Tek 11 sáýirden beri qalada koronavırýstyq ınfeksııa quryǵyna densaýlyq salasynyń 37 ókili ilikse, tek búgin 13 sáýirde, ıaǵnı bir kúnde 27 medısına qyzmetkeri indetke shaldyqqany resmı málim boldy. Onyń 20-sy Ortalyq qalalyq klınıkalyq aýrýhanasynyń dárigerleri men orta jáne kishi býyndaǵy medpersonaly bolsa, 7 adam Balalar juqpaly aýrýhanasyna qaraıdy.
Sonymen, dúısenbi kúni Ortalyq qalalyq klınıkalyq aýrýhanasynyń 20 medısına qyzmetkerin tósekke sulatqan indet qaıdan keldi?
Almatynyń bas sanıtar dárigeri Aızat Moldaǵasymovanyń bul saýalǵa bergen jaýaby tómendegideı boldy.
Naýryz aıynyń sońynda osy №12 aýrýhanaǵa MRT-dan ótýge indet juqtyrǵan pasıent kelgen. Ol osy bólimsheniń dárigeri jáne medbıkesimen baılanysta bolǵan.
Aldymen osy arada 11 sáýirde Ortalyq qalalyq klınıkalyq aýrýhanasynyń 12 dárigeri indet juqtyrǵany belgili bolǵan edi. Búgin taǵy da dál osy aýrýhanadaǵy basqa da medısına qyzmetkerlerine COVID-19 dıagnozy qoıylǵanyn Almaty qalasy Densaýlyq saqtaý basqarmasynyń basshysy Tileýhan Ábildaev rastady.
Sol sııaqty búgin Balalar juqpaly aýrýhanasynan buryn juqtyrǵandarmen baılanysta bolǵan 7 medısına qyzmetkerinde indet zerthanalyq túrde anyqtaldy.
Almatynyń bas sanıtarynyń aıtýynsha, koronavırýstyq ınfeksııa juqtyrýǵa saqtyq sharalaryn saqtamaǵan dárigerlerdiń ózderin de kináli kórinedi.
Sońǵy derekterge sensek, polısegmentarly pnevmonııaǵa baılanysty 2 medısına qyzmetkeriniń jaǵdaıy aýyr. Sondaı-aq, Almatyda karantınge jabylǵan Ortalyq qalalyq klınıkalyq aýrýhanasynda koronavırýs juqtyrǵan dárigerlermen baılanysta bolǵan 316 adam oqshaýlanǵany týraly da Almatynyń bas sanıtar dárigeri málimdedi.
«Biz jaqyn baılanysta bolǵan 316 adamdy oqshaýladyq. Munyń Almatydaǵy eń úlken klınıka ekenin eskerý kerek. Munda 1000-nan asa qyzmetker bar, eki bólim boıynsha 316 adam oqshaýlandy», – dedi Bas sanıtar.
Almatyda koronavırýs juqtyrǵan dárigerlerge baılanysty epıdemıologııalyq tergeý bastaldy.
ALMATY
