Jobany Jambyl óńirinde de tıimdi júzege asyrý maqsatynda M.H.Dýlatı atyndaǵy Taraz memlekettik óńirlik ýnıversıtetiniń M.Úrkimbaev atyndaǵy Jastar saraıynda jıyn ótip, atalǵan jobanyń tusaýy kesildi. Saltanatty jıynǵa oblys ákimi Berdibek Saparbaev, oblys ákiminiń orynbasary Erjan Jylqybaev, oblystyq máslıhattyń hatshysy Baǵlan Qarasholaqov jáne ákimdikke qarasty basqarmalar men ózge de mekemelerdiń basshylary qatysty. Atalǵan shara Taraz qalasyndaǵy «Meıirimdilik mekeni» atty balalar áleminiń tárbıelenýshileri týraly daıyndalǵan beınerolıkpen ashyldy. Munda balalardyń kúndelikti turmys-tirshiligi qamtylyp, ata-ananyń meıirimin ańsap ósip kele jatqan jetkinshekterdi qamqorlyǵyna alyp otyrǵan ortalyqtyń jumysy tanystyryldy. Budan keıin oblys ákimi B.Saparbaev sóz alyp, qamqorlyqqa muqtaj azamattarǵa qolushyn sozyp, kómek kórsetý atanyń qanymen, ananyń sútimen boıymyzǵa sińgen qasıet ekenin atap ótti. «Jalpy, adam balasy qanshalyqty bir-birine meıirban, qamqor bolsa, ol da qoǵamnyń izgilene túsýine qosqan úlesi, azamattyq boryshynyń oryndalýy dep bilemin. Qazaq – jetimin jylatpaǵan, jesirin qańǵytpaǵan halyq. Ony óz tarıhymyzdan jaqsy bilemiz. Máselen, qazaq ótken ǵasyrdyń basyndaǵy asharshylyq pen qýǵyn-súrgin ýaqytynda elimizge qonys aýdarǵan qanshama ózge ult ókilderin týysynan kem kórmeı, baýyryna basty. Bul bizge úlken ónege boldy. Sondyqtan da muqtaj jandarǵa kómek berýdi aımaqtaǵy kásiporyn basqaryp, óz kásibimen aınalysyp otyrǵan atpal azamattardyń bir mindeti dep bilý qajet. Bul – árkimniń óskeleń urpaq aldyndaǵy áleýmettik paryzynyń oryndalýy dep oılaımyn. Qazir aımaqta jumys istep jatqan birqatar ónerkásip oryndarynyń oblys turǵyndaryna jan-jaqty kómek berip jatqanynan habardarmyz. Endigi kezekte bul jumystar jalǵasyn tabýy úshin atalǵan jobany iske qosqaly otyrmyz. Elimizde áleýmettik ahýal jaqsarǵan saıyn balalar úıi tárbıelenýshileriniń sany azaıyp keledi. Degenmen ata-anasynyń qamqorlyǵynsyz qalǵan balaqaılar áli de bar. Bizdiń mindetimiz – olarǵa barynsha qoldaý kórsetip, qoǵamnyń tolyqqandy múshesi atanyp, eline adal qyzmet etetin azamat bolyp ósýine, ómirden óz ornyn tabýyna járdemdesý», dedi ákim. Sonymen qatar óz sózinde B.Saparbaev osylaısha jetimder úıiniń tárbıelenýshilerine sapaly bilim alyp, mamandyq ıesi atanýǵa, jumysqa ornalasýǵa, baspanaly bolyp, otbasyn qurýǵa qoldaý bildirý qajettigin aıtyp ótti.
Joba tujyrymdamasyna sáıkes, óńirdegi jetim jáne ata-anasynyń qamqorlyǵynsyz qalǵan balalarǵa arnalǵan mekemelerde tárbıelenip jatqan, ıaǵnı asyraýshysynan aırylǵan 134 balanyń ómir súrý sapasyn áleýmettik jáne quqyqtyq kepildikterdi qamtamasyz etý arqyly jaqsartýǵa baǵyttalǵan jumystar júrgiziledi. Bul maqsatta 87 memlekettik mekeme men iri kásiporyndardyń basshylary jaýapty tulǵa esebinde bekitilgen. Tıisti azamattar sol balalar ósip, úlken ómirge aralasqansha olardyń ashylǵan esepshottaryna qarjy salyp, ózge de máseleler boıynsha qoldaý kórsetedi. Sondaı-aq olardyń keıinnen turaqty jumysqa ornalasyp, baspanaly bolýyn da baqylaýǵa alady.
Jıyn barysynda balalar úıiniń tárbıelenýshisi Albına Qadyrova ózi sekildi baldyrǵandardy qamqorlyǵyna alǵany úshin B.Saparbaevqa alǵys aıtty. «Men 6-synypta oqımyn. Oqý úlgerimim jaqsy. Bolashaqta oqý grantyn ıelenip, ózim armandaǵan mamandyqtyń ıesi atansam deımin. Úlken úıim bolsa dep armandaımyn. Búgin sol armanyma bir taban jaqyndaǵan sııaqtymyn. Oblys əkiminiń qolynan qarjylaı sertıfıkat alǵanyma qýanyp turmyn», deıdi A.Qadyrova.
Budan keıin B.Saparbaev A.Qadyrovaǵa 1 mln teńgeniń sertıfıkatyn tabystady. Bul onyń «Turǵyn úı qurylys jınaq banki» arqyly baspana alýy úshin bastapqy jarna retinde tólenip otyrǵan qarajat. Sondaı-aq balalardy ómirlik súıemeldeý týraly úshjaqty áleýmettik kelisimshartqa qol qoıdy.
Jambyl jerinde júzege asyp jatqan «Meıirim» jobasyna jergilikti kásipkerler de qoldaý kórsetti. «Qazfosfat» JShS bas dırektory, Qazaqstannyń Eńbek Eri Muqash Eskendirov Danıl Kotýrbaev pen Tatıana Shevelevaǵa, oblystyq máslıhattyń hatshysy Baǵlan Qarasholaqov Arkadıı Ovchınnıkovqa, al, «Altais Group» JShS dırektory Álimbek Jumabaev Nıkolaı Morozovqa, «Araıstroımarket-2003» JShS dırektory Arman Edilbaev Vıktorııa Onıshenkoǵa 1 mln teńge kólemindegi sertıfıkattar tabystady. Budan keıin kópshilikke balalar úıindegi jetkinshekterge kómek kórsetip júrgen jambyldyq jomart jandar týraly daıyndalǵan beınerolık kórsetildi. Sondaı-aq «О́mirlik qıyn jaǵdaıdaǵy balalardy qoldaý ortalyǵy» mekemesiniń basshysy Aıjan Meıirhanova baıandy bastamany Jambyl jerinde jalǵastyrǵany úshin oblys ákimi B.Saparbaevqa alǵys aıtty. Sonymen qatar balalarǵa járdem berip, júrek jylýyn tókken barsha azamattarǵa ıgi tilegin arnady. Shara sońynda balalar úıiniń tárbıelenýshileri de kómek kórsetken jandarǵa degen alǵysyn ánmen jetkizdi.
Jambyl oblysy
