Bul týraly seısenbi kúni túske qaraı ótken onlaın-brıfıngte Almaty qalalyq densaýlyq saqtaý basqarmasynyń basshysy Tileýhan Ábildaev málimdedi. Qysqasy, Almaty qalasynyń densaýlyq saqtaý basqarmasy eki birdeı aýrýhanany karantınge jabýǵa májbúr boldy. Demek, sońǵy táýlikte shahardaǵy 147 medısına qyzmetkeri, ıaǵnı Almatydaı úlken qalada indet juqtyrǵandardyń teń jartysyna derligi dárigerler boldy dep aıtýǵa negiz bar.
Máselen, seısenbi kúngi resmı derekterge sáıkes, tek jańadan anyqtalǵan jaǵdaı – 174. Olardyń 58-i jergilikti naýqaspen baılanysta bolǵan bolsa, onyń ishinde Balalar qalalyq klınıkalyq juqpaly aýrýlar aýrýhanasynyń 1 qyzmetkeri, Ortalyq qalalyq klınıkalyq aýrýhananyń 110 medısına qyzmetkeri, Medısınalyq jedel járdem qyzmetiniń 2 qyzmetkeri, №32 Qalalyq emhananyń 1 qyzmetkeri, №11 Qalalyq emhananyń 1 qyzmetkeri, №1 Qalalyq klınıkalyq aýrýhananyń 1 qyzmetkeri bar.
Burynǵy №12 aýrýhana, ıaǵnı Ortalyq qalalyq klınıkalyq aýrýhananyń 1200-ge tarta qyzmetkeri men myńdaǵan pasıenti bar ekenin eskersek, áli de koronavırýstyq ınfeksııa juqtyryp alǵandardyń sany arta túsýi ǵajap emes. Atalǵan aýrýhanadaǵy indet juqtyrǵan 110 dárigerge keletin bolsaq, onyń ishinde dárigerlermen birge orta jáne kishi býyn medısınalyq qyzmetkerleri de bar.
Osy arada oqyrmanǵa túsinikti bolý úshin aıta ketý kerek, 11 sáýirden beri qalada koronavırýstyq ınfeksııa quryǵyna densaýlyq salasynyń 37 ókili ilikse, 13 sáýirde, ıaǵnı bir kúnde 27 medısına qyzmetkeri indetke shaldyqqany resmı málim boldy. Onyń 20-sy Ortalyq qalalyq klınıkalyq aýrýhanasynyń dárigerleri men orta jáne kishi býyndaǵy qyzmetkerleri bolsa, 7 adam Balalar juqpaly aýrýhanasyna qaraıdy. Sonymen dúısenbi kúni Ortalyq qalalyq klınıkalyq aýrýhanasynyń 20 medısına qyzmetkerin tósekke sulatqan indet qaıdan keldi degen suraqqa Almaty qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymovanyń bergen jaýaby tómendegideı boldy.
Naýryz aıynyń sońynda osy «№12 aýrýhanaǵa» MRT-dan ótýge indet juqtyrǵan pasıent kelgen. Ol osy bólimsheniń dárigeri jáne medbıkesimen baılanysta bolǵan. Departament basshysynyń aıtýynsha, koronavırýstyq ınfeksııa juqtyrýǵa saqtyq sharalaryn saqtamaǵan dárigerlerdiń ózderi de kináli kórinedi. Degenmen, Ortalyq qalalyq klınıkalyq aýrýhana ujymynyń bul máselede óz ýáji bar. Olardyń Memleket basshysyna jazǵan aryz-shaǵymdaryna sensek, indet osy aýrýhanany tekserýge kelgen SES qyzmetkerlerimen ilesip kelgen. Qysqasy, dál osy kúnderi jappaı indet juqtyrǵan medısına qyzmetkerlerine qatysty epıdemııalyq tergeý jumystary júrip jatyr.
Alaıda osy arada birneshe máseleni alǵa tarta ketken jón. Osydan eki apta buryn Almaty qalasynyń resmı brıfıng-chatynda BAQ ókilderi Ortalyq qalalyq klınıkalyq aýrýhanasyna baılanysty birneshe másele kótergen bolatyn. Onyń biri – koronavırýstyq syrqat belgileri bar naýqastardyń jedel járdemmen atalǵan aýrýhanaǵa aparylýy edi. Biraq qalalyq densaýlyq saqtaý basqarmasynyń basshylary bul suraqtarǵa jaýap berip, máseleni anyqtaýdyń ornyna, jýrnalısterge keri suraqtar qoıýmen ǵana shekteldi. Onyń ústine Almatynyń bas sanıtarlyq dárigeriniń aınalasynan da áńgimeler ketpeı tur. Máselen, Eýropada Germanııa eń qaýipti elder sanatyna jatqyzylǵan kezde, sol elge baryp qaıtqan Moldaǵasymova 14 kúndik karantınge oqshaýlanýdyń ornyna, baspasóz máslıhatyn ótkizgenin búkil BAQ ókilderi kórdi.
Sońǵy derekterge sensek, seısenbi kúni polısegmentarly pnevmonııasyna baılanysty 2 medısına qyzmetkeriniń jaǵdaıy aýyr boldy. Sondaı-aq Almatyda karantınge jabylǵan Ortalyq qalalyq klınıkalyq aýrýhanasynda koronavırýs juqtyrǵan dárigerlermen baılanysta bolǵan 316 adam oqshaýlanǵany týraly da Almatynyń bas sanıtarlyq dárigeri málimdedi.
«Biz jaqyn baılanysta bolǵan 316 adamdy oqshaýladyq. Munyń Almatydaǵy eń úlken klınıka ekenin eskerý kerek. Munda 1 myńnan asa qyzmetker bar, eki bólim boıynsha 316 adam oqshaýlandy», dedi bas sanıtar.
Qazir Almatyda koronavırýs juqtyrǵan dárigerlerge baılanysty epıdemııalyq tergeý júrip jatyr.
ALMATY
