Qaraǵandy oblystyq jastar saıasaty máseleleri jónindegi basqarmanyń basshysy Nurjan Jetpisbaev bıylǵy baıqaýdyń «Jastar jylyna» arnalǵanyn aıtty.
– Dástúrli «Kúı-MIX» respýblıkalyq baıqaýyn Qaraǵandy oblysynyń jastar resýrstyq ortalyǵymen birlesip uıymdastyrdyq. Baıqaý halyq mýzykasyn tanymal etýge, óskeleń urpaqty salt-dástúrge, mádenıetke jáne halyq shyǵarmashylyǵyna baýlýǵa baǵyttalǵan, – dep atap ótti óńir jastarynyń kóshbasshysy.
Qazylar alqasynyń sheshimi boıynsha, baıqaýdyń bas júldesine qaraǵandylyq «Tarlan» toby laıyqty dep tanyldy. Birinshi júlde elordalyq dýet Temirlan Oljabaı men Ernat Naýryzǵa buıyrsa, Baqytjan Jelderbaev pen Maqsat Hasanov ekinshi júldeni ıelendi. Al júldeli úshinshi oryn Jańaarqa aýdanynan kelgen kúıshi Ýálıhan Shekımovtiń qanjyǵasynda ketti.
«Kúı-MIX» respýblıkalyq baıqaýynyń dombyranyń qulaǵynda oınaıtyn jeńimpazdary men qatysýshylaryna arnaıy dıplomdar, aqshalaı sertıfıkattar jáne estelik syılyqtar tabys etildi.
QARAǴANDY
