Jańa joba qazaqtyń mádenı murasyn saqtap, nasıhattaýǵa baǵyttalǵan.
«Búgingi shara «Rýhanı jańǵyrý» baǵdarlamasy aıasynda júzege asyp jatyr. Osy baǵdarlama aıasynda qanshama asyl muralarymyz tanylyp ta, tabylyp ta júr. Qazaq mádenıeti ǵasyrlar boıy urpaqtar arasyndaǵy sabaqtastyqty jalǵastyryp keledi. 30 jylǵa jýyq táýelsizdik tarıhymyzda da ulttyq qundylyqtarymyz az dáriptelip júrgen joq. Jobanyń kózdegeni – jas urpaqqa tól mádenıetimizdi tanystyra otyryp, olardyń sanasyna rýhanı jańǵyrý kodyn sińirý. Jáne álemge qazaqstandyq mádenıetti jańa turpatta tanystyrý. Joba aıasyndaǵy sharalardyń alǵashqysy – búgingi tusaýkeser. Odan ári josparǵa túrli baǵyttaǵy tarıhı-mádenı is-sharalar uıymdastyrylady», dedi Tuńǵysh Prezıdent kitaphanasy dırektorynyń orynbasary Botagóz Qaıypova.
Onyń aıtýynsha, joba 1 jylǵa arnalǵan. Joba aıasynda elordalyq oqýshylar tarıhı-mádenı oryndarmen tanysyp, ǵylymı zertteýler júrgizedi.
«Oqýshylarǵa arnalǵan bul sharanyń basty maqsaty – oqýshylardy tarıhı jádigerler men eskertkishter týraly tereń tanyp bilý men ony qurmetteý. Sondaı-aq el óńirleriniń mádenıetimen tanysa otyryp, oqý-tanymdyq baǵdarlamalardy ázirleý. Joba 2019-2020 oqý jylyna arnalǵan. Bir jyl boıy oqýshylardyń qatysýymen túrli baǵyttaǵy sharalar uıymdastyrylady. Onyń ishinde, tanymal tulǵalarmen kezdesý, ádebı kesh, túrli baıqaý jáne ǵylymı jobalar jazý. Sonymen qatar kórmeler men ashyq sabaqtar ótedi. Jobany Bilim basqarmasynyń bastamasymen qaladaǵy 5 mektep birigip júzege asyratyn bolamyz», dedi qalalyq №15 mektep-lıseıi dırektorynyń tárbıe isi jónindegi orynbasary Ǵalııa Omasheva.
Aıta keteıik, «Qazaqstannyń mádenı murasy álemine saıahat» atty jobaǵa qalanyń №15, 18, 19, 21, 35 mektep ujymy men oqýshylary qatysyp jatyr.
