SJKMT – 1999 jyly Eýropa Keńesiniń bastamasymen qurylǵan, oǵan Qazaqstanǵa deıin Aýstrııa, AQSh, Ulybrıtanııa, Germanııa, Fransııa, Nıderland, Norvegııa, Shvesııa, Fınlıandııa sııaqty 49 memleket kirgen. Postkeńestik keńistiktegi memleketter arasynan Ázerbaıjan, Armenııa, Belarýs, Grýzııa, Reseı, Ýkraına jáne Estonııa qatysýda.
Uıymnyń aldyna qoıylǵan eki basty mindeti – múshe memleketterde sybaılas jemqorlyqpen kúres tásilderin jetildirý jáne sybaılas jemqorlyq jaǵdaılaryn anyqtaý jáne aldyn alý salasyndaǵy oń tájirıbemen almasýdyń bazasyn jasaý.
Qazaqstan jaǵynan sharaǵa Sybaılas jemqorlyqqa qarsy is-qımyl agenttiginiń tóraǵasy Alık Shpekbaev qatysty. Eýropa Keńesinen Bas hatshynyń orynbasary Gabrıella Battaını-Dragonı qatysyp, Qazaqstannyń sybaılas jemqorlyqqa qarsy saıasatyn iske asyrýdaǵy birshama ilgerileýshiligi men onyń bastapqy usynys bergen sátinen bastap oryn alǵan oń ózgeristerin atap ótti.
«Men Qazaqstannyń jetistikterimen jáne SJKMT-ǵa múshe memlekettermen tıimdi yntymaqtasýǵa daıyndyǵyn maqtan etemin. Biz kelesi qadamdardy, sonyń ishinde sizdiń eldiń Sybaılas jemqorlyq úshin qylmystyq jaýapkershilik týraly konvensııaǵa qosylýyn taǵatsyzdana kútemin», dedi.
Alık Shpekbaev Qazaqstannyń Eýropa Keńesimen jáne onyń qurylymdarymen onyń múshesi bolmaı turyp, 1997 jyldan bastap yntymaqtastyq ornatqanyn málimdedi. Ol: «Biz erekshe qyzyǵýshylyq týdyratyn máseleler boıynsha Keńeske múshe memlekettermen birlesip jumys isteýge múmkindik beretin birqatar keńeıtilgen kelisimderge qatysa alamyz», dep atap ótti.
Agenttik tóraǵasy: «SJKMT-men yntymaqtastyq bizdiń eldiń sybaılas jemqorlyqqa qarsy Birikken Ulttar Uıymy (BUU) Konvensııasynyń tolyqqandy qatysýshysy retinde Eýropalyq komıssııanyń tujyrymdamalyq qaǵıdattaryn qoldaıtynymyzdy jáne sybaılas jemqorlyqqa qarsy sharalardy jetildirýge nıetimizdi bildiredi. SJKM-ǵa qosylý bizge sybaılas jemqorlyqqa qarsy is-qımylda eýropalyq úzdik tájirıbeni qabyldaýǵa jol ashady», dep atap kórsetti.
Jumys kezdesýi barysynda SJKMT atqarýshy hatshysy Djanlýka Espozıto: «Qosylý kelissózderi sátti aıaqtaldy. Osy bedeldi bastamaǵa 50-shi qatysýshy retinde qosylatyn Qazaqstannyń kelisimdi tezdetip ratıfıkasııalaýyn kútemiz» (qosylýǵa shaqyrý 2013 jyly jeltoqsanda joldanǵan bolatyn), dedi.
SJKMT tarapynan monıtorıng rásimderi aıaqtalǵan sátte Agenttik basqa memlekettik organdarmen birlesip, halyqaralyq konvensııalardy, sonymen qosa sybaılas jemqorlyqpen kúres jónindegi 20 basty qaǵıdany eskere otyryp, eýropalyq elderdiń tájirıbesine negizdelgen sybaılas jemqorlyqqa qarsy zańnamany jetildirý boıynsha usynymdardy iske asyrýǵa basymdyq beretin bolady.
Qazaqstanǵa qol qoıylǵan kelisimdi ratıfıkasııalaý qajet, oǵan sáıkes SJKMT ókilderi men baǵalaý toptarynyń múshelerin jeke qamaýdan, júkti ustaýdan jáne tárkileýden, aýyzsha jáne jazbasha ótinishter úshin qýdalaýdan qorǵaý ımmýnıteti qarastyrylǵan.
Bul – rásimder halyqaralyq alańdaǵy qalypty standart. SJKMT atynan basqa elderdi baǵalaý úrdisine tartylatyn qazaqstandyq sarapshylarǵa da osyndaı ımmýnıtet beriledi.
SJKMT-ǵa qosylý Sybaılas jemqorlyq úshin qylmystyq jaýapkershilik týraly konvensııany ratıfıkasııalaýǵa múmkindik beredi. Bul keleshekte quqyqtyq kómek kórsetý, qylmyskerlerdi ekstradısııalaý jáne olar zańsyz ıemdengen múlikti qaıtarý máseleleri boıynsha Eýropa elderimen yntymaqtastyqty nyǵaıtýǵa múmkindik beredi jáne halyqaralyq tergeý tapsyrmalary boıynsha júrgiziletin Eýropa memleketteriniń aýmaǵyndaǵy jedel izdestirý sharalaryna Qazaqstannyń quqyq qorǵaý organdary qyzmetkerleriniń qatysýyna negiz bolady.
