Dóńgelek ústeldi ashqan memlekettik arhıvtiń dırektory Sáýle Málikova aldymen Qazaqstannyń Táýelsizdik jyldarynda asqan bıik belesterine toqtaldy. Sonyń ishinde Qazaqstannyń qol jetkizgen saıası-ekonomıkalyq tabystary aıtyldy. Elimizdiń EQYU-ǵa tóraǵa bolǵandyǵy, onyń sammıtin ótkizgendigi, EHRO-2017 sııaqty dúnıejúzilik mańyzy bar kórmeni uıymdastyrǵandyǵy, álemdik aýqymdaǵy mádenı, sporttyq sharalardy ótkizgendigi jas jetkinshekterge úlken tabys retinde jetkizildi. Sonymen birge Táýelsizdik jyldarynda arhıv qorynyń da mańyzdy qujattarmen tolyqqandyǵy tilge tıek etildi. «Bul - bizdiń tarıhshylarymyz ben zertteýshilerimizdiń óz eńbekterin shynaıy faktilerge súıenip jazýyna jaǵdaı týǵyzdy. Ásirese, Alash qaıratkerleriniń ómiri men isteri jaıly tabylǵan jańa qujattar olardyń is-áreketterin tereńirek bilýge múmkindik beredi», dedi ol.
Memlekettik arhıvtiń qyzmetkeri Zakırına Zámzagúl Táýelsizdik belesteri jóninde tolymdy baıandama jasady. Al Jeltoqsan oqıǵasynyń sebepteri men saldary týraly «Biteý jara. (Jeltoqsan 1986)» avtory retinde osy joldardyń avtory áńgimeledi.
Sharaǵa qatysqan jastar da óz ónerlerin ortaǵa saldy. Sonyń ishinde onynshy synyptyń oqýshysy Mýsadın Dýrsýnov Maǵjannyń «Men jastarǵa senemin!» degen óleńin naqyshyna keltirip oqyp berdi. О́zi orys mektebinde oqysa da bul bala qazaq tilin úırenýge degen qulshynysy joǵary ekenin kórsetti. Sharanyń sońynan jınalǵan jastar arhıv qyzmetkerleri daıyndaǵan aıryqsha qujattardyń kórmesin tamashalady.
QYZYLJAR
