Belbasar aýylyndaǵy Sh.Ýálıhanov atyndaǵy 400 oryndyq orta mektep jaqynda ǵana "Jumyspen qamtýdyń jol kartasy" baǵdarlamasy aıasynda kúrdeli jóndeýden ótken. Nysannyń qurylysyna 116 mıllıon teńgeden astam qarajat bólingen. Irgetasy 1969 jyly qalanǵan. Al, 6 myńǵa tarta tútini bar D.Qonaev aýylyndaǵy Tóle bı atyndaǵy orta mekteptiń kúrdeli jóndeý jumysyna 450 mıllıon teńge shamasynda qarjy qaralypty. Sol sııaqty, aýdan ortalyǵy Tóle bı aýylyndaǵy sport kesheni "Aýyl – el besigi» jobasy boıynsha boı kótergen. Onyń qurylysyna 300 mıllıon teńgege jýyq qarajat bólinip, mekeme 40 mamandy jumyspen qamtyp otyr. Sonymen qatar, Shý aýdandyq aýrýhanasynda eki aıǵa jetetin dári-dármek qory qalyptasqan.
Munda 7 ottegi qondyrǵysy jetkizilip, kompıýterlik tomografııa turǵyndarǵa qyzmet etýde. Al, 1989 jyly salynǵan Shý qalalyq aýrýhanasyna jóndeý jumystaryn júrgizý úshin smetalyq-jobalyq qujattary ázirlenýde eken. Atalǵan nysanda jaqynda jetkizilgen 1 ottegi apparatyn qosqanda, qazir 4 qurylǵy jumys istep tur. Jańadan alynǵan KT qondyrǵysy arqyly osy ýaqytqa deıin 300-den astam taldaý jasalǵan. Karantın rejimi kezinde 8 mobıldi top el ishinde jumys istegen. Munda eki aılyq medısınalyq buıymdar men dári-dármek qory bar.
Sondaı-aq Alǵa aýylynda jańa mektep salynýda. Aýyldaǵy Amangeldi atyndaǵy 300 oryndyq mekteptiń qurylysyna memleket qazynasynan 845 mıllıon teńge shamasynda qarajat qaralǵan. Bilim oshaǵyn jıhazdarmen toltyrýǵa demeýshiler aıtarlyqtaı úles qosqan. Endi ekinshi toqsanda oqýshylar jańa mektepte oqıtyn bolady. Endi muǵalimder ata-analarmen birlese jumys istep, Shý qalasyna qatynap oqıtyn 150 alǵalyq oqýshyny osy mektepke qaıtarý kerektigi sóz boldy. Onyń ústine, kezekke tirkelgen 150 turǵynǵa aýyldan jer telimderi berilipti.
Jambyl oblysy
