Respýblıkalyq «Ekosaǵat» ekologııalyq aksııasyna Almaty oblysy da belsene atsalysty. Sonyń ishinde Taldyqorǵandaǵy № 9 mektepte ótken sharada oblys ákimi Amandyq Batalov sóz sóılep, balalardy týǵan jerin súıýge, onyń ásem tabıǵatyn aıalap, kórkeıtýge shaqyrdy. Qaratal shaǵyn aýdanynyń jańadan turǵyzylǵan jyldaryn, № 9 mekteptiń qurylysy júrgen kezeńderdi eske túsirdi. Jyl ótken saıyn Qazaqstannyń bir bólshegi retinde damyp kele jatqan óńirdiń odan ári órkendeýine onyń árbir azamaty belsene atsalysýy tıistigin atap ótti.
- Bizdiń Almaty oblysyn jer jannaty Jetisý dep beker atamaǵan. Bul shybyq shanshysań, shynar ósetin qolaıly jer. О́lkeńdi jaqsy kórý, Otandy súıý onyń tabıǵatyna qamqorlyq jasaýdan bastalady. Sondyqtan osyndaı «Ekosaǵat» aksııasynyń paıdasy zor. Taldyqorǵandy atyna saı kórkeıtip, kógaldandyrýǵa bárimiz de úles qosaıyq, - dedi A. Batalov.
№ 9 mekteptiń oqýshylary Ersaıyn Sákimjan men Balǵyn Dúısenqulova da aksııaǵa qatysty oı-pikirlerin bildirip, qatarlastaryn qorshaǵan ortany qorǵaýǵa shaqyrdy.
Oblys ákimi bastaǵan resmı qonaqtarǵa balalar óz qoldarymen jasaǵan qus uıasyn kórsetip, tabıǵat qorǵaý taqyrybynda óleńder oqydy.
Amandyq Batalov mektep ujymymen, ata-analarmen, oqýshylarmen birlesip, mektep aýlasyna 100 tal qaıyń aǵashyn otyrǵyzdy. Ardager apalar aǵash túbine kesemen aq quıyp, shanshylǵan shybyqtar saıaly orman bolsyn degen yrymyn jasady.
Jalpy «Ekosaǵat» aksııasy aıasynda oblystaǵy mektepterdiń aýlalarynda orman sharýashylyǵy men parkterden bólingen 17250 aǵash otyrǵyzylsa, balabaqshalar men kolledjder ujymdarynyń demeýshiler kómegimen 15 myń aǵash ákelingen, sóıtip óńirde jalpy sany 30 myńnan astam kóshet egildi.
