyń (Japonııa), Ernur Begıjon Quldashevtiń (О́zbekstan) aldynda dármensizdik tanytty. Olarǵa qaraǵanda Bolat Saqaev (86 kg) pen Azamat Dáýletbekov (92 kg) táýir kúresti. Jastary 30-dyń bel ortasyna taıaǵan saqa sportshylar jartylaı fınalǵa deıingi qarsylastaryn qoǵadaı japyrdy. Osy mejege jetkende ekeýi de súrindi. Bolat Mýkýl Dahııany (Úndistan) 6:0-men jeńip jatyp, aqyrynda 6:12 esebimen utyldy. Azamat Mohammadmobın Azımıden (Iran) soqyr upaı ala almady – 0:6. Úshinshi oryn úshin saıysta Qydyr Saıpýddınov (Bahreın) Saqaevqa san soqytyrsa, Dáýletbekov Takashı Ishagýrony (Japonııa) esh kúmánsiz utty.
Byltyr 18 jasqa tolǵan shaǵynda ózinen bir-eki jas úlken balýandardy tegisteı utyp, álem chempıony (U20) atanǵan Edige Qasymbek (125 kg) eresekter dýyna bıyl ǵana qatysa bastady. Qazaqtyń daryndy jigiti úshin alǵashqy synaq – osy Azııa chempıonaty. Bishkekte ol ózin jaqsy qyrynan kórsetti. Edige tusaýkesker kezesýinde Nambardagva Batbaıardan (Mońǵolııa) basym tústi. Kelesi kezeńde Tokıo Olmpıadasynyń qola, Parıj Olımpıadasynyń kúmis júldegeri, álemniń úsh dúrkin chempıony, Azııa oıyndarynyń jeńimpazy, qurlyq chempıony Ámir Hosseın Zaremen (Iran) kúsh synasty. Azýly qarsylastan Qasymbek esh qaımyqqan joq. Batyl kúresip, ózin minezdi balýan ekenin baıqatty. Bul básekede Zareniń mereıi ústem bolǵanymen, qazaqtyń ór minezdi ulynyń óneri kópshiliktiń kóńilinen shyqty. Qola medal úshin beldesýde Edige Býheeerdýn Býheeerdýnnan (Qytaı) basym tústi. Sóıtip, Qazaqstannyń erkin kúres sheberleri sary qurlyqtyń basty dodasyn eki qolamen qorytyndalady.
Jalpy komandalyq esepte Parsy eliniń pehlevandary (4+1+3) aldaryna jan salmady. Japonııa (3+0+0) men Úndistannyń (2+3+2) balýandary ırandyqtarmen biraz ıyq tiresti. Odan keıingi oryndardy Soltústik Koreıa (1+0+0), Bahreın (0+3+3), Mońǵolııa (0+2+1), О́zbekstan (0+1+2), Qyrǵyzstan (0+0+4), Qazaqstan men Tájikstan (0+0+2) jáne Túrikmenstan (0+0+1) enshiledi.
Erkin kúresten Azııa chempıondary
57 kg – Mılad Valızade (Iran) , 61 kg – Kım Kvan Mıen (Ońtústik Koreıa) , 65 kg – Sýjeet Sýjeet (Úndistan), 70 kg – Abhonımoý Abhonımoý (Úndistan), 74 kg – Ioshıneske Aoıagı (Japonııa), 79 kg – Keıvan Gardachı (Japonııa), 86 kg – Kamran Gasempýr (Iran) , 92 kg – Mohammadmobın Azımı (Iran), 97 kg – Arash Ioshıda (Japonııa) jáne 125 kg – Ámir Hosseın Zare (Iran).
Kúres túrlerinen Azııa chempıonatyna qatysatyn balýandar belgili boldy
