Birinshi jartylaı orta salmaqta óner kórsetken qandasymyz bul jekpe-jekte ekinshi deńgeıli WBA Continental jáne IBF Inter-Continental beldigi úshin meksıkalyq tájirıbeli boksshy Mıgel Vaskespen (41-8, 15 KO) judyryqtasty. Qos bokshsy da 10 raýnd boıy naǵyz aıqas kórsetti. Degenmen ár raýndty óz paıdasyna jazǵan otandasymyz tóreshilerdiń biraýyz sheshimimen jeńiske jetti. Bir tóreshi 100-90 upaımen Júkembaev jeńiske jetti dep esptese, eki tóreshi bir raýndta meksıkalyq boksshy basym boldy dep, 99-91 kórsetkishimen jeńisti qazaqstandyq boksshyǵa bergen.
Buǵan deıin 16 kezdesý ótkizip, onyń 13-in nokaýtpen aıaqtaǵan Batyr Júkembaev bul joly óte qarymdy boksshymen jekpe-jek ótkizdi dep aıta alamyz. Onyń ústine bul reıtıngtik emes, belbeý úshin bolǵan kezdesýde qarsylastyń da deńgeıi soǵan saı bolýy kerek. Sondaı-aq 32 jastaǵy meksıkalyq boksshy 2010 jáne 2014 jyldar aralyǵynda jeńil salmaqtaǵy IBF tujyrymy boıynsha álem chempıony atanǵanyn da aıta ketken jón. Vaskes kásipqoı boksta álem chempıony degen ataǵy bar birqatar myqty boksshylarmen aıqasyp, mol tájirıbe jınaqtaǵan. Atap aıtar bolsaq, ol alǵashqy jekpe-jeginde qazirgi tańda orta salmaqtaǵy WBC, WBA jáne IBF tujyrymy boıynsha álem chempıony, qazaqstandyq boks jankúıerlerine jaqsy tanys Saýl «Kanelo» Alvarespen eki ret judyryqtasqan. 2006 jyly ótken alǵashqy aıqasynda óziniń otandasynan jeńilse, araǵa eki jyl salyp Alvarespen qaıta rıngte jolyqty. Degenmen bul joly da «Kanelo» upaı sanymen basym tústi. Sonymen qatar Vaskes amerıkalyq áıgili boksshy Tımotı Bredlımen, birinshi jartylaı orta salmaqtaǵy álem chempıony brıtanııalyq Djosh Teılormen qolǵap túıistirip, ese jibergen. Kásipqoı boksta mol tájirıbe jınaqtaǵan boksshymen jekpe-jek ótkizip, otandasymyzdyń jeńiske jetkeni aýyz toltyryp aıtarlyqtaı nátıje.
Osylaısha, Júkembaev buǵan deıin jeńip alǵan ekinshi deńgeıli IBO International jáne WBC Continental Americas beldigine WBA Continental men IBF Inter-Continental tujyrymy boıynsha eki birdeı belbeý qosyp qoıdy. Keshegi jarqyn jeńisinen keıin Júkembaev birnshi jartylaı orta salmaqtaǵy TOP-20 boksshynyń qataryna kirdi. Eger jyl sońyna deıin taǵy bir jekpe-jek ótkizetin bolsa, kelesi jyldan bastap tórt beldiktiń bir tujyrymy boıynsha chempıondyq beldikke talasýǵa tolyq múmkindik týady.
Otandasymyzdyń jekpe-jegin tamashalaǵan kanadalyq boks týraly jazatyn The Fight City basylymynyń jýrnalısi Mennı Monreal Batyrdyń jeńisin joǵary baǵalady. «Jekpe-jek tolyq Batyr Júkembaevtyń baqylaýymen ótti. Degenmen onyń qarsylasyn álsiz dep aıta almaımyn. Buǵan deıin biraz belesterdi baǵyndyryp, álem chempıony degen ataqqa qol jetkizgen óte ákki boksshy. Osy qarqynynan taımasa, Batyr kelesi jyldan bastap álem chempıony ataǵy úshin jekpe-jek ótkizip, dúnıe júzin moıyndatatyna kúmánim joq» deıdi ol.
Sondaı-aq atalǵan boks keshi aıasynda orta salmaq dárejesinde óner kórsetetin taǵy bir otandasymyz Aman Qazanǵapov kezekti jekpe-jegin ótkizip, meksıkalyq Hesýs Arrıagıden upaı sany boıynsha basym tústi.
