Jıynda sóz alǵan Aqparat jáne qoǵamdyq damý vıse-mınıstri Marat Ázilhanov elimizdegi din salasynda áıelderden quralǵan uıymdardyń kózge túserlik jumysy baıqalmaı otyrǵanyn málimdedi.
– Jalpy, bizdiń elimizde otbasylyq, genderlik máselelermen aınalysatyn 77 úkimettik emes uıym bar eken. Biraq kóz júgirtsek, bir-bireýi din salasyna aıtarlyqtaı atsalysyp jatqan joq. Oblystarda úkimettik emes uıymdarǵa 235 mln teńge bólinedi. 126 joba iske asyrylyp jatyr. Bizdiń ortalyqta da otbasylyq qundylyqtarǵa baılanysty birneshe joba bar. Bizdiń maqsatymyz – dinı radıkalızmniń aldyn alý. Bul salada elimizde qordalanǵan máseleler kóp, – dedi vıse-mınıstr. Túıtkili sheshilmegen máselelerdiń ishinde «Jýsan» operasııasymen elge oralǵan áıelderdiń taǵdyry alańdaýǵa turarlyq ekenin nazarǵa aldy. Aldaǵy ýaqytta bul baǵytta júıeli jumys júrgizilýi kerek.
– Sırııada qaza tapqandardyń otbasylary, balalary men áıelderi bar. Ártúrli jaǵdaımen abaqtyǵa túskenderdiń otbasylary men áıelderi bar. Odan qaldy bizdiń óńirlerde áıelder jamaǵaty baryn jasyrýdyń keregi joq. Áıelder ózderi birigip, jamaǵat bolyp jatyr. Ol da belgili jaıt. Bul kisiler jabyq túrde bir-birimen aralasady. Syrtpen baılanysy joq. О́zderimen ózderi júredi. Qıyndyqtary joq emes. Jumys tappaı, balalaryn balabaqshaǵa ornalastyra almaıdy. Olarmen de jumys júrgizý kerek, – dedi M.Ázilhanov.
Semınarǵa arqaý bolǵan taqyrypty tarqatqan qoǵam qaıratkeri Asyly Osman qazirgi qazaq qoǵamynda ulttyq rýhanı qundylyqtardy urpaqqa qalaı bere bilýimiz kerek ekenin aıtty.
– Qoǵamdy quratyn da, onyń tiregi de analar. Til men dinniń egiz ekenin eshkim joqqa shyǵara almaıdy. Til men din – adamnyń jan dúnıesindegi rýhanı baılyǵy. Rýhanı dúnıeni ulttyń janyna uıalata alatyn – ana. Al meniń qazaǵymnyń burynǵy analary men qazirgi analardy salystyrýǵa bola ma? Eshkimdi jatsynbaıtyn qazaǵym adamı asyl qasıetin boıynda saqtasa deımin. Onyń barlyǵy tek til arqyly ǵana urpaqtyń janyna uıalaıtynyn esh ýaqytta umytpaıyq. Tarıhty, mádenıetti, ádebıetti jetkizetin kómeıdegi sóz ben tańdaıdaǵy til ǵana, – dedi A.Osman.
Jıynǵa qatysqan teolog-ǵalymdar, memlekettik organ ókilderi, destrýktıvti dinı aǵymdardan zardap shekken tulǵalardy ońaltý salasynda qyzmet etetin memlekettik emes uıymdar taqyryp tóńireginde baıandamalar jasap, týyndaǵan máselelerdi sheshý joldaryn usyndy.
