Japondyq parlamentaralyq dostyq lıgasy tóraǵasy, О́kilder palatasynyń depýtaty T.Kavamýra D.Nazarbaevany Senat Tóraǵasy laýazymyna taǵaıyndalýymen quttyqtap, Qazaqstan Respýblıkasynyń Tuńǵysh Prezıdenti N.Nazarbaevtyń 2016 jylǵy Japonııa saparyn jyly shyraımen eske aldy. Senat Tóraǵasy óz kezeginde Nursultan Nazarbaevtyń qazan aıynda Japonııanyń ımperatory Narýhıtonyń taqqa otyrý saltanatyna qatysýdy josparlap otyrǵanyn málimdedi. «Elbasyny asyǵa kútemiz», - dedi T.Kavamýra.
Senat basshysy japondyq depýtatty Parlamenttiń joǵarǵy palatasynyń otyrysyna qatysýǵa jáne Kúnshyǵys eliniń kásipkerlerin Qazaqstanmen birlesken jobalar ázirleýge shaqyrdy.
Senat basshysy jáne Germanııa, Kıpr, Serbııa, Chernogorııanyń parlamenttik delegasııalarynyń basshylarymen kezdesý kezinde negizgi taqyryp – saýda-ekonomıkalyq áriptestikti damytý qajettigi talqylandy. Darıǵa Nazarbaeva Qazaqstanda sheteldik ınvestısııany qorǵaý men sheteldik bıznesti qoldaýdyń kóptegen sharalary ázirlengenin aıta otyryp, sheteldik kásipkerlerdi shekaralas elder, eń aldymen, QHR jáne Reseımen saýda basymdyqtaryn paıdalana otyryp, Qazaqstanǵa ınvestısııa quıýǵa shaqyrdy. «Jańadan qurylǵan sheteldik bıznespen ózara is-qımyl ınstıtýttary mańyzdy rol atqarady. Qazaqstannyń Tuńǵysh Prezıdenti N.Nazarbaev qurǵan sheteldik ınvestorlardyń keńesi jumysyn jalǵastyryp otyrǵan erekshe ınstıtýt jáne onyń áleýeti arta túsýde», - dedi Senat Tóraǵasy.
Kezdesýde Qazaqstanda týrızmdi damytý taqyryby da talqylandy. Senat basshysynyń pikirinshe, parlamentaralyq yntymaqtastyq aıasynda qurylǵan depýtattyq dostyq toptary erekshe ról atqarýy yqtımal. «Qazaqstan – turaqty, qaýipsiz memleket. Bizdiń halqymyz qonaqjaı jáne ásem tabıǵatymyz bar», - dep Senat basshysy Qazaqstannyń týrızm salasyndaǵy tartymdy tustaryn atap ótti.
EQYU Parlamenttik Assambleıasynyń tóraǵasy G.Seretelımen halyqaralyq kún tártibiniń ózekti máseleleri talqylandy.
D.Nazarbaeva Qazaqstan EQYU Parlamenttik Assambleıasymen syndarly yntymaqtastyqty baǵalaıtynyn atap óte kelip, ony parlamenttik dıplomatııany ilgeriletý men senimdi nyǵaıtýdyń mańyzdy alańy dep sanaıtynyn aıtty.
G.Seretelı uıymnyń parlamentshiler arasyndaǵy baılanystardy nyǵaıtý, janjaldasýshy taraptar arasynda dıalog ornatý jónindegi jumysy týraly habarlady. Ol EQYU Tuńǵysh Prezıdent N.Nazarbaevtyń EQYU negizin qalyptastyrýshy qujat – 1975 jylǵy Helsınkı qorytyndy aktisin qazirgi zamandaǵy ózgerister turǵysynan qaıta qaraý týraly bastamasyn qoldaıtynyn atap ótti. G.Seretelı Qazaqstannyń Ortalyq Azııa aımaǵyndaǵy jáne halyqaralyq arenada beıbitshilik pen turaqtylyqty qoldaý jónindegi kúsh-jigerin joǵary baǵalady.
Kýveıt memleketi Ulttyq Assambleıasynyń tóraǵasy Marzýk ál-Ǵanımmen kezdesýde qaýipsizdik taqyryby talqylandy. Darıǵa Nazarbaeva Kýveıttiń áýejaıy men áskerı bazasy arqyly Sırııadan Qazaqstan azamattaryn qutqarý jónindegi gýmanıtarlyq operasııalaryn iske asyrýda kórsetken kómegi úshin Kýveıtke alǵys bildirdi. Marzýk Alı ál-Ǵanım óz kezeginde qaqtyǵystardy, sonyń ishinde Sırııa daǵdarysyn retteýdegi Qazaqstannyń mańyzdy bitimgerlik bastamalaryn atap ótti.
