Al tekserý sharalary josparly, jospardan tys jáne reıdtik formatta ótedi. Iаǵnı, baqylaý jumystary bekitilgen jyldyq jospar negizinde jáne turǵyndardan túsken shaǵymdar boıynsha júrgizilse, buǵan qosa órt jáne gaz qaýipsizdigin qamtamasyz etý maqsatynda birlesken reıdter de uıymdastyrylady.
«2025 jyly 41 nysanǵa qatysty 28 tekserý júrgizildi. Nátıjesinde 19 aıyppul salynǵan. Aıyppuldar Ákimshilik quqyq buzýshylyq týraly kodekstiń 306-baby 1-bóligi, 298-baby 1-bóligi jáne 462-baby 3-bóligi boıynsha salyndy», deıdi maman.
Sonymen qatar kásipkerlerge anyqtalǵan kemshilikterdi joıý týraly nusqamalar berilgen.
«Atalǵan 41 nysannyń ishinde: 3 nysanǵa – tabıǵı gaz negizinde, 22 nysanǵa – gaz ballondary turǵysynda, 16 nysanǵa – gazgolderler boıynsha kemshilikterdi joıý boıynsha nusqamalar berildi», dedi maman.
Mamannyń aıtýynsha, tekserý barysynda qaıtalanyp kezdesetin zańbuzýshylyqtar bar.
«Eń jıi kezdesetin máselelerdiń qatarynda gaz jabdyqtaryna ýaqytyly tehnıkalyq qyzmet kórsetilmeýi, gaz analızatorlarynyń bolmaýy, jeldetý júıesiniń durys jumys istemeýi bar. Sondaı-aq gaz ballondaryn zańsyz paıdalaný, gaz júıesine óz betinshe ózgeris engizý, ballondardy as úıde nemese jylý kózderine jaqyn saqtaý, arnaıy beketterdiń ornyna avtogaz quıý stansııalarynda toltyrý, tútin murjalary men jeldetkishterdiń talapqa saı bolmaýy sııaqty óreskel buzýshylyqtar anyqtalyp jatady», deıdi Raqymjan Bektanov.
Zań talaptaryna salǵyrt qaraǵan kásipkerlerge qoldanylatyn ákimshilik sharalar da qatań. Tártip buzǵandarǵa aıyppul salynyp, kemshilikterdi túzetý jóninde nusqama beriledi. Al qajet bolǵan jaǵdaıda nysannyń qyzmeti ýaqytsha toqtatylyp, tipti túpkilikti jabylýy da múmkin. Osy rette aıta keteıik, nysan jumysyna núkte qoıý tek sot sheshimi negizinde ǵana júzege asady.
Mamannyń aıtýynsha, qoǵamdyq tamaqtaný oryndarynda gaz ballondaryn qoldaný tártibi de qatań rettelgen. Atap aıtqanda, ballondar arnaıy qaýipsizdik talaptaryna saı ornalastyrylyp, nysan tıisti órtke qarsy quraldarmen jaraqtandyrylýy tıis. Al keıbir tehnıkalyq jaǵdaılarda ǵımarat ishinde gaz ballondaryn paıdalanýǵa shekteý qoıylady.
Búginde elordadaǵy turǵyn úılerdiń birinshi qabatynda ornalasqan dámhanalar men ashanalardyń jaıy da erekshe baqylaýǵa alynǵan.
«Qazaqstan Respýblıkasynyń «Gaz jáne gazben jabdyqtaý týraly» Zańyna sáıkes, eki qabattan joǵary turǵyn úılerde gaz ballondaryn saqtaýǵa nemese paıdalanýǵa tyıym salynady. Bul talap turǵyndardyń qaýipsizdigi úshin engizilgen. Sebebi mundaı nysandarda gazdy durys paıdalanbaý – zor qaýipti jaǵdaıǵa ákelýi múmkin», deıdi maman R. Bektanov.
Onyń sózinshe, kásipkerler gaz jabdyqtarynyń qaýipsizdigine turaqty túrde ishki baqylaý júrgizýge mindetti. Atap aıtqanda, jylyna keminde bir ret tolyq tehnıkalyq tekserý jasalýy tıis bolsa, keıbir qurylǵylardyń jaı-kúıi ár alty aı saıyn jiti tekserilýi qajet. Eń bastysy, bul jumystardy tek arnaıy lısenzııasy bar gaz qyzmeti mamandary ǵana júrgizýi tıis.
Aıta keterligi, qaýipsizdik máselesi – tek quzyrly organdardyń ǵana mindeti emes, árbir turǵynnyń azamattyq jaýapkershiligi men qyraǵylyǵyna tikeleı baılanysty.
«Eger gaz ıisin sezseńiz nemese kúmándi jaǵdaı baıqasańyz, dereý tıisti qyzmetterge, atap aıtqanda, 104 – apattyq gaz qyzmetine, 112 nemese 101 – tótenshe jaǵdaılar qyzmetine nemese Komek 109 – qalalyq monıtorıng ortalyǵyna habarlaý qajet», deıdi maman.
«Qazirgi ýaqytta gaz ballondaryn QR-kod arqyly sıfrlyq tańbalaý júıesin engizý josparlanyp otyr. Bul – ballondardyń qaıda toltyrylǵanyn jáne qashan tekserilgenin baqylaýǵa múmkindik beredi», deıdi Raqymjan Bektanov.
